ഹൃദയാഘാതത്തെ തുടര്ന്ന് ശ്രീനിവാസന് കൊച്ചയിലെ ആസ്റ്റര് മെഡിസിറ്റിയില് ചികിത്സയില്; ആരോഗ്യനില മെച്ചപ്പെട്ടുവരുന്നു
നടനും സംവിധായകനും തിരക്കഥാകൃത്തുമായ ശ്രീനിവാസനെ ഹൃദയാഘാതത്തെ തുടര്ന്ന് ആശുപത്രിയില് പ്രവേശിപ്പിച്ചു. കൊച്ചയിലെ ആസ്റ്റര് മെഡിസിറ്റിയിലാണ് ശ്രീനിവാസന് ചികില്സയിലുള്ളത്. അരോഗ്യ നിലയില് ആശങ്ക വേണ്ടെന്നാണ് ആശുപത്രി അറിയിച്ചത്. അറുപത്തിയൊന്നുകാരനായ ശ്രീനിവാസനെ ഇന്നലെ രാത്രിയാണ് ആശുപത്രിയില് പ്രവേശിപ്പിച്ചത്. ഐസിയുവിലാണ് ശ്രീനിവാസന് ഇപ്പോഴുള്ളത്. നിരീക്ഷണത്തിന് വേണ്ടിയാണ് ഐസിയുവില് പ്രവേശിപ്പിച്ചിരിക്കുന്നതെന്നും ആരോഗ്യനിലയില് മറ്റ് പ്രശ്നമില്ലെന്നും ആശുപത്രി അധികൃതര് വിശദീകരിച്ചു.
മലയാള സിനിമയില് സമസ്ത മേഖലകളിലും തിളങ്ങിയയാളാണ് ശ്രീനിവാസന്. കേരളത്തിലെ കണ്ണൂര് ജില്ലയിലെ തലശ്ശേരിക്കടുത്ത് പാട്യം എന്ന സ്ഥലത്താണ് ശ്രീനിവാസന് ജനിച്ചത്. പിതാവ് ഉണ്ണി സ്കൂള് അദ്ധ്യാപകനും, അറിയപ്പെടുന്ന കമ്മ്യൂണിസ്റ്റുകാരനുമായിരുന്നു. മാതാവ് ലക്ഷ്മി ഒരു വീട്ടമ്മയായിരുന്നു. തന്റെ സ്കൂള് ജീവിതം ശ്രീനി കതിരൂര് ഗവ. സ്കൂളിലും, കലാലയജീവിതം പഴശ്ശിരാജ എന്. എസ്സ്. എസ്സ്. കോളേജിലുമാണ് പൂര്ത്തിയാക്കിയത്. പിന്നീട് അദ്ദേഹം മദ്രാസിലെ ഫിലിം ചേംബര് ഇന്സ്റ്റിറ്റിയൂട്ടില് നിന്നും സിനിമാ അഭിനയത്തില് ഡിപ്ലോമ എടുത്തു.
സിനിമാരംഗത്തേക്ക് ശ്രീനിവാസന് പ്രവേശിക്കുന്നത് അഭിനയ ഡിപ്ലോമ കഴിഞ്ഞതിനു ശേഷം 1977 ല് പി. എ. ബക്കര് സംവിധാനം ചെയ്ത മണിമുഴക്കം എന്ന ചിത്രത്തിലൂടെയാണ്. ഇന്സ്റ്റിറ്റിയൂട്ടില് അദ്ദേഹത്തിന് അഭിനയപാഠങ്ങള് പഠിപ്പിച്ചത് പ്രധാനമായും അവിടുത്തെ അക്കാലത്തെ വൈസ് പ്രിന്സിപ്പള് ആയിരുന്ന എ. പ്രഭാകരന് ആയിരുന്നു. പിന്നീട് അദ്ദേഹം തന്നെ ശ്രീനിവാസന് തന്റെ തന്നെ മേള എന്ന സിനിമയില് അഭിനയിക്കാന് അവസരം കൊടുക്കുകയും ചെയ്തു.
കുറച്ചു ചെറിയ വേഷങ്ങള്ക്കു ശേഷം ശ്രീനി 1984ല് ഓടരുതമ്മാവാ ആളറിയും എന്ന സിനിമക്ക് കഥ എഴുതി. ഇതോടെ മലയാള സിനിമയിലെ കഥാകൃത്തുക്കളില് പ്രധാനിയായി ശ്രീനിവാസന് മാറി. ഇതിനിടെയില് നടനായും മലയാളികളെ ചിരിപ്പിച്ചു. സംവിധാനം ചെയ്ത ചിത്രങ്ങളും സൂപ്പര് ഹിറ്റുകളായി.
ആക്ഷേപ ഹാസ്യത്തിലൂടെ സമൂഹത്തിലെ തിന്മകള്ക്കെതിരെ പോരാടുകയായിരുന്നു ശ്രീനിവാസന്. മകന് വിനീത് ശ്രീനിവാസനും പിന്നീട് അച്ഛന്റെ വഴിയേ നടനും തിരക്കഥാകൃത്തും സംവിധായകനുമായി. ഗായകനുമാണ്. രണ്ടാമത്തെ മകന് ധ്യാന് ശ്രീനിവാസനും സിനിമയില് പിഴച്ചില്ല.
https://www.facebook.com/Malayalivartha
