കമല്‍ഹാസൻ നായകനായി ഏറ്റവും ഒടുവില്‍ പ്രദര്‍ശനത്തിന് എത്തിയതാണ് 'വിക്രം'. ലോകേഷ് കനകരാജ് ആണ് ചിത്രം സംവിധാനം ചെയ്‍തത്. മികച്ച പ്രതികരണമാണ് ചിത്രം തിയറ്ററുകളില്‍ നിന്ന് നേടുന്നത്. ഇപ്പോഴിതാ 'വിക്രം' സിനിമയുടെ വിജയത്തിന് പിന്നാലെ കമൽ ഹാസനെ ആദരിച്ച് രംഗത്തെത്തിയിരിക്കുകയാണ് തെലുങ്ക് താരം ചിരഞ്ജീവി. താരത്തിന്റെ വീട്ടിൽ വെച്ചായിരുന്നു കമലിനെ ആദരിച്ചത്. ബോളിവുഡ് താരം സൽമാൻ ഖാനും സംവിധായകൻ ലോകേഷ് കനകരാജും ഒപ്പമുണ്ടായിരുന്നു. ചിരഞ്ജീവി തന്നെയാണ് കമൽ തന്റെ വീട്ടിൽ എത്തിയതിന്റെ സന്തോഷം സമൂഹ മാധ്യമങ്ങളിലൂടെ പങ്കുവെച്ചത്.'എന്റെ പ്രിയപ്പെട്ട സുഹൃത്ത് കമൽ ഹാസനെ കഴിഞ്ഞ രാത്രി എന്റെ വീട്ടിൽ വെച്ച് ആദരിക്കാൻ സാധിച്ചതിലും വിക്രം എന്ന സിനിമയുടെ വിജയം ആഘോഷിച്ചതിലും അതിയായ സന്തോഷം. എന്റെ പ്രിയപ്പെട്ട സല്ലു ഭായിയും ലോകേഷും ഒപ്പമുണ്ടായിരുന്നു. എന്തൊരു ത്രില്ലിംഗ് സിനിമയാണിത്. കൂടുതൽ വിജയം ആശംസിക്കുന്നു' എന്നാണ് ചരഞ്ജീവി ട്വീറ്റ് ചെയ്തത്.

ചിത്രം ഇതിനകം 250 കോടിയ്ക്ക് മുകളിൽ കളക്ഷൻ നേടി കഴിഞ്ഞു. കമലിന് പുറമെ ഫഹദ് ഫാസിലും വിജയ് സേതുപതിയും സിനിമയിൽ പ്രധാന കഥാപാത്രങ്ങളെ അവതരിപ്പിക്കുന്നു. സൂര്യയും 'വിക്രമി'ൽ സുപ്രധാനമായ അതിഥി വേഷത്തിൽ എത്തുന്നുണ്ട്. ഫഹദ് ഫാസില്‍, കാളിദാസ് ജയറാം, നരേൻ തുടങ്ങിയവരാണ് മലയാളത്തില്‍ നിന്ന് വിക്രമില്‍ അഭിനയിച്ചത്. ലോകേഷിനൊപ്പം രത്നകുമാറും ചേര്‍ന്നാണ് ചിത്രത്തിന്റെ സംഭാഷണങ്ങള്‍ രചിച്ചിരിക്കുന്നത്. ഗിരീഷ് ഗംഗാധരൻ ആണ് ഛായാഗ്രാഹകൻ. സംഗീതം അനിരുദ്ധ് രവിചന്ദര്‍, എഡിറ്റിംഗ് ഫിലോമിന്‍ രാജ്, സംഘട്ടന സംവിധാനം അന്‍പറിവ് തുടങ്ങിയവരാണ് സിനിമയുടെ മറ്റു അണിയറപ്രവർത്തകർ. ജൂൺ മൂന്നാം തീയതിയാണ് 'വിക്രം' റിലീസ് ചെയ്തത്. കമൽ ഹാസന്റെ തിരിച്ചുവരവ് എന്നാണ് സിനിമയെക്കുറിച്ച് പ്രേക്ഷകർ അഭിപ്രായപ്പെടുന്നത്.