പൊതുവെ ആഢംബര വാഹനങ്ങളോട് ക്രേസുള്ളവരാണ് സിനിമാ താരങ്ങള്‍. അക്കൂട്ടത്തില്‍പെട്ടതാണ് മലയാളത്തിന്റെ പ്രിയ നായകന്‍ പൃഥ്വിയും. കാറുകളോടുള്ള ഇഷ്ടം കൊണ്ട് അദ്ദേഹം വാങ്ങിക്കൂട്ടിയിരിക്കുന്നത് നിരവധി ആഢംബരകാറുകളാണ്. ലംബോര്‍ഗിനി, റേഞ്ച് റോവര്‍, ബിഎംഡബ്ല്യു, മിനി കൂപ്പര്‍ എന്നിങ്ങനെ അഢംബരകാറുകളുടെ വലിയൊരു കളക്ഷന്‍ തന്നെ താരത്തിനുണ്ട്.

അച്ഛന്‍ സുകുമാരന്റെ വണ്ടിപ്രേമം അതുപോലെ കിട്ടിയ മകന്‍ എന്നാണ് പൃഥ്വിയെ അമ്മ മല്ലിക സുകുമാരന്‍ വിശേഷിപ്പിക്കുന്നത്.
എന്നാല്‍, പച്ചനിറത്തിലുള്ള ഒരു പഴയ അംബാസിഡര്‍ കാര്‍ അന്വേഷിക്കുകയാണ് പൃഥ്വിയിപ്പോള്‍.

അച്ഛന്‍ ആദ്യം സ്വന്തമാക്കിയ, പിന്നീട് കൈമോശം വന്നുപോയ ആ പഴയ അംബാസിഡര്‍ തിരിച്ചെടുക്കാന്‍ ആഗ്രഹിക്കുകയാണ് പൃഥ്വിയെന്ന മകന്‍. ഒരു അഭിമുഖത്തിനിടയില്‍ മല്ലിക സുകുമാരനാണ് ഇക്കാര്യം പറഞ്ഞത്.

'രാജു സുകുവേട്ടനെ പോലെയാണ്. സുകുവേട്ടന് പണ്ടേ വണ്ടി ക്രേസാണ്. ബെന്‍സ്, അംബാസിഡര്‍, മാരുതി തുടങ്ങിയ കാറുകളൊക്കെ അന്നദ്ദേഹത്തിന്റെ കയ്യിലുണ്ടായിരുന്നു. സുകുവേട്ടന്‍ ആദ്യം വാങ്ങിയ ഒരു അംബാസിഡര്‍ ഉണ്ടായിരുന്നു, അതിപ്പോള്‍ എവിടെയെങ്കിലും കിട്ടുമോ എന്നു നോക്കി രാജു നടപ്പുണ്ട്.

ഈ ഇന്റര്‍വ്യൂ കണ്ടിട്ട് ആ കാര്‍ കയ്യിലുള്ളവര്‍ പറയാണെങ്കില്‍ പറയട്ടെ. KR D 699 എന്നായിരുന്നു അതിന്റെ നമ്ബര്‍. പച്ച നിറത്തിലുള്ള ഒരു അംബാസിഡറായിരുന്നു അത്,' മല്ലിക സുകുമാരന്‍ പറയുന്നു.
'സുകുവേട്ടന്‍ ആദ്യം വാങ്ങിച്ച ആ കാര്‍ ക്ഷേത്രത്തില്‍ കൊണ്ടുപോയി പൂജിച്ചത് ഞാനാണ്. അത് കഴിഞ്ഞ് ഒരു മാസം കഴിഞ്ഞായിരുന്നു ഞങ്ങളുടെ വിവാഹം.

ഏതാ പൂജിക്കാന്‍ കൊണ്ടുവന്ന കാറെന്ന് അന്ന് ചിലരൊക്കെ ചോദിച്ചു. എനിക്ക് വളരെ വേണ്ടപ്പെട്ട ഒരാളുടേതാണെന്ന് പറഞ്ഞ് ഒപ്പിച്ച് കാര്‍ പൂജിച്ച് വന്നു.'
'സുകുചേട്ടന് ഒരു കര്‍ണാടക രജിസ്‌ട്രേഷന്‍ ബെന്‍സ് ഉണ്ടായിരുന്നു. സിഎസി 707. അത് പിന്നീട് ചെന്നൈയില്‍ കൊണ്ടുവന്ന് TS A 6565  എന്നാക്കി. ആ നമ്ബറുകളൊക്കെ എനിക്കിപ്പോഴും ഓര്‍മ്മയിലുണ്ട്. പിന്നെ മാരുതി ഇറങ്ങിയപ്പോള്‍ നാല്‍പ്പതാമത്തെ മാരുതി സ്വന്തമാക്കിയത് ഞങ്ങളാണ്. TMT 5412, എന്നായിരുന്നു അതിന്റെ നമ്ബര്‍,' മല്ലിക സുകുമാരന്‍ ഓര്‍ത്തെടുത്തു.

അച്ഛന്‍ ആദ്യമായി സ്വന്തമാക്കിയ കാറ് മകന്‍ തിരിച്ചെടുക്കാന്‍ ശ്രമിക്കുകയാണ്. അച്ഛന്റെ ഓര്‍മ്മകളെ എന്നും കണ്‍മുമ്പില്‍ നിര്‍ത്താന്‍ ശ്രമിക്കുന്ന മകന് ആ കാറ് എത്രയും പെട്ടെന്ന് കണ്ടെത്താന്‍ സാധിക്കട്ടെ. അടുത്തിടെ നടന്‍ കുഞ്ചാക്കോ ബോബന്‍ താന്‍ ആദ്യമായി അഭിനയിച്ച സിനിമയിലെ ബൈക്ക് സ്വന്തമാക്കിയത് വാര്‍ത്തകളില്‍ നിറഞ്ഞിരുന്നു.