ട്രാഫിക്ക് നിയമം തെറ്റിച്ചതിന് തെലുങ്ക് സിനിമാ താരം നാഗചൈതന്യയ്ക്ക് പണി കിട്ടിയിരിക്കുകയാണ്. താരം തന്റെ ടൊയോട്ട വെല്‍ഫയര്‍ കാറിന്റെ ഗ്ലാസില്‍ കറുത്ത ഫിലിം പതിപ്പിച്ചതാണ് വിനയായത്. ഇതേ തുടർന്ന് ഹൈദരാബാദില്‍ വെച്ചാണ് താരത്തിന്റെ വാഹനത്തിന് ട്രാഫിക് പോലീസ് കൈകാട്ടിയത്.

ട്രാഫിക് നിയമങ്ങള്‍ക്ക് എതിരായി താരം തന്റെ ടൊയോട്ട വെല്‍ഫയര്‍ കാറിന്റെ ഗ്ലാസില്‍ കറുത്ത ഫിലിം പതിപ്പിച്ചതിൽ പോലീസ് അദ്ദേഹത്തില്‍ നിന്ന് 700 രൂപ പിഴ ഈടാക്കി എന്നാണ് റിപ്പോര്‍ട്ടുകള്‍. പിഴ അടച്ച ശേഷമാണ് അദ്ദേഹം അവിടെ നിന്ന് പോയത് സംവിധായകൻ വെങ്കട്ട് പ്രഭുവിന്റെ സിനിമയിലാണ് നാഗചൈതന്യ അഭിനയിക്കുന്നത്. ചിത്രത്തിന്റെ ഷൂട്ടിംഗുമായി ബന്ധപ്പെട്ട് ഹൈദരാബാദിൽ തിരക്കിലാണ് താരം. ഇതിനിടയിലാണ് ട്രാഫിക് നിയമലംഘനം നടത്തിന് പോലീസ് ത‌ടഞ്ഞുനിർത്തിയത്.

മുൻപ് തെലുങ്ക് സൂപ്പർ താരം അല്ലു അർജുനും സമാന കാരണത്താൽ പിഴയൊടുക്കിയിരുന്നു. ജൂനിയർ എൻ ടി ആർ, മഞ്ചു മനോജ്, നന്ദമുരി കല്യാൺ റാം, ത്രിവിക്രം ശ്രീനിവാസ് എന്നീ തെലുങ്ക് താരങ്ങളും ട്രാഫിക് നിയമങ്ങൾ പാലിക്കാത്തതിന്റെ പേരിൽ പിഴ അടച്ചിരുന്നു.

പിതാവ് നാഗാർജുനയോടൊപ്പം അഭിനയിച്ച ബംഗരാജു എന്ന ചിത്രത്തിലാണ് നാഗചൈതന്യ അവസാനമായി പ്രേക്ഷകർക്ക് മുന്നിലെത്തിയത്. ആമീർ ഖാൻ, കരീന കപൂർ എന്നിവർ കേന്ദ്ര കഥാപാത്രങ്ങളെ അവതരിപ്പിക്കുന്ന ലാൽ സിംഗ് ചദ്ദ എന്ന ചിത്രത്തിലൂടെ ബോളിവുഡിൽ അരങ്ങേറ്റം കുറിക്കുകയാണ് നാഗചൈതന്യ. ഓഗസ്റ്റ് 11നാണ് ചിത്രം തിയേറ്ററുകളിൽ എത്തുന്നത്.

കൊവിഡ് കാരണം ചിത്രത്തിന്റെ ഷൂട്ടിംഗ് വൈകിയിരുന്നു. അമീര്‍ഖാന്‍ പ്രൊഡക്ഷന്‍സിന്റെ തന്നെ ബാനറില്‍ ഒരുങ്ങുന്ന ഈ സിനിമ സംവിധാനം ചെയ്യുന്നത്, അദ്വൈത് ചന്ദനാണ്. അമീര്‍ഖാനും അണിയറ പ്രവര്‍ത്തകര്‍ക്കും ഏറെ പ്രതീക്ഷയുള്ള ഒരു സിനിമ കൂടിയാണ് ഇത്. മാത്രമല്ല നാഗചൈതന്യയുടെ ആദ്യ ഹിന്ദി അരങ്ങേറ്റം കൂടിയായത് കൊണ്ട് ആരാധകരും വലിയ ആവേശത്തിലാണ്.