തെന്നിന്ത്യൻ താര സുന്ദരി നയൻതാരയും സംവിധായകൻ വിഘ്നേഷ് ശിവനും വിവാഹിതരായി. മഹാബലിപുരത്തെ ഷെറാട്ടൺ പാർക്കിൽ സ്വപ്നതുല്യമായ വിവാഹ ചടങ്ങിലാണ് ഇരുവരും വിവാഹിതരായത്. മുൻനിര താരങ്ങളാണ് ഇരുവരുടെയും വിവാഹത്തിൽ പങ്കെടുത്തത്. ബോളിവുഡ് നടൻ ഷാരൂഖ് ഖാനും എത്തിയത് ഏറെ ശ്രദ്ധിക്കപ്പെട്ടു. നയൻതാരയുടെ വിവാഹത്തിന് എത്തിയ ഷാരൂഖ് ഖാന്റെ ഫോട്ടോകളാണ് ഇപ്പോള്‍ സാമൂഹ്യമാധ്യമത്തില്‍ പ്രചരിക്കുന്നത്. നയന്‍താരയുടെ ബോളിവുഡ് അരങ്ങേറ്റ ചിത്രമായ 'ജവാന്‍'ലെ നായകന്‍ ഷാരൂഖാണ്. രജനികാന്ത് അടക്കമുള്ള താരങ്ങളും വിവാഹത്തില്‍ പങ്കെടുക്കാൻ എത്തിയിട്ടുണ്ട്. മലയാളത്തിൽ നിന്നും ദിലീപും താര വിവാഹത്തിൽ പങ്കെടുത്തു. സൂപ്പർഹിറ്റ് ചിത്രമായ ബോഡി ഗാർഡിൽ ഇവർ ഒന്നിച്ച് അഭിനയിച്ചിരുന്നു. ജീത്തു ജോസഫ് സംവിധാനം ചെയ്ത ലൈഫ് ഓഫ് ജോസൂട്ടിയിൽ അതിഥിവേഷത്തിലും നയൻതാര എത്തിയിരുന്നു.

തമിഴ്‍നാട് മുഖ്യമന്ത്രി എം കെ സ്റ്റാലിലും വിവാഹത്തിന് എത്തുന്നുണ്ടെന്ന് റിപ്പോര്‍ട്ടുണ്ട്. വിവാഹവേദിയും പരിസരവും കനത്ത സുരക്ഷയിലാണ്. ക്ഷണക്കത്തിനൊപ്പം നൽകിയ പ്രത്യേക കോഡ് നമ്പർ നൽകി വേണം വിവാഹ ഹാളിലേക്ക് കടക്കാൻ എന്ന് റിപ്പോര്‍ട്ടുണ്ടായിരുന്നു. വിവാഹത്തിന്റെ ഡിജിറ്റൽ ക്ഷണക്കത്ത് ഇന്റര്‍നെറ്റില്‍ തരംഗമായിട്ടുണ്ട്. പരമ്പരാഗത ശൈലിയിലുള്ള ഇളം നിറങ്ങളിലെ വസ്ത്രങ്ങളിൽ എത്തണമെന്നായിരുന്നു അതിഥികളോടുള്ള അഭ്യർത്ഥന. വിവാഹവേദിയിൽ സംഗീതപരിപാടിയും നിശ്ചയിച്ചിച്ചുണ്ട്.. എന്നാൽ ഇത് നയിക്കുന്നത് ആരാകുമെന്നതും സർപ്രൈസാണ്.