കാലം മായ്ച്ചാലും ഓർമകളിൽ നിന്നും മായാത്ത അതുല്യ പ്രതിഭ. എസ്പിബി യാത്രയായതിനുശേഷം വരുന്ന രണ്ടാം പിറന്നാളാണിന്റെ ഓർമയിൽ ആരാധകർ. ഈ ദിനവും ആരാധകരുടെ മനസ്സിൽ നൊമ്പരമായി ബാക്കിയാകുകയാണ്. ഒരു പുതിയ പല്ലവി കൊണ്ടുപോലും തൊട്ടുണർത്താതെ, ഒരു പുതിയ പാട്ടീണം കൊണ്ടുപോലും കാതുകളെ ഉമ്മവയ്‌ക്കാതെ... സംഗീതലോകത്തെ എസ്പിബിയില്ലാക്കാലം രണ്ട് വർഷത്തോട് അടുക്കുന്നുവെന്ന് നാം ഓർക്കുമ്പോഴും ഇന്നും അദ്ദേഹത്തിന്റെ ഈണങ്ങളെ കൈവിടാതെ ചേർത്തുപിടിച്ചുകൊണ്ടിരിക്കുകയാണ്...

അങ്ങനെ പാട്ടുകൊണ്ടു ദേശങ്ങളെയും തലമുറകളെയും കീഴടക്കിയ സ്വരചക്രവർത്തിയാണ് അദ്ദേഹം. ലോകഭൂപടത്തിൽ തന്നെ തെന്നിന്ത്യയ്ക്കു മധുരിക്കുന്നൊരു പാട്ടുവിലാസം പതിച്ചുനൽകിയ ഗായകൻ. കോടിക്കണക്കിന് ആരാധകരുടെയും അനുരാഗികളുടെയും പ്രിയപ്പെട്ട ബാലു 2020 സെപ്റ്റംബറിൽ ആണ് നമ്മെ വിട്ടുപോയത്. എന്നാൽ വെറും പാട്ടീണം കൊണ്ടു മാത്രമായിരുന്നില്ലല്ലോ എസ്‌പിബി നമ്മുടെ ഹൃദയത്തെ തൊട്ടുണർത്തിയത്. അതുകൊണ്ടു തന്നെയാണ് ആ നിശ്ശബ്‌ദത ഇത്ര ഉച്ചത്തിലുച്ചത്തിൽ ഏവരുടെയും കാതിനെ നഷ്‌ടബോധത്തിലാഴ്‌ത്തുന്നത്.

അതേസമയം സിനിമയ്‌ക്കുവേണ്ടി ബാലു അഭിനയിച്ചുപാടുമ്പോൾ ഈ നൃത്തം, അഥവാ ശരീരം കൊണ്ടുകൂടി പാടുന്ന ആ പാട്ട് നമുക്കു കൃത്യമായി മനസ്സിലാകുന്നു. 'കേളാടി കണ്മണി' എന്ന സിനിമയിലെ മണ്ണിൽ ഇന്ത കാതൽ... എന്ന ക്ലേശഗാനം ഏതോ കടലോരത്ത് ബാലു പ്രണയാർദ്രനായി നായികയ്‌ക്കു മുന്നിൽ പാടുന്നത് ഓർമയുണ്ടോ? അദ്ദേഹം മുഴുവൻ പാട്ടായി മാറുന്നതുപോലെ തോന്നാറുണ്ട്.