ബിഗ് ബോസ് മലയാളം സീസണ്‍ 4 അന്തിമഘട്ടത്തിലേക്ക് അടുത്തിരിക്കുകയാണ്. ഒന്‍പത് മത്സരാര്‍ത്ഥികളില്‍ നിന്ന് ഫൈനല്‍ ഫൈവിലേക്കെത്താന്‍ ഇനി ഏതാനും ദിവസങ്ങളേ അവശേഷിച്ചിട്ടുള്ളൂ. ദിവസങ്ങള്‍ പിന്നിടുന്തോറും മത്സരാര്‍ത്ഥികള്‍ തമ്മിലുള്ള പോരാട്ടവീര്യം മുറുകി വരികയാണ്. ടാസ്‌ക്കുകളും അതനുസരിച്ച് കടുപ്പമേറിയതും കുഴപ്പിക്കുന്നതുമായി മാറുകയാണ്. ഈ വാരം മത്സരാര്‍ത്ഥികള്‍ക്കായി കൊടുത്ത ബിഗ് ബോസ് കോള്‍ സെന്റര്‍ ടാസ്‌ക്ക് വലിയ ബഹളങ്ങള്‍ സൃഷ്ടിച്ചാണ് മുന്നേറുന്നത്. രണ്ട് ചേരിയായി തിരിഞ്ഞ് പരസ്യമായ കുറ്റപ്പെടുത്തലുകളിലേക്കും വാഗ്വാദങ്ങളിലേക്കും കടക്കുന്ന ടാസ്‌ക്ക് മിക്കവാറും വലിയ അടിയില്‍ കലാശിക്കാനാണ് സാധ്യത. അതിനുള്ള സൂചനകള്‍ ഇപ്പോഴേ കണ്ടുതുടങ്ങി.

ഈ സീസണിലെ ശക്തരായ മത്സരാർഥികളിൽ ഒരാളാണ് ലക്ഷ്മിപ്രിയ. ഷോ തുടങ്ങിയ അന്നു മുതൽ താരത്തിനെ അനുകൂലിച്ചും വിമർശിച്ചും നിരവധി പേർ രംഗത്തെത്തിയിരുന്നു. വീടിനുള്ളിലും മിക്ക മത്സരാർഥികളം ലക്ഷ്മിപ്രിയയ്ക്ക് എതിരാണ്. കഴിഞ്ഞ ദിവസം നടന്ന കോൾ സെന്റർ ടാസ്കിലും വീടിനുള്ളിലെ മത്സരാർഥികൾ ലക്ഷ്മിപ്രിയയെ കടന്നാക്രമിച്ചിരുന്നു. ലക്ഷ്മിപ്രിയ ഫെയ്ക്ക് ആണെന്നും നാടകം കളിക്കുകയാണെന്ന് വരെ കോൾ സെന്റർ ടാസ്കിനിടെ മത്സരാർഥികൾ പറഞ്ഞിരുന്നു. എന്നാലിപ്പോഴിതാ ലക്ഷ്മിപ്രിയയുടെ ഔദ്യോഗിക ഫെയ്സ്ബുക്ക് പേജിൽ വന്ന കുറിപ്പാണ് വൈറലായി മാറുന്നത്.

ഫെയ്സ്ബുക്ക് കുറിപ്പ് ഇങ്ങനെ...

ലക്ഷ്മിപ്രിയ ആണ് സോഷ്യൽ മീഡിയ ഉപയോഗിക്കുന്ന ഒട്ടുമിക്ക ആളുകളും വെറുക്കുന്ന ഒരു കണ്ടസ്റ്റന്റ്. കാരണം അവർ "കുലസ്ത്രീ " ആണ് എന്നത് തന്നെ. എങ്ങനെ ആണ് അവർ കുലസ്ത്രീ ആവുന്നത്, അവർ മതപരമായ കാര്യങ്ങൾ ഫോളോ ചെയ്യുന്നു, എപ്പോളും അടുക്കളയിൽ കയറി അവരെ അപമാനിച്ചവർക്കു വരെ ആഹാരം ഉണ്ടാക്കി കൊടുക്കുന്നു. വീട്ടിലെ ഒരു അമ്മ ക്യാരക്ടർ ആയി കളിക്കുന്നു. ഇതൊക്കെ തന്നെ... റിയാസ് ഇന്നലെ പറഞ്ഞു - അവന്റെ അമ്മ മാന്യമായി വീട്ടുജോലി ചെയ്തു വീട് നോക്കി അതുകൊണ്ട് അവർ ഫെമിനിസ്റ്റ് ആണ് എന്നതാണ്. ആ ബിഗ് ബോസിൽ ഏറ്റവും കൂടുതൽ പെയ്മെന്റ് വാങ്ങുന്ന ലക്ഷ്മിപ്രിയ പുറത്തും അതുപോലെ അധ്വാനിച്ചത് കൊണ്ട് അല്ലെ അവർക്കു അതുകിട്ടിയത്. ഒരർഥത്തിൽ പറഞ്ഞാൽ തുല്ല്യ നീതിക്ക് വേണ്ടി വാദിക്കുന്നവർ ലക്ഷ്മിപ്രിയയെ അല്ലെ ഉയർത്തി കാണിക്കേണ്ടത്.. ലക്ഷ്മിപ്രിയയെ പോലെ ഒരു സ്ത്രീ ഒരു ഷോയിൽ ഏറ്റവും കൂടുതൽ പ്രതിഫലം വാങ്ങുന്നു എന്നത്, കേരളത്തിലെ വുമൻ എംപവർമെന്റ് മൂവ്മെൻ്റ്സിന്റെ വിജയം ആണെന്ന് വേണ്ടേ കരുതാൻ. ഇനിയൊരു കാര്യം മനുഷ്യത്വം ആണ്... ആരും ഒന്നും പറയാൻ ഇല്ലാതെ കൂട്ടിൽ അകപ്പെട്ടു കിടക്കുന്ന ഒരാൾ സങ്കടപെടുമ്പോൾ, നാടകം ആയാലും, അഭിനയം ആയാലും ചെന്ന് അയാളെ ആശ്വസിപ്പിക്കാൻ കാണിക്കുന്ന മനസുണ്ടല്ലോ, ആ മനസ്സ് അവിടെ പലർക്കും ഇല്ല.