വിവാഹം കഴിക്കാതെ തന്നെ താനൊരു പിതാവായ കാര്യം തുറന്നു പറയുകയാണ് ബോളിവുഡ് താരം തുഷാര്‍ കപൂര്‍. ബോളിവുഡിലെ ആദ്യത്തെ അവിവാഹിതനായ അച്ഛന്‍ തുഷാര്‍ കപൂറാണ്. വാടകഗര്‍ഭധാരണത്തിലൂടെയായിരുന്നു അത്.

മുംബൈയിലെ ജസ്‌ലോക് ആശുപത്രിയില്‍വെച്ചായിരുന്നു കുഞ്ഞിന്റെ ജനനം. ശരീരത്തിനുപുറത്ത് കൃത്രിമാവസ്ഥയില്‍ അണ്ഡകോശത്തെ പുരുഷബീജംകൊണ്ട് ബീജസങ്കലനം ചെയ്യിക്കുന്ന ഇന്‍ വിട്രോ ഫെര്‍ട്ടിലൈസേഷന്‍ (ഐ.വി.എഫ്.) അഥവാ കൃത്രിമ ബീജസങ്കലനം വഴി 2016 ജൂണിലാണ് കുട്ടി ജന്മമെടുത്തത്.

ഇപ്പോള്‍ തുഷാര്‍ ലക്ഷ്യ കപൂറിന്റെ അച്ഛനാണ്. തന്റെ പിതൃത്വത്തെ മുന്‍നിര്‍ത്തി 'ബാച്ചിലര്‍ ഡാഡ്' എന്ന പുസ്തകത്തിലൂടെ എഴുത്തുകാരനുമായി. അവിവാഹിതനായ അച്ഛനായതിനെപ്പറ്റിയും അത് തന്നില്‍ വരുത്തിയ മാറ്റങ്ങളെക്കുറിച്ചുമാണ് തുഷാര്‍ കപൂര്‍ സംസാരിക്കുന്നത്.

തുഷാറിന്റെ വാക്കുകള്‍ ഇങ്ങനെയാണ്

ഒരു ജീവിതപങ്കാളി വേണമെന്ന തോന്നല്‍ എനിക്കുണ്ടായിട്ടില്ല. സിനിമയിലെ അഭിനയവും നിര്‍മ്മാണവും ഉള്‍പ്പെടെ ഞാന്‍ എപ്പോഴും തിരക്കിലായിരുന്നു. അതിനിടയില്‍ പ്രായമാകുന്നത് ഞാന്‍ തിരിച്ചറിഞ്ഞില്ല. 39ാമത്തെ വയസ്സിലാണ് എനിക്കൊരു കുഞ്ഞ് വേണമെന്നു തോന്നിയത്. അങ്ങനെയാണ് ഇന്‍ വിട്രോ ഫെര്‍ട്ടിലൈസേഷനിലൂടെ കുഞ്ഞുണ്ടാവുന്നത്. പല പേരുകള്‍ മനസ്സിലുണ്ടായിരുന്നെങ്കിലും ലക്ഷ്യ എന്ന പേര് തിരഞ്ഞെടുക്കുകയായിരുന്നു. എന്റെ ലക്ഷ്യം കൂടിയായിരുന്നു ലക്ഷ്യ.

പ്രായപൂര്‍ത്തിയായ ഒട്ടേറെ അവിവാഹിതരായ സ്ത്രീകള്‍ കുട്ടികളെ വളര്‍ത്തുന്നുണ്ട്. മാതൃത്വം ആ അര്‍ഥത്തില്‍ ആഘോഷിക്കപ്പെടുന്നുമുണ്ട്. എന്തുകൊണ്ട് അവിവാഹിതനായ എനിക്ക് പിതൃത്വം ആഘോഷിച്ചുകൂടാ എന്ന ചിന്തയില്‍നിന്നാണ് കുട്ടി വേണമെന്ന ആലോചനയുണ്ടാവുന്നത്.

അമ്മയുടെയും അച്ഛന്റെയും അവസ്ഥയിലൂടെ എനിക്ക് കടന്നുപോകണമെന്നു തോന്നി. ആ വെല്ലുവിളി ഞാന്‍ ഏറ്റെടുക്കുകയായിരുന്നു. ജീവിതത്തില്‍ അത്തരമൊരു ത്രില്ലിലേക്ക് ഞാന്‍ മാറുകയായിരുന്നു.