സമൂഹമാധ്യമങ്ങളില്‍ പങ്കുവയ്ക്കുന്ന ചിത്രങ്ങള്‍ക്കടിയില്‍ സദാചാരക്കമന്റുമായി എത്തുന്നവര്‍ക്കായി ചിത്രം പോസ്റ്റ് ചെയ്തപ്പോള്‍ തന്നെ കിടിലന്‍ കുറിപ്പ് നല്‍കി നടി അമേയ മാത്യൂ. തന്റെ ഏറ്റവും പുതിയ ചിത്രത്തിന് നല്‍കിയ അടിക്കുറിപ്പിലാണ് നടി സദാചാര വാദികളെ ചോദ്യം ചെയ്തിരിക്കുന്നത്.

'സദാചാരം... ഒരു പെണ്ണിന്റെ മാറിലെ തുണി ഒരല്പം മാറി കിടന്നാല്‍ ഒന്ന് കണ്ണോടിക്കാത്ത സദാചാര വാദികള്‍ ആരേലും ഇന്നീ നാട്ടില്‍ ഉണ്ടോ?! , എന്നാണ് ഇന്‍സ്റ്റഗ്രാമില്‍ പങ്കുവച്ച ചിത്രത്തോടൊപ്പം അമേയ കുറിച്ചിരിക്കുന്നത്. കാപ്ഷനും ചിത്രവും കണ്ട് നിരവധി പേരാണ് അഭിപ്രായം കുറിച്ചിരിക്കുന്നത്. ഇവര്‍ക്കെല്ലാം നടി മറുപടി നല്‍കിയിട്ടുമുണ്ട്.

ഒരു പഴയ ബോംബ് കഥ, ആട് 2 എന്നീ ചിത്രങ്ങളില്‍ അഭിനയിച്ചിട്ടുള്ള അമേയ 'കരിക്ക്' എന്ന ഹിറ്റ് വെബ് സീരീസിലൂടെയാണ് ശ്രദ്ധിക്കപ്പെട്ടത്. വൂള്‍ഫ്, ദ് പ്രീസ്റ്റ് തുടങ്ങിയ സിനിമകളാണ് നടിയുടേതായി ഏറ്റവും ഒടുവില്‍ റിലീസ് ചെയ്തത്.