നടി മീനയുടെ ഭര്‍ത്താവ് വിദ്യാസാഗര്‍ കഴിഞ്ഞ ദിവസമാണ് മരിച്ചത്. വിദ്യാസാഗറിന്റെ മരണം കൊവിഡ് മൂലമാണെന്ന വാര്‍ത്തകളായിരുന്നു ആദ്യം പുറത്ത് വന്നത്. പിന്നീട് ഇക്കാര്യം നിഷേധിച്ച് കുടുംബവുമായി അടുത്ത ബന്ധം പുലര്‍ത്തുന്നവര്‍ രംഗത്തെത്തിയിരുന്നു.

ഇപ്പോളിതാ, ഭര്‍ത്താവിന്റെ വിയോഗത്തിന് പിന്നാലെ തെറ്റായ പ്രചാരണങ്ങള്‍ അവസാനിപ്പിക്കണമെന്ന അഭ്യര്‍ത്ഥനയുമായി നടി മീന തന്നെ രംഗത്തെത്തിയിരിക്കുകയാണ്. വിദ്യാസാഗറിന്റെ മരണ കാരണത്തെക്കുറിച്ച് ചില മാധ്യമങ്ങള്‍ ഊഹാപോഹങ്ങള്‍ പ്രചരിപ്പിച്ചതിനെത്തുടര്‍ന്നാണ് മീന സമൂഹ മാധ്യമങ്ങളില്‍ കുറിപ്പുമായി എത്തിയത്.

'എന്റെ പ്രിയ ഭര്‍ത്താവ് വിദ്യാസാഗറിന്റെ വേര്‍പാടില്‍ എനിക്ക് അതിയായ ദുഃഖമുണ്ട്. ഈ സാഹചര്യത്തില്‍ ഞങ്ങളുടെ സ്വകാര്യതയെ മാനിക്കാന്‍ എല്ലാ മാധ്യമങ്ങളോടും അഭ്യര്‍ത്ഥിക്കുന്നു. ദയവായി ഈ വിഷയത്തില്‍ തെറ്റായ വിവരങ്ങള്‍ പ്രചരിപ്പിക്കരുത്. ബുദ്ധിമുട്ടേറിയ ഇതുപോലൊരു സമയത്ത് ഒപ്പം നിന്ന എല്ലാ നല്ല മനസ്സുകളോടുമുള്ള നന്ദി അറിയിക്കുന്നു. മെഡിക്കല്‍ ടീം, മുഖ്യമന്ത്രി, ആരോഗ്യമന്ത്രി, രാധാകൃഷ്ണന്‍ ഐ.എ.എസ്, സഹപ്രവര്‍ത്തകര്‍, കുടുംബം, മാധ്യമങ്ങള്‍ എന്നിവര്‍ക്കും നന്ദി പറയുന്നു', മീന ഫേസ്ബുക്കില്‍ കുറിച്ചു.

വിദ്യാസാഗര്‍ കുറച്ചു വര്‍ഷങ്ങളായി ശ്വാസകോശ രോഗങ്ങള്‍ക്ക് ചികിത്സയില്‍ ആയിരുന്നു. കഴിഞ്ഞ ജനുവരിയില്‍ കൊവിഡ് ബാധിച്ചതിനെ തുടര്‍ന്നാണ് ശ്വാസകോശ രോഗം ഗുരുതരമായത്. ശ്വാസകോശം മാറ്റി വയ്ക്കണമെന്ന് ഡോക്ടര്‍മാര്‍ നിര്‍ദേശിച്ചിരുന്നെങ്കിലും അവയവദാതാവിനെ കിട്ടാത്തതുകൊണ്ട് ശസ്ത്രക്രിയ നീണ്ടുപോവുകയായിരുന്നു. ഇതിനിടയിലാണ് മരണം സംഭവിച്ചത്.