നടിയെ ആക്രമിച്ച കേസിൽ കഴിഞ്ഞ ദിവസം തന്നെ ഹൈക്കോടതി തുടരന്വേഷണത്തിനു സമയം നീട്ടി നൽകിയിരുന്നു. ജൂലൈ 15 വരെ സമയം അനുവദിച്ച് കൗസർ എടപ്പഗത്തിന്റെയായിരുന്നു ഉത്തരവ്. തെളിവുകൾ ഏറെ പരിശോധിക്കാനുണ്ടെന്നും തുടരന്വേഷണം പൂർത്തിയാക്കാൻ മൂന്നു മാസം കൂടി നീട്ടിനൽകണമെന്നുമാണ് പ്രോസിക്യൂഷന്റെ ആവശ്യം. ഹർജിയിൽ അതിജീവിതയായ നടിയും കക്ഷി ചേർന്നിരുന്നു. എന്നാലിപ്പോഴിതാ കേസുമായി ബന്ധപ്പെട്ട് കൂടുതൽ പേരെ ചോദ്യം ചെയ്യാനൊരുങ്ങുകയാണ് ക്രൈംബ്രാഞ്ച്.

ദിലീപിന്റെ ഭാര്യയും നടിയുമായ കാവ്യ മാധവൻ,സഹോദരൻ അനൂപ്,സിനിമ മേഖലയിലെ സുഹൃത്തുക്കൾ എന്നിവരെയാണ് ക്രൈംബ്രാഞ്ച് എത്രയും വേഗം ചോദ്യം ചെയ്യാൻ ഒരുങ്ങുന്നത്. കേസ് അന്വേഷണത്തിന്റെ ഭാഗമായി ഒട്ടേറെ കാര്യങ്ങൾ ഇനിയും ചെയ്യാൻ ഉണ്ടെന്നായിരുന്നു ക്രൈംബ്രാഞ്ച് കോടതിയിൽ വ്യക്തമാക്കിയിരുന്നത്.

ഒന്നര മാസം കൂടി അന്വേഷണത്തിന് സമയം ലഭിക്കുമ്പോൾ ദിലീപിനെതിരായ കുരുക്ക് അന്വേഷണ സംഘം മുറുക്കുമെന്നാണ് കരുതുന്നത്. കാവ്യമാധവനെ സാക്ഷിപട്ടികയിൽ നിന്ന് പ്രതിപ്പട്ടികയിലേക്ക് മാറ്റുമോ എന്ന ചോദ്യത്തിനും ഉത്തരമുണ്ടാകും. തുടരന്വേഷണത്തിനായി നീട്ടിക്കിട്ടിയ ഒന്നരമാസത്തിനുള്ളിൽ 30 ശതമാനത്തോളം വരുന്ന തെളിവുകൾ അന്വേഷണസംഘത്തിന് പരിശോധിച്ച് തീർക്കേണ്ടതുണ്ട്.