മലയാളികളുടെ ഇഷ്ട താരമാണ് ജയസൂര്യ. തന്റെ വിശേഷങ്ങൾ എല്ലാം തന്നെ ആരാധകർക്കായി താരം സോഷ്യൽമീഡിയയിൽ പങ്കുവെക്കാറുണ്ട്. ഇപ്പോഴിതാ അത്തരത്തിൽ വൈറലായി മാറുകയാണ് ഒരു വീഡിയോ. ജയസൂര്യ തന്റെ ആരാധികയെ ഞെട്ടിച്ചുകൊണ്ട് നൽകിയ ഒരു സർപ്രൈസ് സമ്മാനമാണ് ഈ വൈറൽ വീഡിയോ. പനമ്പള്ളിനഗറിലെ ടോണി ആൻഡ് ഗൈ എന്ന സ്ഥാപനത്തിലെ ജീവനക്കാരിയായ പുഷ്പയ്ക്കാണ് ജയസൂര്യയുടെ സ്നേഹ സമ്മാനം. ജയസൂര്യയെ ഒരു നോക്ക് കാണാൻ കാത്തിരുന്ന പുഷ്പയ്ക്ക് ഇരട്ടിമധുരമാണ് പകരമായി താരം നൽകിയത്.

ഒന്ന് നേരിൽ മാത്രം കാണാൻ ആഗ്രഹിച്ച പുഷ്പ ജയസൂര്യയ്‌ക്കൊപ്പം ചിത്രം എടുത്തിരുന്നു. എന്നാൽ ചിത്രം വീട്ടിലുള്ളവരെ കാണിക്കുവാൻ തന്റെ കയ്യിൽ ഫോൺ ഇല്ലന്നറിഞ്ഞ താരം ചിത്രം ഫ്രയിം ചെയ്ത് ആരാധികയ്ക്ക് സമ്മാനിക്കുകയായിരുന്നു. പനമ്പള്ളിനഗറിലെ ടോണി ആൻഡ് ഗൈ കടയിലെ ഹൗസ്ക്ലീനിങ് സ്റ്റാഫ് ആണ് പുഷ്പ. സെൽഫി താൻ പോലും അറിയാതെയാണ് താരത്തിന്റെ അസിസ്റ്റന്റിനെ വിട്ട് അപ്പോൾ തന്നെ ഫ്രെയിമിലാക്കി നൽകിയത്. പുഷ്പയ്ക്ക് സർപ്രൈസ് നൽകുന്ന വീഡിയോയും ഇരുവരുടെയും ചിത്രവും സ്ഥാപനം തങ്ങളുടെ ഔദ്യോഗിക ഇൻസ്റ്റാഗ്രാം പേജിലൂടെ പങ്കുവച്ചിരുന്നു. അദ്ദേഹത്തിന്റെ കാരുണ്യപ്രവൃത്തികളാണ് അദ്ദേഹത്തെ ഓഫ്‌സ്‌ക്രീനിലും നായകനാക്കി മാറ്റുന്നത്. ഞങ്ങളുടെ സ്ഥാപനത്തിലെ പുഷ്പ ചേച്ചിയുടെ മുഖത്ത് ആ വലിയ ചിരി സമ്മാനിച്ചുകൊണ്ട് അവർക്ക് മികച്ച ദിവസം നൽകിയതിന് ജയസൂര്യയ്ക്ക് നന്ദി പറയുന്നു എന്നാണ് വീഡിയോ പങ്കുവച്ചുകൊണ്ട് സ്ഥാപനം കുറിച്ചത്.