മലയാളികളുടെ ഇഷ്ട താരമാണ് നവ്യ നായർ. നന്ദനം സിനിമ ആരും തന്നെ മറക്കാനിടയില്ല. ആ ഒരൊറ്റ സിനിമയിലൂടെ നവ്യ വലിയൊരു സ്ഥാനം നേടിയെടുക്കുകയായിരുന്നു. കഴിഞ്ഞ ദിവസമായിരുന്നു ഫിലിം ഇൻസ്റ്റിറ്റ്യൂട്ട് ചലച്ചിത്ര അവാർഡിൽ മികച്ച നടിക്കുള്ള പുരസ്‌കാരം താരം ഏറ്റു വാങ്ങിയത്. എന്നാൽ പത്തനാപുരം ഗാന്ധിഭവനിലെ ആ പരിപാടിയിൽ സംസാരിക്കുന്നതിനിടെ നവ്യയുടെ ശബ്ദമിടറി. ഗാന്ധിഭവനിൽ നടൻ ടി പി മാധവനെ കണ്ടതോടെയാണ് നവ്യ വികാരാധീനയായത്. അവാർഡ് വാങ്ങിയ ശേഷം നവ്യ പറഞ്ഞത് ഇങ്ങനെയായിരുന്നു. 'ഇവിടെ വന്നപ്പോൾ തന്നെ ടി പി മാധവൻ ചേട്ടനെ കണ്ടു. കല്യാണരാമനും, ചതിക്കാത്ത ചന്തുവുമൊക്കെ ഞങ്ങൾ ഒന്നിച്ചഭിനയിച്ച സിനിമകളായിരുന്നു.

അദ്ദേഹം ഇവിടെയായിരുന്നെന്ന കാര്യം എനിക്കറിയില്ലായിരുന്നു. പെട്ടെന്ന് കണ്ടപ്പോൾ വലിയൊരു ഷോക്കായിരുന്നു. ഗാന്ധിഭവനിൽ വന്ന് ഇവിടെ താമസിക്കുന്നവരെയൊക്കെ നേരിൽ കാണണമെന്ന് ആഗ്രഹിച്ചതാണ്. പരിപാടിയുടെ സമയത്തേ എനിക്ക് എത്താൻ കഴിഞ്ഞുള്ളൂ. അതുകൊണ്ടുതന്നെ ഉള്ളിൽ പോയി എനിക്ക് ആരെയും കാണാൻ സാധിച്ചില്ല. പക്ഷേ ഇവിടെ വന്നപ്പോൾ തന്നെ ഞാൻ ടി പി മാധവൻ ചേട്ടനെ കണ്ടു. അദ്ദേഹത്തെ കണ്ടപ്പോൾ എന്റെ കണ്ണൊക്കെ നിറഞ്ഞു. നമ്മുടെയൊന്നും കാര്യം പറയാൻ പറ്റില്ല എന്നുള്ളത് എത്ര സത്യമാണെന്ന് എനിക്ക് തോന്നിപ്പോയെന്നും നവ്യ നായർ പറഞ്ഞു.