മലയാള സിനിമയെ ഒന്നടങ്കം ഞെട്ടിച്ച മറ്റൊരു സംഭവം തന്നെയായിരുന്നു വിജയ്ബാബുവിന്റെ പുറത്ത് വന്ന ക്രൂരമായ പീഡനം. ഇപ്പോഴിതാ വിജയ് ബാബുവിനെതിരെ പരാതി നൽകിയ യുവനടിക്ക് പിന്തുണയുമായി റിമ കല്ലിങ്കൽ. സിനിമാ മേഖലയിലെ ഒരാൾ ആദ്യമായിട്ടാണ് പരാതിക്കാരിക്ക് പരസ്യ പിന്തുണ നൽകി രംഗത്തെത്തുന്നത്. സിനിമാ മേഖലയിലെ വനിതകളുടെ സംഘടനയായ വിമൺ ഇൻ സിനിമ കലക്ടീവ് വിജയ് ബാബുവിനെതിരെ നടപടിയെടുക്കണമെന്നാവശ്യപ്പെട്ടിരുന്നു. ഈ പോസ്റ്റ് 'അവൾക്കൊപ്പം' എന്ന അടിക്കുറിപ്പോടെ ഇൻസ്റ്റഗ്രാമിൽ ഷെയർ ചെയ്താണ് നടി പിന്തുണയറിയിച്ചത്. 'ഊള ബാബുവിനെ പോലെയാകരുത്' എന്ന അടിക്കുറിപ്പോടെ നിരവധി മീമുകൾ സോഷ്യൽ മീഡിയയിൽ പ്രചരിക്കുന്നുണ്ട്. ഇതും റിമ കല്ലിങ്കൽ ഷെയർ ചെയ്തിട്ടുണ്ട്. 'ഊള ബാബു അതിജീവിതയോട് സ്വഭാവ സർട്ടിഫിക്കറ്റ് ചോദിക്കുന്നു. നിങ്ങൾ ഊള ബാബുവിനെ പോലെയാകരുത്' എന്ന കാർട്ടൂൺ പോസ്റ്ററാണ് റിമ പങ്കുവച്ചത്.

അതേസമയം വിജയ് ബാബു ഹൈക്കോടതിയിൽ മുൻകൂർ ജാമ്യാപേക്ഷ നൽകി. ബ്ലാക്ക് മെയിലിംഗ് നടത്താനാണ് പരാതിക്കാരിയുടെ ശ്രമമെന്നാണ് ഹർജിയിൽ പറയുന്നത്. സമൂഹത്തിൽ ഉന്നത സ്ഥാനത്തിരിക്കുന്ന ആളുകളെ മീ ടൂ ആരോപണങ്ങൾ ഉന്നയിച്ച് അപമാനിക്കുവാൻ ശ്രമിക്കുകയെന്നത് ഒരു ഫാഷൻ ആയി മാറിയിരിക്കുകയാണ്. അത്തരത്തിലൊരു ശ്രമമാണ് പരാതിക്കാരിയുടെ നീക്കത്തിന് പിന്നിലുള്ളത്. താൻ ബലാത്സംഗം ചെയ്തിട്ടില്ലെന്നും അപകീർത്തി പെടുത്തുക എന്നതാണ് പരാതിക്കാരുടെ ഉദ്ദേശമെന്നും ഹർജിയിൽ പറയുന്നു. കോടതി ഇന്ന് തന്നെ ഹർജി പരിഗണിച്ചേക്കാനാണ് സാധ്യത.