കാന്‍ ചലച്ചിത്രമേളയില്‍ തിളങ്ങി തെന്നിന്ത്യന്‍ താര സുന്ദരി തമന്ന
എഴുപത്തിയഞ്ചാമത് കാന്‍ ചലച്ചിത്രമേളയ്ക്ക് തിരി തെളിഞ്ഞപ്പോള്‍ മേളയില്‍ തിളങ്ങി ഇന്ത്യന്‍ താരങ്ങളും. ഇന്‍ഫോര്‍മേഷന്‍ ആന്‍ഡ് ബ്രോഡ്കാസ്റ്റിങ് വകുപ്പ് മന്ത്രി അനുരാഗ് താക്കൂറിന്റെ നേതൃത്വത്തിലുള്ള ഇന്ത്യന്‍ പ്രതിനിധി സംഘത്തിനൊപ്പം എത്തിയ തെന്നിന്ത്യന്‍ താര സുന്ദരി തമന്നയുടെ ചിത്രങ്ങള്‍ ശ്രദ്ധ നേടുകയാണ്.
ഒരു മോണോക്രോം ഗൗണാണ് തമന്ന ധരിച്ചത്. തമന്നയുടെ വസ്ത്രം ഡിസൈന്‍ ചെയ്തിരിക്കുന്നത് ഷാലീന നഥാനിയാണ് . പത്ത് ദിവസം നീളുന്ന മേളയില്‍ നിരവധി രാജ്യങ്ങളില്‍ നിന്നുള്ള സിനിമകള്‍ പ്രദര്‍ശിപ്പിക്കും. മികച്ചത് തെരഞ്ഞെടുക്കാന്‍ പതിവുപോലെ ഡൊമേയ്‌റു മാളികയില്‍ജൂറി ചേരുമ്പോള്‍ ഇക്കുറി ഒപ്പം ദീപിക പദുക്കോണുമുണ്ടാകും.
ഫ്രഞ്ച് നടനും ചലച്ചിത്രകാരനുമായ വിന്‍സെന്റ് ലിന്‍ഡന്‍ ആണ് ജൂറി പ്രസിഡന്റ്, മികച്ച വിദേശഭാഷാ ചിത്രത്തിനുള്ള ഓസ്‌കര്‍ രണ്ട് വട്ടം നേടിയ കാന്‍ മേളയില്‍ രണ്ട് വട്ടം പുരസ്‌കാരസമ്മാനിതനായ ഇറാനിയന്‍ സംവിധായകന്‍ അഷ്ഗര്‍ ഫര്‍ഹാദിയാണ് ജൂറിയിലെ പ്രമുഖന്‍. സ്വീഡന്‍, അമേരിക്ക, നോര്‍വെ, ഇറ്റലി, ഇംഗ്ലണ്ട് സിനിമാമേഖലകളുടെ പ്രതിനിധികള്‍ കൂടി ഉള്‍പെടുന്നതാണ് ജൂറി.
ഇക്കുറി ഹോളിവുഡിന്റെ ഏറ്റവും ജനപ്രിയമുള്ള താരങ്ങളിലൊരാള്‍ ടോം ക്രൂസ് ആണ്. മേളയുടെ പോസ്റ്റര്‍ 98ല്‍ പുറത്തിറങ്ങിയ 'ദ ട്രൂമാന്‍ ഷോ'ക്കുള്ള ആദരമാണ്. ഇന്ത്യയാണ് Marché du Film 2022ലെ കണ്‍ട്രി ഓഫ് ഓണര്‍. ഇങ്ങനെയൊരു അംഗീകാരം ലഭിക്കുന്ന ആദ്യരാജ്യവും ഇന്ത്യ തന്നെയാണ്.
സ്‌പെഷ്യല്‍ സ്‌ക്രീനിങ് വിഭാഗത്തില്‍ ഷൗനക് സെന്‍ സംവിധാനം ചെയ്ത 'ഓള്‍ ദാറ്റ് ബ്രെത്‌സ്' എന്ന ഹിന്ദി ഡോക്യുമെന്റന്റി പ്രദര്‍ശിപ്പിക്കും. ക്ലാസിക് വിഭാഗത്തില്‍ ഇന്ത്യയുടെ ഇതിഹാസ ചലച്ചിത്രകാരന്‍ സത്യജിത് റേയുടെ 'പ്രതിധ്വന്തി'യുടെ ഡിജിറ്റലി പരിഷ്‌കരിച്ചെടുത്ത പതിപ്പ് പ്രദര്‍ശിപ്പിക്കുന്നുണ്ട്. മലയാളസിനിമയുടെ അഭിമാനമായ ജി അരവിന്ദന്റെ 'തമ്പും' ഇതേ വിഭാഗത്തില്‍ പ്രദര്‍ശിപ്പിക്കുന്നുണ്ട്.
പല ഭാഷകളിലുള്ള ആറ് ഇന്ത്യന്‍ സിനിമകളും കാനില്‍ പ്രദര്‍ശിപ്പിക്കുന്നുണ്ട്.. ടൈറ്റില്‍ കഥാപാത്രത്തെ അവതരിപ്പിക്കുന്ന ആര്‍ മാധവന്‍ തന്നെ സംവിധാനം ചെയ്യുന്ന 'റോക്കട്രി : ദ നമ്പി ഇഫക്റ്റ്‌സിന്റെ' ആദ്യ പ്രദര്‍ശനം കാനിലാണ്. ജയരാജ് സംവിധാനം ചെയ്യുന്ന 'നിറയെ തത്തകളുള്ള മരം' , അചല്‍ മിശ്രയുടെ 'ധ്വുയ്ന്‍' , ബിശ്വജിത് ബോറയുടെ 'ബൂംബ റൈഡ്' , ശങ്കര്‍ ശ്രീകുമാറിന്റെ 'ആല്‍ഫ ബീറ്റ ഗാമ' , നിഖില്‍ മഹാജന്റെ 'ഗോദാവരി' എന്നിവയും കാനില്‍ ഇന്ത്യന്‍ പ്രാതിനിധ്യമാകും.
https://www.facebook.com/Malayalivartha
