മമ്മൂട്ടിക്കൊപ്പമുള്ള ചിത്രങ്ങളോടൊപ്പം മീര പങ്കുവെച്ച കുറിപ്പ് കണ്ടോ? നന്ദി മമ്മൂക്ക, എന്റെ ദീപ്തിക്ക് നാഥൻ ആയതിന്... കുറിപ്പ് ഏറ്റെടുത്ത് ആരാധകർ
മലയാളികളുടെ ഇഷ്ടതാരമാണ് മീരാജാസ്മിൻ. വിവാഹത്തിന് ശേഷം സിനിമയിൽ നിന്നും പിൻമാറിയ താരം വർഷങ്ങൾക്ക് ശേഷം സിനിമയിലേക്ക് വീണ്ടും തിരിച്ചെത്തുന്നതിന്റെ സന്തോഷവും ആരാധകർക്ക് ഉണ്ട്. ആറു വർഷത്തെ നീണ്ട ഇടവേളയ്ക്കുശേഷമാണ് ആ തിരിച്ച് വരവ്. സത്യൻ അന്തിക്കാട് സംവിധാനം ചെയ്യുന്ന ‘മകൾ’ എന്ന ചിത്രത്തിലൂടെയാണ് മീര മടങ്ങിയെത്തിയത്.
ഇപ്പോഴിതാ നടൻ മമ്മൂട്ടിക്ക് നന്ദിയറിയിച്ച് എത്തിയിരിക്കുകയാണ് മീരാ ജാസ്മിൻ. ഇരുവരുമൊന്നിച്ച് അഭിനയിച്ച ശ്യാമപ്രസാദ് ചിത്രം ഒരേ കടൽ എന്ന ചിത്രത്തെക്കുറിച്ചുള്ള ഹൃദ്യമായ കുറിപ്പും മീര പങ്കുവച്ചിട്ടുണ്ട്. സുനിൽ ഗംഗോപാധ്യായയുടെ ഹിരക് ദീപ്തി എന്ന ബംഗാളി നോവലിന്റെ ചലച്ചിത്രാവിഷ്കാരം കൂടിയായിരുന്നു ഒരേ കടൽ. ഇൻസ്റ്റഗ്രാമിലൂടെയാണ് താരത്തിന്റെ പ്രതികരണം. സിനിമയുമായി ബന്ധപ്പെട്ട ചിത്രങ്ങളും താരം പങ്കുവച്ചിട്ടുണ്ട്. മമ്മൂക്ക എന്ന നടന്റെ അതുല്യമായ വൈദഗ്ധ്യത്തിന് സാക്ഷ്യം വഹിക്കാൻ തനിക്ക് അവസരമൊരുക്കിയ ചിത്രമാണ് ഒരേ കടലെന്ന് മീരാ ജാസ്മിൻ കുറിച്ചു. മമ്മൂട്ടിയുടെ മഹത്തായ കരിയറിലെ ഏറ്റവും മികച്ചതും കാലാതീതവുമായ പ്രകടനങ്ങളിലൊന്നാണ് ഈ സിനിമയിലേതെന്നും മീര പറഞ്ഞു. നന്ദി മമ്മൂക്ക, എന്റെ ദീപ്തിക്ക് നാഥൻ ആയതിന് എന്നും മീര കുറിച്ചു. 2007-ൽ പുറത്തിറങ്ങിയ ഒരേ കടൽ ഏറെ ശ്രദ്ധിക്കപ്പെട്ടിരുന്നു. ചിത്രത്തിലൂടെ ഔസേപ്പച്ചന് മികച്ച സംഗീതസംവിധായകനുള്ള ദേശീയ പുരസ്കാരവും ലഭിച്ചിരുന്നു. മമ്മൂട്ടിക്കും മീരാ ജാസ്മിനും പുറമെ നരേൻ, രമ്യാ കൃഷ്ണൻ എന്നിവരും ചിത്രത്തിൽ പ്രധാന കഥാപാത്രത്തെ അവതരിപ്പിച്ചിരുന്നു. അതേസമയം കുറേക്കൂടി ഫാഷണബിളായ മീരയെ ആണ് ഇപ്പോൾ രണ്ടാം വരവിൽ കാണാനാവുന്നത്. അടുത്തിടെ താരം പങ്കുവെച്ച ഫോട്ടോഷൂട്ട് ചിത്രങ്ങളും വൈറലായിരുന്നു.
https://www.facebook.com/Malayalivartha