കുട്ടികള്‍ക്കും മുതിര്‍ന്നവര്‍ക്കും ഒരുപോലെ വരുന്ന രോഗമാണ് ചുമ.ചുമയെ തന്നെ രണ്ടു വിധത്തില്‍ തരം തിരിയ്ക്കാം. കഫക്കെട്ടുള്ള ചുമയും വരണ്ട ചുമയും. വരണ്ട ചുമ ഡ്രൈ കഫ് എന്നാണ് അറിയപ്പെടുന്നത്. അലര്‍ജിയുള്ളവര്‍ക്ക് ഡ്രൈ കഫ് സാധാരണമാണ്.
കഫക്കെട്ടുള്ള ചുമയ്ക്ക പലര്‍ക്കും ആന്റിബയോട്ടിക് മരുന്നുകള്‍ കഴിയ്‌ക്കേണ്ടി വരാറുണ്ടെങ്കിലും വരണ്ട ചുമ ഇത്രത്തോളം അപകടകാരിയല്ല. എന്നിരുന്നാലും കൊറോണ വൈറസ് ബാധയുടെ പശ്ചാത്തലത്തിൽ, നിങ്ങൾക്കു വരണ്ട ചുമ ഉണ്ടെങ്കിൽ മറ്റു ലക്ഷണങ്ങളായ കടുത്ത പനി, രുചിയും ഗന്ധവും നഷ്ടപ്പെടുന്ന അവസ്ഥ, ശ്വാസതടസം, ഉദരപ്രശ്നങ്ങൾ ഇവയും ഉണ്ടോ എന്ന് നോക്കേണ്ടതാണ് . ഇവയൊന്നും ഇല്ലെങ്കിൽ സ്വാഭാവികമായ പ്രതിവിധികളിലൂടെ വരണ്ട ചുമയെ നിയന്ത്രിക്കാം

പെട്ടെന്നുണ്ടാവുന്ന കാലാവസ്ഥാ വ്യതിയാനങ്ങളോടുള്ള പ്രതികരണമാണ്‌ ചുമ, ജലദോഷം, പനി എന്നിങ്ങനെയുള്ള ലക്ഷണങ്ങൾ ..സാധാരണയായി മിക്ക ആളുകളിലും ഉണ്ടാകാറുള്ള കഫ ചുമയിൽ നിന്നും അൽപം വ്യത്യസ്തമാണ് വരണ്ട ചുമ. പ്രധാനമായും ചുമയ്ക്കുമ്പോൾ ഇത് കഫത്തെ പുറംതള്ളുന്നില്ല എന്നതാണ് വ്യത്യാസം. സ്വാഭാവികമായും തൊണ്ടയിലുണ്ടാകുന്ന ചെറിയ അസ്വസ്ഥതകളും തരിതരിപ്പും ഒക്കെ ഒരാളിൽ ചുമയ്ക്കാനുള്ള പ്രവണത ഉണ്ടാക്കുന്നു.

വരണ്ട ചുമയ്ക്കുള്ള ചില സ്വാഭാവിക പരിഹാരങ്ങൾ ഇവയാണ്

1. ഇഞ്ചി

ഇഞ്ചിയിൽ ആൻറി ബാക്ടീരിയൽ, ആൻറി ഇൻഫ്ലമേറ്ററി ഗുണങ്ങൾ ഉണ്ട്. ചുമയെ പ്രതിരോധിക്കാനും പ്രതിരോധശേഷി വർദ്ധിപ്പിക്കാനും ഇത് സഹായിക്കുന്നു. വരണ്ട ചുമ ഉണ്ടാവുമ്പോൾ തൽക്ഷണ ആശ്വാസത്തിനായി നിങ്ങൾക്ക് ഒരു കപ്പ് ചൂടുള്ള ഇഞ്ചി ചായ തയ്യാറാക്കി കുടിക്കാം. അതുപോലെ തന്നെ നിങ്ങൾ ദിവസവും കഴിക്കുന്ന വ്യത്യസ്ത ഭക്ഷണങ്ങളിൽ ഇഞ്ചി ചേർക്കുന്നത് വഴി ചുമയുടെ പ്രശ്നങ്ങളിൽ നിന്ന് വളരെ എളുപ്പം ആശ്വാസം കണ്ടെത്താനാവും.

