രാവിലെ മുതലാണ് നടൻ വിജയ് ദേവരകൊണ്ടയ്ക്കും നടി സാമന്തയ്ക്കും പരിക്ക് പറ്റിയതായി റിപ്പോർട്ടുകൾ പുറത്ത് വന്നത്. കുഷി' എന്ന ചിത്രത്തിന്റെ ഷൂട്ടിങ്ങിനിടെ കാർ നദിയിലേക്ക് മറിഞ്ഞെന്നായിരുന്നു വാർത്തകൾ. കശ്മീരിലെ ചിത്രീകരണത്തിനിടെ സംഘട്ടനരം​ഗം ചിത്രീകരിക്കുന്നതിനിടെയായിരുന്നു ഇരുവർക്കും അപകടം സംഭവിച്ചത് എന്നാണ് റിപ്പോർട്ടുകൾ. എന്നാലിപ്പോഴിതാ താരങ്ങളെ പറ്റി പ്രചരിക്കുന്നത് വ്യാജ വാർത്തയാണെന്ന് വ്യക്തമാക്കിയിരിക്കുകയാണ് 'കുഷി' ടീം. ഈ വാർത്തയിൽ ഒരു സത്യവുമില്ലഎന്നും 30 ദിവസം കാശ്മീരിൽ വിജയകരമായി പൂർത്തിയാക്കിയ ടീം മുഴുവൻ ഇന്നലെ ഹൈദരാബാദിലേക്ക് മടങ്ങിയതായും ടീം പറയുന്നു.

അതേസമയം സാമന്ത ഉൾപ്പെടെയുള്ള യൂണിറ്റിലെ ബാക്കിയുള്ളവർ ഹൈദരാബാദിലേക്ക് മടങ്ങി. നിർമ്മാതാക്കൾ അടുത്തിടെ പ്രഖ്യാപിച്ചതുപോലെ ഡിസംബർ 23 ന് കുഷി തിയറ്ററുകളിൽ റിലീസ് ചെയ്യും. മൈറി മൂവി മേക്കേഴ്‌സാണ് ചിത്രം നിർമ്മിക്കുന്നത്. തെലുങ്ക്, തമിഴ്, കന്നഡ, മലയാളം ഭാഷകളിൽ ഒരേ സമയം റിലീസ് ചെയ്യും. 2018-ൽ പുറത്തിറങ്ങിയ 'മഹാനടി'ക്കുശേഷം വിജയ് ദേവരകൊണ്ടയും സാമന്തയും ഒന്നിക്കുന്ന ചിത്രമാണ് 'കുഷി'. ശിവ നിർവാണ സംവിധാനം ചെയ്യുന്ന ചിത്രത്തിന് ഹിഷാം അബ്ദുൾ വഹാബാണ് സം​ഗീതമൊരുക്കുന്നത്. വിജയ്‌യുടെയും സാമന്തയുടെയും ചിത്രമായ കുഷിയെ ചുറ്റിപ്പറ്റിയുള്ള അഭ്യൂഹങ്ങൾക്ക് ഇതോടെ വിരാമമായിരിക്കുകയാണ്. ഷെഡ്യൂൾ പൂർത്തിയാക്കിയ ഉടൻ വിജയ് ദേവരകൊണ്ട മുംബൈയിലേക്ക് പറന്നു.