52ാമത് സംസ്ഥാന ചലച്ചിത്ര പുരസ്കാരത്തിൽ ഏറെ ജനപ്രീതി നേടിയ ചിത്രമായ ഹോമിനെ തഴഞ്ഞതിൽ വിവാദങ്ങൾ കനക്കുകയാണ്. ഹോമിനെ ഒരു വിഭാഗത്തിലും പരിഗണിക്കാത്തതിൽ സമൂഹമാദ്ധ്യമങ്ങളിലടക്കം ഏറെ വിമ‌ശനങ്ങൾ ഉയ‌ർന്നിരുന്നു. ഇപ്പോഴിതാ ഇന്ദ്രന്‍സിന്റെ പഴയ ഒരു അഭിമുഖമാണ് വൈറലാകുന്നത്. ജീവിതത്തിലും സിനമയിലും നേരിട്ട അവഗണനകളെ കുറിച്ചായിരുന്നു ഇന്ദ്രൻസിന്റെ അന്നത്തെ ആ വാക്കുകൾ. ഈ അവഗണന തനിയ്ക്ക് ശീലമാണ് എന്നും ഇനിയും അവഗണിക്കപ്പെടും എന്നുമാണ് ഇന്ദ്രൻസ് അഭിമുഖത്തിൽ പറഞ്ഞിരിക്കുന്നത്. 'ജീവിതത്തില്‍ പല ഇടത്ത് നിന്നും ഒഴിവാക്കപ്പെട്ടിട്ടുള്ള ആളാണ് ഞാന്‍. സിനിമയില്‍ നിന്നും പലപ്പോഴും ഒഴിവാക്കലുകള്‍ നേരിട്ടു. ഇനിയും അങ്ങനെ സംഭവിയ്ക്കും എന്ന് എനിക്ക് അറിയാം. അതൊക്കെ അന്നത്തെ ഓരോ സാഹചര്യങ്ങളായിരുന്നു. അതൊന്നും ആലോചിച്ച് ദുഃഖിച്ചിരിക്കാന്‍ ഞാനില്ല എന്നാണ് ഇന്ദ്രന്‍സ് പറഞ്ഞത്.