സിനിമാ ചിത്രീകരണത്തിന്റെ ആദ്യകാല അനുഭവങ്ങള്‍ ഓര്‍ത്തെടുത്ത് നടി ഉര്‍വശി. വനിതാ ദിനത്തോട് അനുബന്ധിച്ച് 'അമ്മ' സംഘടിപ്പിച്ച ആര്‍ജവ എന്ന പരിപാടിയില്‍ സംസാരിക്കുകയായിരുന്നു ഉര്‍വശി. 'എല്ലാ കാലഘട്ടത്തിലും പ്രശ്‌നങ്ങളൊക്കെ ഉണ്ടായിരുന്നു. അതിന്നു മാത്രമല്ല.ചില കൃമികളൊക്കെ അന്നുമുണ്ട്.

ഇന്ന് സോഷ്യല്‍ മീഡിയ വളര്‍ന്നതു കൊണ്ട് കാര്യങ്ങള്‍ വേഗത്തില്‍ പുറത്തുവരുന്നു.' അവര്‍ പറഞ്ഞു. പക്ഷേ, അന്നത്തെ പ്രത്യേകത എന്നു പറയുന്നത്, ലാലേട്ടനെ പോലുള്ളവര്‍ ഒരു ലൊക്കേഷനില്‍ നിന്ന് പോകുമ്‌ബോള്‍ ആദ്യം ശ്രദ്ധിക്കുന്നത് സ്ത്രീകളൊക്കെ പോയോ എന്നാണ്. ഇന്നത്തെ പോലെ ഓരോരുത്തര്‍ക്കും ഓരോ വണ്ടിയൊന്നുമില്ല. ഒന്നോ രണ്ടോ വണ്ടിയുണ്ടാകും, അംബാസഡര്‍ നോണ്‍ എസി. ചെറിയ വേഷം ചെയ്യുന്നവരെ പോലും വണ്ടിയില്‍ കയറ്റി വിട്ടിട്ടേ അവര്‍ പോകൂ. സഹപ്രവര്‍ത്തകരില്‍ തന്നെ സംരക്ഷിക്കാനുള്ള ഒരു മനസ്സും സാന്നിധ്യവുമൊക്കെ ഉണ്ടായിരുന്നു.

'ഒരുപാട് പുരുഷന്മാര്‍ നമ്മുടെ ജീവിതത്തെ സ്വാധീനിച്ചിട്ടുണ്ട്. അത് വിസ്മരിച്ചുകൊണ്ട്, ചില വ്യക്തികള്‍ ഉണ്ടാക്കിയിട്ടുള്ള വിഷമതകള്‍ മുമ്ബില്‍വച്ച് പുരുഷന്മാരെ ഒന്നടങ്കം തള്ളിപ്പറയാന്‍ സാധിക്കില്ല. കുറച്ചെങ്കിലും മാനസികമായി അകല്‍ച്ച കാണിക്കുന്നവരുണ്ടെങ്കില്‍ അവരെ കൂടി നമ്മുടെ കൂടെ ചേര്‍ക്കാന്‍ ശ്രമിക്കണം. എല്ലാ കാലത്തും നമ്മളൊന്നാണ്. ആരും നമ്മളില്‍നിന്നു പുറത്തല്ല. നമ്മള്‍ ചെയ്യുന്നത്ര സല്‍പ്രവര്‍ത്തനങ്ങള്‍ മറ്റു ഭാഷയിലെ സിനിമാ സംഘടനകളൊന്നും ചെയ്യുന്നില്ല.' നടി കൂട്ടിച്ചേര്‍ത്തു.