വർഷങ്ങൾക്ക് ശേഷം ഭാവന മലയാള സിനിമയിലേക്ക് ഒരു തിരിച്ചു വരവിന് ഒരുങ്ങുകയാണ്. ആദിൽ മൈമുനാത്ത് അഷ്റഫ് സംവിധാനം ചെയ്യുന്ന ന്‍റിക്കാക്കാക്കൊരു പ്രേമണ്ടാ‍ർന്ന് എന്ന സിനിമയിലൂടെയാൻ താരത്തിന്റെ തിരിച്ച് വരവ്. സോഷ്യൽ മീഡിയയിൽ വളരെ ആക്ടീവാണ് ഭാവന. തൻ്റെ പുത്തൻ ചിത്രങ്ങളൊക്കെ ഭാവന ആരാധകരുമായി പങ്കുവെക്കാറുമുണ്ട്. ഇപ്പോഴിതാ തൻ്റെ പുത്തൻ സാരിച്ചിത്രങ്ങൾ പങ്കുവെച്ചു കൊണ്ട് ഭാവന കുറിച്ചിരിക്കുന്ന വാചകമാണ് എല്ലാവരുടെയും ശ്രദ്ധ പിടിച്ചു പറ്റുന്നത്. 'എല്ലാത്തിനും ഒടുവിൽ ഒരു മുൻവിധിയും ഇല്ലാതെ എന്നെ ഞാനുമായി ബന്ധിപ്പിക്കുന്നത് എൻ്റെ ആത്മാവ് മാത്രമാണ്' എന്നാണ് ഭാവന കുറിച്ചിരിക്കുന്നത്. നിരവധി പേരാണ് ഭാവനയുടെ ചിത്രങ്ങൾ ഏറ്റെടുത്തിരിക്കുന്നത്. ഒട്ടനവധി പേർ ചിത്രങ്ങൾ പങ്കുവെക്കുകയും ചിത്രത്തിന് കമൻ്റുകളിടുകയുമൊക്കെ ചെയ്തിട്ടുമുണ്ട്.

2017-ൽ പുറത്തിറങ്ങിയ 'ആദം ജോൺ' എന്ന സിനിമയാണ് ഒടുവിലായി ഭാവന ഭാഗമായ മലയാള സിനിമ. 2017ൽ തന്നെ പുറത്തിറങ്ങിയ ഒരു വിശേഷപ്പെട്ട ബിരിയാണി കിസ്സ എന്ന ചിത്രത്തിലും ഭാവന അഭിനയിച്ചിരുന്നു. ഈ ചിത്രത്തിൽ അതിഥി താരമായിട്ടായിരുന്നു ഭാവന എത്തിയത്. ഹണി ബീ 2.5 എന്ന ചിത്രത്തിലും ഭാവന അതിഥി താരമായി പ്രത്യക്ഷപ്പെട്ടിരുന്നു. ശേഷം അഞ്ച് വര്‍ഷത്തെ ഇടവേള കഴിഞ്ഞ് ഭാവന മലയാള സിനിമയിലേക്ക് തിരിച്ചെത്തുകയാണ് ഇപ്പോൾ. ചിത്രത്തിൻ്റെ പ്രവർത്തനങ്ങളൊക്കെ അണിയറയിൽ പുരോഗമിക്കുകയുമാണ്. ഐഎഫ്എഫ്കെ വേദിയിൽ അതിഥിയായി എത്തുകയും സിനിമയിലേക്കുള്ള തിരിച്ചുവരവിനെക്കുറിച്ച് ഒക്കെ ഭാവന വാചാലയിയിരുന്നു. 2002-ൽ 'നമ്മൾ' എന്ന സിനിമയിലൂടെയാണ് ഭാവന സിനിമയിൽ അരങ്ങേറിയത്.

നമ്മൾ സിനിമയുടെ വൻ ഹിറ്റിന് ശേഷം അനേകം അവസരങ്ങളാണ് മലയാളത്തിൽ നിന്ന് താരത്തെ തേടിയെത്തിയത്. മലയാളത്തിലെ ഒട്ടുമിക്ക മുൻ നിര നായകന്മാരുടെ കൂടെയും ഭാവന അഭിനയിച്ചിട്ടുണ്ട്. 2003ൽ പുറത്തിറങ്ങിയ CID മൂസ, ക്രോണിക് ബാച്ചലർ എന്നീ ചിത്രങ്ങൾ വമ്പൻ ഹിറ്റുകളായതോടെയാണ് ഭാവനയുടെ താരമൂല്യം വർധിച്ചത്. പിന്നീട് വിവിധ തെന്നിന്ത്യൻ ഭാഷകളിലായി നിരവധി ശ്രദ്ധേയ കഥാപാത്രങ്ങൾ താരം അവതരിപ്പിച്ചിട്ടുണ്ട്. കന്നഡ നിര്‍മ്മാതാവ് നവീനുമായുള്ള വിവാഹശേഷം കന്നഡ സിനിമയിലാണ് ഭാവന സജീവമായുള്ളത്. തഗരു, 99, ഇൻസ്പെക്ടര്‍ വിക്രം, ശ്രീകൃഷ്ണ അറ്റ് ജീമെയിൽ.കോം, ബജ്റംഗി 2, ഗോവിന്ദ ഗോവിന്ദ തുടങ്ങിയ കന്നഡ സിനിമകളിൽ അടുത്തിടെ ഭാവന അഭിനയിച്ചിരുന്നു. ഷറഫുദ്ദീൻ നായകനാകുന്ന സിനിമയിലൂടെയാണ് ഭാവനയുടെ തിരിച്ചു വരവ്. റെനീഷ് അബ്‍ദുൾഖാദറാണ് നി‍ർമ്മാണം. നടൻ മമ്മൂട്ടിയാണ് ഭാവനയുടെ മടങ്ങിവരവ് സിനിമയുടെ പോസ്റ്റർ സോഷ്യൽ മീഡിയയിലൂടെ പങ്കുവെച്ചിരിക്കുന്നത്. സഹോദരി-സഹോദര ബന്ധമാണ് സിനിമയുടെ പ്രമേയമെന്നാണ് പോസ്റ്റര്‍ നല്‍കുന്ന സൂചന.