ആരാധകർ കാത്തിരുന്ന ആ വിവാഹം ജൂൺ ഒൻപതിന്. നയൻതാരയും വിഘ്നേഷ് ശിവനുമായുള്ള (വിക്കി) വിവാഹം ചെന്നൈ മഹാബലിപുരത്തെ റിസോർട്ടിൽ വച്ച് നടക്കും. വിവാഹത്തിനായുള്ള ഒരുക്കങ്ങൾ തുടങ്ങി. വിവാഹ ചടങ്ങുകൾ ചിത്രീകരിക്കാനുള്ള അവകാശം നൽകിയിരിക്കുന്നത് ഒരു സ്വകാര്യ ഒടിടി കമ്പനിക്കാണ്. നേരത്തെ കത്രീന കപൂർ– വിക്കികൗശൽ വിവാഹത്തിന്റെ സംപ്രേക്ഷണം ഒടിടി പ്ലാറ്റ്ഫോമിനു നൽകിയിരുന്നു.'കാതുവാക്കിലെ രണ്ടു കാതല്‍' എന്ന ചിത്രമാണ് നയൻതാരയുടെയും വിഘ്നേഷിന്റെയുമായി ഏറ്റവും ഒടുവില്‍ റിലീസ് ചെയ്തത്.

ചിത്രത്തിന്റെ റിലീസിനു മുൻപ് വിഘ്നേഷും നയൻസും തിരുപ്പതി ദർശനം നടത്തിയിരുന്നു. സുഹൃത്തുക്കള്‍ക്കായുള്ള വിവാഹ റിസപ്ഷൻ മാലിദ്വീപിൽവച്ചാകും നടത്തുക. എന്നൊക്കെയാണ് വിവാഹം സംബന്ധിച്ച് പുറത്ത് വരുന്ന വിവരങ്ങൾ. എന്നാൽ ഇതുസംബന്ധിച്ച് ഔദ്യോഗിക സ്ഥിരീകരണം ഉണ്ടായിട്ടില്ല. 2015ൽ പുറത്തിറങ്ങിയ വിഘ്‌നേഷ് ശിവൻ സംവിധാനം ചെയ്ത 'നാനും റൗഡി താൻ' എന്ന ചിത്രത്തിനിടെയാണ് നയൻതാര- വിഘ്‌നേഷ് പ്രണയത്തിലാവുന്നത്. ചിത്രത്തിൽ നയൻതാരയായിരുന്നു നായിക. കഴിഞ്ഞ വർഷം താരങ്ങളുടെ വിവാഹനിശ്ചയം കഴിഞ്ഞിരുന്നു.