ഒരു റിയാലിറ്റി ഷോയിലൂടെ എത്തി വളരെ പെട്ടന്ന് തന്നെ ബിഗ്‌സ്‌ക്രീനിലേയ്ക്കും മലയാളികളുടെ ഉള്ളിൽ നല്ലൊരു സ്ഥാനം പിടിച്ച നായികയാണ് വിൻസി അലോഷ്യസ്. മലയാളത്തിൽ തിളങ്ങി നിൽക്കുന്നതിനിടയിൽ ഇപ്പോഴിതാ ബോളിവുഡിലേക്ക് കാലെടുത്ത് വെക്കുകയാണ് താരം. ഷെയ്‌സൺ ഔസേപ്പ് സംവിധാനം ചെയ്യുന്ന ഫെയ്‌സ് ഓഫ് ദ് ഫെയ്‌സ്‌ലെസ് എന്ന ചിത്രത്തിൽ നായികയായാണ് താരത്തിന്റെ ബോളിവുഡ് അരങ്ങേറ്റം. ചിത്രത്തിന്റെ ടൈറ്റിൽ ലോഞ്ച് ഏപ്രിൽ 25ന് നടക്കും. മുംബെയ്, പൂനെ എന്നിവിടങ്ങളാണ് ചിത്രത്തിന്റെ ലൊക്കേഷൻ. ചിത്രത്തിൽ ഒരു മലയാളി കഥാപാത്രത്തെയാണ് വിൻസി അവതരിപ്പിക്കുന്നത്. വിവിധ ഭാഷകളിൽനിന്നുള്ള അഭിനേതാക്കൾ ചിത്രത്തിന്റെ ഭാഗമാകുന്നുണ്ട്. മലയാളത്തിൽനിന്ന് വിൻസി അലോഷ്യസ് മാത്രമാണ്. ആദിവാസി പ്രശ്നങ്ങളും ജീവചരിത്രവും ചേർന്നതാണ് ചിത്രത്തിന്റെ പ്രമേയം. മഹേഷ് റാണെ ഛായാഗ്രഹണം നിർവഹിക്കുന്നു.
വികൃതി എന്ന ചിത്രത്തിലൂടെയായിരുന്നു വിൻസി വെള്ളിത്തിരയിലേക്ക് എത്തിയത്. മലയാളത്തിലും വിൻസിയ്ക്ക് കൈനിറയെ അവസരങ്ങളാണ് വിൻസിക്ക്. നിവിൻ പോളി ചിത്രം കനകം കാമിനി കലഹത്തിൽ ഹോട്ടൽ റിസപ്‌ഷനിസ്റ്റിന്റെ വേഷം അവതരിപ്പിച്ച വിൻസി കുഞ്ചാക്കോ ബോബൻ ചിത്രം ഭീമന്റെ വഴിയിൽ ശ്രദ്ധേയ കഥാപാത്രമായി തിളങ്ങി. ഭീമന്റെ വഴിയാണ് വിൻസിയുടേതായി അവസാനം തിയേറ്ററിൽ എത്തിയ ചിത്രം. ഡിജോ ജോസ് ആന്റണി സംവിധാനം ചെയ്ത പൃഥ്വിരാജ് - സുരാജ് വെഞ്ഞാറമൂട് ചിത്രം ജനഗണമന ആണ് റിലീസിന് ഒരുങ്ങുന്ന ചിത്രം. ലാൽ ജോസ് സംവിധാനം ചെയ്ത സോളമന്റെ തേനീച്ചകൾ ആണ് വിൻസി പൂർത്തിയാക്കിയ ചിത്രം. തിങ്കളാഴ്ച നിശ്ചയത്തിനുശേഷം സെന്ന ഹെഗ്‌ഡെ സംവിധാനം ചെയ്ത 1744 വൈറ്റ് ആൾട്ടോ എന്ന ചിത്രത്തിലും വിൻസി നായികയായി എത്തുന്നു.ഷറഫുദ്ദീനാണ് നായകൻ.