കമൽഹാസൻ, വിജയ് സേതുപതി, ഫഹദ് ഫാസിൽ എന്നിവർ ഒന്നിച്ച ബിഗ് ബജറ്റ് ചിത്രം ‘വിക്രം’ തിയേറ്ററുകളിലെത്തിയതിന് പിന്നാലെ വൻ ആവേശത്തിലാണ് ആരാധകർ. ലോകേഷ് കനകരാജ് സംവിധാനം ചെയ്ത ചിത്രത്തിന് മികച്ച പ്രേക്ഷക പ്രതികരണമാണ് ലഭിക്കുന്നത്. വിക്രം റെക്കോഡുകള്‍ തകര്‍ത്ത് മുന്നേറുകയാണ്. വര്‍ഷങ്ങള്‍ക്ക് ശേഷമാണ് കമലിന്റെ രാജ്കമല്‍ ഫിലിംസ് നിര്‍മിച്ച ഒരു ചിത്രം റെക്കോഡുകള്‍ തകര്‍ത്ത് മുന്നേറുന്നത്. റിലീസ് ചെയ്ത് ഒരാഴ്ച തികയുന്നതിനും മുന്‍പ് 225 കോടിയാണ് ചിത്രം നേടിയത്. 120 കോടി മുതല്‍മുടക്കിലാണ് വിക്രം ഒരുക്കിയത്. രാജ്കമല്‍ ഫിലിംസിന്റെ ബാനറില്‍ കമല്‍ ഹാസനും ആര്‍. മഹേന്ദ്രനുമാണ് ചിത്രം ഒരുക്കിയത്. ചിത്രത്തിന്റെ വിജയത്തിന് പിന്നാലെ കമൽ ഹാസൻ സംവിധായകൻ കനകരാജിന് ലെക്‌സസ് കാർ സമ്മാനമായി നൽകിയിരുന്നു.

കൂടാതെ ലോകേഷിനെ അമ്പരപ്പിച്ചതിന് പുറമെ, സിനിമയിൽ പ്രവർത്തിച്ച 13 അസിസ്റ്റന്റ് ഡയറക്ടർമാർക്ക് അദ്ദേഹം ഒരു ലക്ഷം രൂപ (ഏകദേശം) വിലയുള്ള അപ്പാച്ചെ RTR 160 ബൈക്കുകൾ സമ്മാനിക്കുകയും ചെയ്തു. ഇപ്പോഴിതാ ചിത്രത്തില്‍ അതിഥിവേഷത്തിലെത്തിയ സൂര്യയ്ക്ക് റോളക്‌സ് വാച്ച് സമ്മാനിച്ചിരിക്കുകയാണ് കമല്‍. സൂര്യ തന്നെയാണ് ഈ വിവരം സമൂഹമാധ്യമങ്ങളിലൂടെ പങ്കുവച്ചത്. 'ഇത്തരം നിമിഷങ്ങള്‍ ജീവിതത്തെ മനോഹരമാക്കും' എന്ന കുറിപ്പോടെയാണ് സൂര്യയുടെ ട്വീറ്റ്. ചിത്രത്തില്‍ റോളക്സ് എന്ന പ്രതിനായക കഥാപാത്രത്തെയാണ് സൂര്യ അവതരിപ്പിച്ചത്. ചിത്രത്തിന്റെ ക്ലൈമാക്സിലാണ് റോളക്സ് എത്തുന്നത്. ഏകദേശം അഞ്ച് മിനിറ്റ് ദൈര്‍ഘ്യമുള്ള രംഗത്തില്‍ ദയാദാക്ഷിണ്യമില്ലാത്ത രൗദ്രഭാവത്തിലുള്ള റോളക്സായി അതിഗംഭീര പ്രകടമാണ് സൂര്യ കാഴ്ച വച്ചത്.