മലയാളികളുടെ പ്രിയപ്പെട്ട ചോക്ലേറ്റ് നടനാണ് കുഞ്ചാക്കോ ബോബന്‍. സോഷ്യല്‍ മീഡിയയില്‍ ആക്റ്റീവായ താരം പങ്കുവയ്ക്കുന്ന ചിത്രങ്ങളും വിഡിയോകളുമെല്ലാം സോഷ്യല്‍ മീഡിയയില്‍ വൈറലാവാറുണ്ട്. ഇപ്പോള്‍ നോയിഡയില്‍ നിന്നുള്ള താരത്തിന്റെ പുതിയ വിഡിയോ ആണ് ആരാധകര്‍ക്കിടയില്‍ ശ്രദ്ധ നേടുന്നത്. ഓട്ടോ ഓടിക്കുന്ന കുഞ്ചാക്കോ ബോബനെയാണ് വീഡിയോയില്‍ കാണുന്നത്.

'നോയിഡയില്‍ നിന്ന് വൈറ്റില'യിലേക്ക് എന്ന കുറിപ്പിലാണ് താരം വിഡിയോ പങ്കുവച്ചത്. പിന്നില്‍ യാത്രക്കാരെയും ഇരുത്തി ഇലക്ട്രിക് ഓട്ടോറിക്ഷയാണ് താരം ഓടിക്കുന്നത്. 'വൈറ്റില വൈറ്റില' എന്ന് താരം വിളിച്ചു പറയുന്നതും വിഡിയോയില്‍ കാണാം. മഹേഷ് നാരായണന്‍ സംവിധാനം ചെയ്യുന്ന അറിയിപ്പ് എന്ന ചിത്രത്തിന്റെ ഷൂട്ടിങ്ങിനായാണ് കുഞ്ചാക്കോ ബോബന്‍ നോയിഡയില്‍ എത്തിയത്.

ടേക്ക് ഓഫിന് ശേഷം കുഞ്ചാക്കോ ബോബനും മഹേഷ് നാരായണും ഒന്നിക്കുന്ന ചിത്രം കൂടിയാണിത്. ഷെബിന്‍ ബെക്കറാണ് ചിത്രം നിര്‍മിക്കുന്നത്. സംവിധാനത്തിനൊപ്പം അറിയിപ്പിന്റെ എഡിറ്റിങ്ങും മഹേഷ് നിര്‍വഹിക്കുന്നുണ്ട്. കൂടാതെ തിരക്കഥയിലും അദ്ദേഹം പങ്കാളിയാവുന്നുണ്ട്. ചിത്രത്തെക്കുറിച്ചുള്ള കൂടുതല്‍ വിവരങ്ങള്‍ പുറത്തുവന്നിട്ടില്ല.