ഹോളിവുഡ് ചിത്രം 'ദി ഗ്രേ മാനി'ലെ ധനുഷിന്റെ ഫസ്റ്റ് ലുക്ക് പോസ്റ്റര്‍ പുറത്തുവിട്ട് നെറ്റ്ഫ്‌ലിക്‌സ്. ധനുഷിനൊപ്പം റയാന്‍ ഗോസ്ലിങ്, ക്രിസ് ഇവാന്‍സ്, അനാ ഡെ അര്‍മാസ് എന്നിവരുടെ ഫസ്റ്റ് ലുക്ക് പോസ്റ്ററുകളും പുറത്തുവിട്ടിട്ടുണ്ട്. ഇന്ന് ചിത്രത്തിന്റെ ട്രെയ്‌ലര്‍ പുറത്തിറങ്ങുമെന്നും ഫസ്റ്റ് ലുക്കുകള്‍ പങ്കുവെച്ചുകൊണ്ട് നെറ്റ്ഫ്‌ലിക്‌സ് അറിയിച്ചു. സ്പൈ ത്രില്ലറായി ഒരുങ്ങിയിരിക്കുന്ന ചിത്രം ജൂലൈ 22-ന് നെറ്റ്ഫ്ളിക്സ് വഴി പ്രേക്ഷകരിലേക്കെത്തും.

എന്നാൽ സിനിമയുടെ അണിയറപ്രവർത്തകർ പിടിച്ച പൊല്ലാപ്പ് വാർത്തകളിൽ ഇടംപിടിക്കുകയാണ്. സിനിമയുടെ കാരക്റ്റർ പോസ്റ്ററുമായി ബന്ധപ്പെട്ടായിരുന്നു പ്രശ്നങ്ങൾ. കഴിഞ്ഞദിവസമാണ് ചിത്രം സംവിധാനം ചെയ്യുന്ന റൂസ്സോ ബ്രദേഴ്സിന്റെ ഇൻസ്റ്റാ​ഗ്രാം പേജിലൂടെ റയാൻ ​ഗോസ്ലിങ്, ക്രിസ് ഇവാൻസ്, അന ഡെ ആർമസ് എന്നിവരുടെ കാരക്റ്റർ പോസ്റ്ററുകൾ പുറത്തുവിട്ടത്. റയാൻ ​ഗോസ്ലിങ്ങിനെ ദ അൺ കാച്ചബിൾ എന്നും ക്രിസ് ഇവാൻസിനെ ദ അൺ സ്റ്റോപ്പബിൾ എന്നും അനയെ അൺ ട്രേയ്സബിൾ എന്നുമാണ് വിശേഷിപ്പിച്ചിരിക്കുന്നത്. എന്നാൽ ചിത്രത്തിലെ മറ്റൊരു പ്രധാനവേഷത്തിലെത്തുന്ന ധനുഷിനെ ഈ പോസ്റ്റർ സീരീസിൽ ഉൾപ്പെടുത്താതിരുന്നതാണ് ആരാധകരുടെ പ്രതിഷേധത്തിന് കാരണം. പോസ്റ്ററുകൾക്ക് കമന്റായി ധനുഷ് എവിടെയെന്ന് ആരാധകർ അന്വേഷിച്ചുതുടങ്ങി. സംവിധായകർ വിവേചനം കാണിച്ചുവെന്ന് വരെ കമന്റ് വന്നു. ഒടുവിൽ മൂന്നുമണിക്കൂറുകൾക്ക് ശേഷം ലീതൽ ഫോഴ്സ് എന്ന വിശേഷണവുമായി ധനുഷിന്റെ പോസ്റ്റർ പോസ്റ്റുചെയ്തതിന് ശേഷമാണ് റൂസോ ബ്രദേഴ്സിന്റെ കമന്റ് ബോക്സിലെ ബഹളം അടങ്ങിയത്. തമിഴ് ആരാധകർക്കൊപ്പം നടി ഐശ്വര്യ ലക്ഷ്മിയടക്കമുള്ള മലയാളികളും കയ്യടികളോടെയാണ് പോസ്റ്റർ സ്വാ​ഗതം ചെയ്തത്. അതിനിടെ ഏതാണ്ട് ഇതേ രീതിയിലുള്ള ബഹളമാണ് ഐ.എം.ഡി.ബിയുടെ ഇൻസ്റ്റാ​ഗ്രാം പേജിലും നടന്നത്. റൂസോ ബ്രദേഴ്സ് ആദ്യം പോസ്റ്റ് ചെയ്ത അതേ പോസ്റ്ററുകളാണ് ഈ പേജും പങ്കുവെച്ചത്. പക്ഷേ വൈകാതെ തന്നെ ഈ പോസ്റ്റ് അപ്രത്യക്ഷമാവുകയും അല്പസമയത്തിനകം ധനുഷിന്റെ പോസ്റ്റർ ഉൾപ്പെടുന്ന സീരീസ് പോസ്റ്റ് ചെയ്യുകയും ചെയ്തു.