മലയാളത്തിൽ ഏറ്റവും കൂടുതൽ ആരാധകരുള്ള താരപുത്രിയാണ് മീനാക്ഷി ദീലിപ്. ദിലീപിന്റേയും മഞ്ജു വാര്യരുടേയും ഏക മകളായതിനാൽ തന്നെ മീനാക്ഷി സിനിമാ പ്രേമികൾക്ക് പ്രിയപ്പെട്ടവളാണ്. ഇന്ന് ഇരുപത്തിരണ്ടാം പിറന്നാൾ‌ ആഘോഷിക്കുകയാണ് മീനാക്ഷി. രാത്രി മുതൽ തന്നെ സോഷ്യൽമീഡിയ വഴി മീനാക്ഷിക്ക് ആരാധകരുടേയും പ്രിയപ്പെട്ടവരുടേയും പിറന്നാൾ ആശംസ പ്രവാഹമാണ്. നടിയും മീനാക്ഷിയുടെ സുഹൃത്തുമായ നമിത പ്രമോദ് അടക്കമുള്ളവർ ആശംസകൾ അറിയിച്ച് സോഷ്യൽമീഡിയയിൽ കുറിപ്പ് പങ്കുവെച്ചിട്ടുണ്ട്. 'നിന്റെ ഹൃദയത്തേയും ദയയേയും സൗമ്യതയേയും ഞാൻ ആരാധിക്കുന്നു. നീ നീയായിരിക്കുക... എല്ലായ്‌പ്പോഴും നിന്റെ മികച്ചതാവുക... നല്ല ആരോഗ്യവും സന്തോഷവും നേരുന്നു. ദൈവം അനുഗ്രഹിക്കട്ടെ...' എന്നാണ് മീനാക്ഷിക്കായി നമിത കുറിച്ചത്. ഒപ്പം മീനാക്ഷിയെ ചുമലിലേറ്റി നിൽക്കുന്ന ചിത്രവും നമിത പങ്കുവെച്ചു.

മീനാക്ഷിയുടെ കുട്ടിക്കാലം മുതലുള്ള ഫോട്ടോകൾ കോർത്തിണക്കിയാണ് ആരാധകർ പിറന്നാൾ ആശംസകൾ ഒരുക്കിയിരിക്കുന്നത്. കഴിഞ്ഞ വർഷവും മീനാക്ഷിക്കായി ദിലീപ് ആഘോഷമായ ബർത്ത് ഡേ പാർട്ടി നടത്തിയിരുന്നു. ദിലീപിനും കാവ്യയ്ക്കും പുറമെ മീനാക്ഷിയുടെ സുഹൃത്തുക്കളും പാർട്ടിയിൽ പങ്കെടുത്തിരുന്നു.

ഇൻസ്റ്റ​ഗ്രാമിൽ അക്കൗണ്ട് ഉണ്ടെങ്കിലും വല്ലപ്പോഴും മാത്രമാണ് മീനാക്ഷി പോസ്റ്റുകൾ പങ്കുവെക്കുന്നത്. 2020ൽ ആണ് മീനാക്ഷി സോഷ്യൽമീഡിയയിൽ അകൗണ്ട് തുറന്നത്. മൂന്ന് ലക്ഷത്തിനടുത്ത് ആരാധകരെ ചുരുങ്ങിയ സമയം കൊണ്ട് മീനാക്ഷി സ്വന്തമാക്കി. അച്ഛനേയും അമ്മയേയും പോലെ കലയോട് താൽപര്യമുള്ളയാളാണ് മീനാക്ഷിയും. തുടക്കത്തിൽ നാദിർഷയുടെ മക്കൾക്കൊപ്പവും നമിതയ്ക്കൊപ്പുമെല്ലാം അച്ഛൻ ദിലീപിന്റെ സിനിമയിലെ കോമഡി സീനുകൾക്ക് ഡബ്സ്‌മാഷ് ചെയ്ത് മീനാക്ഷി പങ്കുവെക്കാറുണ്ടായിരുന്നു. അന്ന് വലിയ പ്രശംസയും മീനാക്ഷിക്ക് ലഭിച്ചിരുന്നു. അഭിനയത്തിൽ‌ മീനാക്ഷിക്കും ഒരു കൈ നോക്കാവുന്നതാണ് എന്നാണ് അന്ന് വീഡിയോ കണ്ട് പ്രേക്ഷകരിലേറെയും കുറിച്ചത്. അഭിനയത്തിന് പുറമെ നൃത്തത്തിലും കേമിയാണ് മീനാക്ഷി. മീനാക്ഷിയുടെ കോറിയോഗ്രാഫിയെക്കുറിച്ച് നമിത പ്രമോദ് നൃത്തം ചെയ്യുന്ന വീഡിയോ വലിയ രീതിയിൽ വൈറലായിരുന്നു. കൂടാതെ പദ്മാവതിലെ ​ഗാനത്തിന് ചുവട് വെക്കുന്ന വീഡിയോയും മീനാക്ഷി തന്നെ സോഷ്യൽമീഡിയയിൽ പങ്കുവെച്ചിരുന്നു. ക്ഷണനേരം കൊണ്ടായിരുന്നു മീനാക്ഷിയുടെ ഡാൻസ് വീഡിയോ തരംഗമായി മാറിയത്. മീനാക്ഷിയുടെ സിനിമാപ്രവേശനം ആരാധകരടക്കം എല്ലാവരും കാത്തിരിക്കുകയാണ്.