മലയാള സിനിമയുടെ മെ​ഗാ സൂപ്പർ സ്റ്റാറായ മോഹൻലാൽ അഭിനയത്തിൽ മാത്രമല്ല സംവിധാന രം​ഗത്തേക്കും കടന്നിരിക്കുകയാണ്.ബറോസ് എന്ന ചിത്രത്തിന് വേണ്ടിയാണ് താരം സംവിധാനം ഒരുക്കുന്നത്. മലയാള സിനിമ  പ്രേക്ഷകരും ഏറെ പ്രതീക്ഷയോടെ കാത്തിരിക്കുന്ന ചിത്രത്തെക്കുറിച്ച് താരം പറഞ്ഞ കാര്യങ്ങൾ ശ്രദ്ധ നേടുകയാണ്.

ഒരു ത്രീഡി ചിത്രം ആണ് ഇത് എന്ന മോഹൻലാൽ വെളിപ്പെടുത്തുന്നു. ഇൻറർനാഷണൽ പ്ലാറ്റ്ഫോമിലാണ് ചിത്രം അവതരിപ്പിക്കാൻ പോകുന്നത്. അതിനുള്ള ഭാഗ്യം തനിക്ക് ഉണ്ടാവട്ടെ. നിങ്ങളുടെ പ്രാർത്ഥന വേണം. അസാധാരണമായ ഒരു സിനിമയായിരിക്കും ഇത്. വലിയ സിനിമയായിട്ടെ ഇത് ഇറക്കുക്കയുള്ളൂ എന്നും താരം പറയുന്നു.

വാസ്കോഡഗാമ യുടെ നിധി സൂക്ഷിപ്പുകാരനായ ബറോസ് എന്ന ഭൂതത്തിൻ്റെ കഥയാണ് ചിത്രം പറയുന്നത്. നിധി തേടി ഒരു കുട്ടി ഭൂതത്തിൻ്റെ മുന്നിൽ എത്തുന്നതാണ് കഥാതന്തു. ഒരു പ്രശസ്ത നോവൽ ആസ്പദമാക്കിയാണ് ചിത്രം ഒരുക്കുന്നത്. ഗാർഡിയൻ ഓഫ് ദി ഗമസ് ട്രഷർ എന്നാണ് നോവലിൻറെ പേര്.

പോർച്ചുഗീസ് പശ്ചാത്തലത്തിൽ എഴുതപ്പെട്ട ഒരു കഥയാണ് ഇത്. ചില സ്പാനിഷ് താരങ്ങളും ചിത്രത്തിലഭിനയിക്കുന്നുണ്ട്. പാസ് വേഗ, റാഫേൽ അമർഗോ എന്നിവർ ആണ് വിദേശ അഭിനേതാക്കളിൽ പ്രമുഖർ. ജിജോ പുന്നൂസ് ആണ് ചിത്രത്തിന് തിരക്കഥയൊരുക്കുന്നത്. ചിത്രത്തിന് ഛായാഗ്രഹണം നിർവഹിക്കുന്നത് സന്തോഷ് ശിവനാണ്.

ചിത്രം സംവിധാനം ചെയ്യുന്നതിനെപ്പറ്റി താരം നേരത്തെ പറഞ്ഞിട്ടുണ്ട്. 2019 ഏപ്രിലില്‍ പ്രഖ്യാപിക്കപ്പെട്ട ചിത്രത്തിന്‍റെ ഒഫിഷ്യല്‍ ലോഞ്ച് കഴിഞ്ഞ വര്‍ഷം മാര്‍ച്ച് 24നായിരുന്നു. ചിത്രത്തിൽ ടൈറ്റിൽ കഥാപാത്രമായി എത്തുന്നതും മോഹൻലാൽ തന്നെ. ഒരു ഭൂതമാണ് ബറോസ്.

മറ്റൊരു ചിത്രത്തിലും കാണാത്ത തരത്തിലുള്ള ഗെറ്റപ്പിലാണ് മോഹൻലാൽ ഈ കഥാപാത്രമായി എത്തുന്നത്. ആരാധകർക്കുള്ള പുതുവർഷ സമ്മാനമായി പുറത്തുവിട്ട ഫസ്റ്റ്ലുക്ക് വൈറൽ ആയിരുന്നു.ആശിർവാദ് സിനിമാസാണ് 'ബറോസ്' നിർമ്മിക്കുന്നത്. പൃഥ്വിരാജും ചിത്രത്തില്‍ ഒരു പ്രധാന കഥാപാത്രമായി എത്തുന്നുണ്ട്.