വലിമൈയ്ക്ക് ശേഷം അജിത്തും എച്ച് വിനോദും വീണ്ടും ഒന്നിക്കുന്ന എ കെ 61 ൽ നായികയായെത്തുന്നത് മലയാളത്തിന്റെ സൂപ്പർസ്റ്റാ‌ർ മഞ്ജു വാര്യർ ആണെന്ന് റിപ്പോർട്ടുകൾ. കുറച്ചു ദിവസങ്ങൾക്കുള്ളിൽ നടി ചിത്രത്തിൽ ജോയിൻ ചെയ്യുമെന്നാണ് ലഭിക്കുന്ന വിവരങ്ങൾ. എഴുത്തുകാരനായ ശ്രീധർ പിള്ള ട്വിറ്ററിലൂടെ മഞ്ജു വാര്യർ എ കെ 61 ൽ സെെൻ ചെയ്‌തുവെന്ന് സ്ഥിരീകരിച്ചിട്ടുണ്ട്.

എന്നാൽ ഇക്കാര്യത്തിൽ അണിയറപ്രവർത്തകരുടെ ഭാഗത്ത് നിന്നും ഔദ്യാ​ഗിക വിശദീകരണങ്ങൾ ഒന്നും വന്നിട്ടില്ല. റിപ്പോർട്ടുകൾ ശരിയായാൽ അസുരന് ശേഷം മഞ്ജു വാര്യര്‍ അഭിനയിക്കുന്ന തമിഴ് ചിത്രമാകും ഇത്. ബോണി കപൂർ നിര്‍മിക്കുന്ന എ.കെ 61ന്റെ ഷൂട്ടിം​ഗ് ഹൈദരാബാദിൽ പുരോ​ഗമിക്കുകയാണ്.

അജിത്തിന്റെ 61-ാം ചിത്രത്തിന് ഇതുവരെ പേരിട്ടിട്ടില്ല. മോഹൻലാലും എ.കെ 61 ന്റെ ഭാഗമാകുമെന്ന് നേരത്തെ സംസാരമുയർന്നിരിന്നു. മരയ്ക്കാറിന്റെ ലൊക്കേഷനിൽ അജിത്ത് എത്തിയത് ഈ ചർച്ചകളുടെ പ്രാധാന്യം വർദ്ധിപ്പിച്ചു. അജിത്തിനൊപ്പം മോഹൻലാൽ എത്തുമോ എന്നതിലും ഔദ്യോഗിക പ്രഖ്യാപനം വന്നിട്ടില്ല.