ഇന്ത്യന്‍ ബോക്‌സ് ഓഫീസില്‍ പുതിയ ചലനങ്ങള്‍ സൃഷ്ടിച്ച് മുന്നേറുകയാണ് കന്നഡ ചിത്രമായ കെജി.എഫ്: ചാപ്റ്റര്‍ 2. ഇന്ത്യയില്‍ ഏറ്റവും കൂടുതല്‍ കളക്ഷന്‍ നേടുന്ന ചിത്രങ്ങളുടെ പട്ടികയില്‍ ഏഴാമതെത്തിയിരിക്കുകയാണ് കെ.ജി.എഫ്. രാജമൗലിയുടെ ആര്‍.ആര്‍.ആര്‍ ആണ് കെ.ജി.എഫിന് മുന്‍പ് ഈ വര്‍ഷം ബോക്‌സ് ഓഫീസില്‍ വന്‍ ചലനം സൃഷ്ടിച്ചത്. 1.091.9 കോടിയാണ് ആര്‍ആര്‍ ഇതുവരെ നേടിയത്. കെ.ജി.എഫിന്റെ ഹിന്ദി പതിപ്പ് 250 കോടിയും കടന്നു. റിലീസ് ചെയ്ത് ഒരാഴ്ചയ്ക്കുള്ളിലാണ് ഈ റെക്കോഡ് നേട്ടം. ഇപ്പോഴിതാ ചിത്രത്തെ ആരാധകർ ഏറ്റെടുത്തതിൽ നന്ദിയറിയിക്കുകയാണ് പ്രതിനായകകഥാപാത്രത്തെ അവതരിപ്പിച്ച സഞ്ജയ് ദത്ത്. കെ ജി എഫ്2 എന്ന ചിത്രം തനിക്കെത്രമാത്രം വിലയേറിയതാണെന്ന് ആരാധകരോട് പങ്കുവയ്ക്കുകയായിരുന്നു സഞ്ജയ് ദത്ത്. തന്റെ കഴിവ് തിരിച്ചറിയാൻ ചിത്രം സഹായിച്ചു. സുഖസൗകര്യങ്ങളിൽ നിന്ന് പുറത്തുകടക്കാൻ സഹായിക്കുന്ന ചിത്രത്തിനായി താൻ തിരയാറുണ്ട്. അത്തരത്തിലെ ചിത്രമാണ് കെ ജി എഫ്2. താരം കുറിച്ചു. ഒരു സിനിമ എങ്ങനെയാണ് അഭിനിവേശമായി മാറുന്നതെന്ന് ചിത്രം കാണിച്ചുതന്നു. തന്റെ കഥാപാത്രത്തിന്റെ വിജയത്തിന് മുഴുവൻ അംഗീകാരങ്ങളും നൽകേണ്ടത് ചിത്രത്തിന്റെ സംവിധായകനായ പ്രശാന്ത് നീലിനാണ്. ജീവിതം ഓരോ തവണയും അപ്രതീക്ഷിത സംഭവങ്ങളുമായി മുന്നിലെത്തുമ്പോൾ സ്വന്തം കഴിവനുസരിച്ച് അത് മികച്ചതാക്കാൻ ശ്രമിക്കണമെന്നുള്ള ഓർമ്മപ്പെടുത്തൽ കൂടിയാണീ ചിത്രമെന്നും താരം കുറിച്ചു. ആരാധകർക്കും കുടുംബത്തിനും നന്ദി അറിയിച്ചുകൊണ്ടാണ് താരം തന്റെ കുറിപ്പ് അവസാനിപ്പിക്കുന്നത്. ഇൻസ്റ്റാഗ്രാമിലായിരുന്നു താരം കുറിപ്പ് പങ്കുവച്ചത്.