മലയാള സിനിമയിൽ ഒരുപിടി മികച്ച ചിത്രങ്ങൾ സമ്മാനിച്ച പ്രമുഖ സംവിധായകൻ എം. പത്മകുമാർ ബോളിവുഡിലേക്ക് ചുവടുവെക്കുന്നു. ബോളിവുഡ് സൂപ്പർതാരം സണ്ണി ഡിയോൾ നായകനാകുന്ന 'സൂര്യ' എന്ന ചിത്രത്തിലൂടെയാണ് അദ്ദേഹത്തിന്റെ ഹിന്ദി അരങ്ങേറ്റം. ചിത്രത്തിന്റെ ഫസ്റ്റ് ലുക്ക് പോസ്റ്റർ സണ്ണി ഡിയോളിന്റെ ഔദ്യോഗിക സോഷ്യൽ മീഡിയ പേജിലൂടെ അണിയറപ്രവർത്തകർ പുറത്തുവിട്ടു. ജയ്പൂർ, ഉദയ്പൂർ, മുംബൈ എന്നിവിടങ്ങളിലായി ചിത്രീകരണം പൂർത്തിയാക്കിയ ചിത്രം വരും നവംബർ 20-ന് തീയേറ്ററുകളിൽ ലോകമെമ്പാടും പ്രദർശനത്തിനെത്തും.

എം.എം. മൂവീസിന്റെ ബാനറിൽ കമൽ മുക്കൂട്ട് അവതരിപ്പിക്കുന്ന 'സൂര്യ'യ്ക്ക് വേണ്ടി പ്രശസ്ത ഛായാഗ്രാഹകൻ സന്തോഷ് തുണ്ടിലാണ് ക്യാമറ ചലിപ്പിച്ചിരിക്കുന്നത്. ബെല്ലു സലൂജയാണ് എഡിറ്റിംഗ് നിർവ്വഹിക്കുന്നത്. മലയാളത്തിൽ ശ്രദ്ധേയനായ ഷാഹി കബീറിന്റെ കഥയ്ക്ക് കരൺ റസ്ദാൻ, നീരജ് പാഠക്, മായങ്ക് ശർമ്മ എന്നിവർ ചേർന്നാണ് തിരക്കഥ ഒരുക്കിയിരിക്കുന്നത്. ഉത്തം സിംഗും മലയാളിയായ രഞ്ജിൻ രാജും ചേർന്ന് ഗാനങ്ങൾ നിർമ്മിക്കുമ്പോൾ, ചിത്രത്തിന്റെ പശ്ചാത്തല സംഗീതം ഒരുക്കുന്നത് ഉത്തം സിംഗാണ്.

ഒരു അഭിനേതാവ് എന്ന നിലയിൽ സണ്ണി ഡിയോളിന്റെ കരിയറിലെ ഏറ്റവും മികച്ച പ്രകടനമായിരിക്കും ഈ സിനിമയിലേതെന്നാണ് അണിയറപ്രവർത്തകർ അവകാശപ്പെടുന്നത്. സണ്ണി ഡിയോളിന് പുറമെ പ്രഗ്യാ ജയ്സ്വാൾ, തനുശ്രീ ചക്രവർത്തി എന്നിവർ നായികമാരായെത്തുന്നു. കൂടാതെ ബോളിവുഡിലെയും തെന്നിന്ത്യയിലെയും പ്രമുഖ താരങ്ങളായ രവി കിഷൻ, ടിനു ആനന്ദ്, മനീഷ് വാധ്വാ, ജിഷു സെൻഗുപ്ത, രോഹിത് തിവാരി, ഖാലിദ് സിദ്ധിക്കി, അനൂപ് ത്രിവേദി എന്നിവരും ചിത്രത്തിൽ പ്രധാന വേഷങ്ങളിൽ അണിനിരക്കുന്നുണ്ട്. ചിത്രം നവംബർ 20-ന് സീ സിനിമാസ് തീയേറ്ററുകളിൽ എത്തിക്കും.