ജൂൺ ഒമ്പതിനായിരുന്നു ഏറെക്കാലത്തെ പ്രണയത്തിനൊടുവില്‍ വിഘ്‍നേശ് ശിവനും നയൻതാരയും വിവാഹിതരായത് . മഹാബലിപുരം ഷെറാട്ടണ്‍ ഗ്രാന്‍ഡ് ഹോട്ടലില്‍ വച്ചായിരുന്നു വിവാഹം. താരങ്ങള്‍ ഉള്‍പ്പടെയുള്ള സുഹൃത്തുക്കളുടെയും അടുത്ത ബന്ധുക്കളുടെയും സാന്നിദ്ധ്യത്തിലായിരുന്നു വിവാഹം. എന്നാൽ വിവാഹശേഷം വീട്ടിൽ പോലും കയറാതെ ഇരുവരും എത്തിയത് ആന്ധ്രാപ്രദേശിലെ തിരുപ്പതി വെങ്കിടേശ്വര ക്ഷേത്രത്തിൽ ദർശനത്തിനായിരുന്നു. തങ്ങളുടെ വിവാഹ ജീവിതത്തിനായി ദേവനോട് അനുഗ്രഹം വാങ്ങാൻ എത്തിയതായിരുന്നു അവർ. ഇപ്പോഴിതാ വിവാഹം കഴിഞ്ഞ് രണ്ട് ദിവസങ്ങൾക്കിപ്പുറം വിഗ്നേഷിനൊപ്പം ജന്മനാട്ടിലെത്തി ലേഡി സൂപ്പർസ്റ്റാർ നയൻതാര. ഇന്ന് ഉച്ചയോടെയാണ് താരദമ്പതികൾ കൊച്ചി അന്താരാഷ്ട്ര വിമാനത്താവളത്തിലെത്തിയത്.

നയൻതാരയുടെ പിതാവിന് ആരോ​ഗ്യ പ്രശ്നങ്ങളുള്ളതിനാൽ വിവാഹത്തിൽ പങ്കെടുക്കാൻ അമ്മയ്ക്കും സാധിച്ചിരുന്നില്ല. മാതാപിതാക്കളുടെ അനുഗ്രഹം വാങ്ങാനാണ് ദമ്പതികൾ കേരളത്തിലെത്തിയത്. വിമാനത്താവളത്തിൽ നിന്നുള്ള നവദമ്പതികളുടെ ചിത്രങ്ങൾ സോഷ്യൽ മീഡിയയിൽ വൈറലാവുകയാണ്. കറുത്ത വേഷത്തിലാണ് വിഗ്നേഷ് എത്തിയത്. ഓറഞ്ച് ചുരിദാറാണ് നയൻതാര ധരിച്ചത്. ഇവർ എത്ര ദിവസം കേരളത്തിലുണ്ടാകുമെന്നോ എവിടെയൊക്കെ പോകുമെന്നോ വ്യക്തമല്ല.