വളരെ പെട്ടന്നായിരുന്നു മലയാളികളുടെ ഉള്ളിൽ മീരാജാസ്മിൻ ഇടംപിടിച്ചത്. സൂത്രധാരൻ എന്ന ആദ്യ ചിത്രത്തിലൂടെ തന്നെ മലയാള സിനിമയിൽ തന്റേതായുള്ള സ്ഥാനം ഉറപ്പിക്കാൻ മീരയ്ക്ക് കഴിഞ്ഞു. വിവാഹത്തിന് പിന്നാലെ നീണ്ട ആറ് വർഷത്തെ ഇടവേളയ്ക്ക് ശേഷം സത്യൻ അന്തിക്കാട് സംവിധാനം നിർവഹിച്ച 'മകൾ' എന്ന ചിത്രത്തിലൂടെ മലയാള സിനിമയിൽ വീണ്ടും നിറസാന്നിദ്ധ്യമാകാൻ ഒരുങ്ങുകയാണ് താരം. തനിക്ക് 90വയസ് വരെ സിനിമയിൽ അഭിനയിക്കാൻ താൽപ്പര്യമുണ്ടെന്നാണ് താരം അടുത്തിടെ ഒരു അഭിമുഖത്തിൽ പറഞ്ഞിരിക്കുന്നത്. എന്നാൽ ചിത്രത്തിന്റെ കഥ കേട്ട് നൂറ് ശതമാനം ഇഷ്ടപ്പെട്ടാൽ മാത്രമേ ചെയ്യുകയുള്ലൂ എന്നും മീര പറയുന്നു. ഒരു യൂട്യൂബ് ചാനലിന് നൽകിയ അഭിമുഖത്തിലാണ് താരം മനസ് തുറന്നത്. ഇപ്പോൾ നിരവധിപേർ കഥകളുമായി സമീപിക്കുന്നുണ്ട് . പറ്റുമെന്ന് തോന്നുന്നവ മാത്രമേ തിരഞ്ഞെടുക്കുകയുള്ളൂ എന്നും താരം പറഞ്ഞു. മീരയുടെ തിരിച്ചുവരവിൽ ഏറ്റവും ചർച്ചയായത് മേക്കോവർ തന്നെയാണ്. താരത്തിന്റെ ഇൻസ്റ്റാഗ്രാമിൽ പോസ്റ്റ് ചെയ്യുന്ന ചിത്രങ്ങളും ചർച്ചാ വിഷയമായിരുന്നു. പഴയ മീരയല്ല ഇപ്പോൾ കൂടുതൽ സ്റ്റൈലിഷായി എന്നാണ് ആരാധകർ അഭിപ്രായപ്പെടുന്നത്.'പണ്ട് ശ്രദ്ധിക്കാത്ത കാര്യങ്ങളെല്ലാം മനസിലാക്കിക്കൊണ്ടാണ് ഇപ്പോൾ തിരിച്ചുവന്നിരിക്കുന്നത്. അന്ന് ആളുകളെ അഭിമുഖീകരിക്കുന്നത് തന്നെ വളരെ ബുദ്ധിമുട്ടുള്ല കാര്യമായിരുന്നു. അതിനാൽ പലപ്പോഴും അവാർഡ് വാങ്ങാൻ പോലും പോയിരുന്നില്ല. പോയാൽ തന്നെ ഒരു പൊട്ട് വയ്ക്കും കൂടെ ഏതെങ്കിലും പഴയ ചുരിദാറും ഇടും, ഒരിക്കൽ കീറിയ ചുരിദാറാണ് അവാർഡ് വാങ്ങാൻ പോയപ്പോൾ ധരിച്ചിരുന്നത്. എനിക്കതായിരുന്നു കൂടുതൽ കംഫർട്ടബിൾ. എന്നാൽ ഇപ്പോൾ അങ്ങനെയല്ല, എല്ലാ കാര്യത്തിലും ശ്രദ്ധിക്കാറുണ്ടെന്നും മീര പറയുന്നു.