2. തേൻ

തേനിന് ആൻറി ബാക്ടീരിയൽ ഗുണങ്ങളുണ്ട്. ചുമയ്ക്ക് കാരണമാകുന്ന ശരീരത്തിലെ അണുബാധകളെ പ്രതിരോധിക്കാൻ ഇത് സഹായിക്കും. ദൈനംദിനമുള്ള നിങ്ങളുടെ ഭക്ഷണത്തിൽ തേൻ ചേർക്കുന്നത് ചുമ കുറയാൻ സഹായിക്കും . ഏതെങ്കിലും ഹെർബൽ ടീ അല്ലെങ്കിൽ ഇഞ്ചി ചായയിലേക്ക് നിങ്ങൾക്ക് കുറച്ച് തേൻ ചേർക്കാവുന്നതാണ്. ചുമയുള്ളപ്പോൾ ഇഞ്ചിനീരും തേനും ചേർത്ത മിശ്രിതം കഴിക്കുന്നതും ഫലപ്രദമായ പ്രതിവിധിയാണ്. ഒരു ടേബിൾ സ്പൂൺ തേനിൽ കുറച്ച് തുള്ളി ഇഞ്ചി നീര് കലർത്തി ദിവസത്തിൽ ഒരു തവണ വീതം കഴിച്ചാൽ വരണ്ട ചുമയുടെ പ്രശ്നങ്ങളിൽനിന്ന് വേഗം സുഖം പ്രാപിക്കാനാകും.

3. മഞ്ഞൾ

ഒട്ടുമിക്ക ആരോഗ്യപ്രശ്നങ്ങൾക്കും ഉള്ള പ്രതിവിധിയാണ് മഞ്ഞൾ. വരണ്ട ചുമയുടെ പ്രശ്നങ്ങളെ നേരിടാൻ ഒരു ഗ്ലാസ് ചൂടുള്ള മഞ്ഞൾ പാൽ അല്ലെങ്കിൽ മഞ്ഞൾ ചേർത്ത ചായ കുടിക്കുന്നത് രീതി ഫലപ്രദമാണ്.

4. ആവി പിടിക്കൽ

ആവി പിടിക്കുന്നത് ഏതു തരാം ചുമയിൽ നിന്നും പെട്ടെന്ന് ആശ്വാസം കണ്ടെത്താൻ സഹായിക്കും .ജലദോഷവും മൂക്കൊലിപ്പും ഒക്കെ ഉള്ളപ്പോൾ ഉപയോഗിക്കാൻ കഴിയുന്ന ഏറ്റവും പ്രകൃതിദത്തമായ പ്രതിരോധ മാർഗ്ഗം കൂടിയാണ് ആവി പിടിക്കൽ.

5. ഉപ്പുവെള്ളം

വരണ്ട ചുമയെ പ്രതിരോധിക്കാനായി ഉപ്പുവെള്ളം വായിൽ കൊള്ളുന്നത് ഒരു പ്രധാന പ്രതിരോധ മാർഗമാണ്. ഉപ്പിൽ അടങ്ങിയിരിക്കുന്ന ധാതുക്കളെല്ലാം വരണ്ട ചുമയുടെ ലക്ഷങ്ങളെ പെട്ടെന്ന് കുറയ്ക്കാൻ ശേഷിയുള്ളവയാണ്.

6. രോഗപ്രതിരോധ ശേഷി വർദ്ധിപ്പിക്കുന്ന ഭക്ഷണങ്ങൾ

വരണ്ട ചുമയെ എളുപ്പത്തിൽ നേരിടാൻ ഏറ്റവും ആദ്യം വേണ്ടത് ശക്തമായ രോഗപ്രതിരോധ ശേഷിയാണ്. രോഗപ്രതിരോധ ശേഷിക്കായി വിറ്റാമിൻ സി അടങ്ങിയ ഭക്ഷണങ്ങൾ കൂടുതൽ കഴിക്കാൻ ശ്രമിക്കുക. ചീര, ബ്രൊക്കോളി, മീൻ, മുട്ട, എന്നിവയെല്ലാം പ്രതിരോധശേഷി വർദ്ധിപ്പിക്കാൻ ഏറെ മികച്ചതാണ്. ആരോഗ്യകരമായതും സന്തുലിതമായതുമായ ഭക്ഷണക്രമം രോഗപ്രതിരോധ ശേഷി വർദ്ധിപ്പിച്ചുകൊണ്ട് രോഗങ്ങളെ ഒരു പരിധിവരെ പ്രതിരോധിക്കാൻ സഹായിക്കും.

ശൈത്യകാല ദിനങ്ങളിലാണ് ചുമയുടെ പ്രശ്നങ്ങൾ എല്ലാവരേയും കൂടുതലായി വേട്ടയാടുന്നത്. ശരീര താപനിലയിൽ പെട്ടെന്ന് കടന്നുവരുന്ന മാറ്റം അല്ലെങ്കിൽ ശരീരത്തിലെ അണുബാധയുടെ വർദ്ധനവ് എന്നിവയൊക്കെ ഇതിന് ഒരു കാരണമാകുന്നുണ്ട്.

ഈ പ്രതിവിധികൾ ഉപയോഗിച്ചിട്ടും നിങ്ങളുടെ ചുമയുടെ ലക്ഷണങ്ങൾക്ക് കുറവില്ല എങ്കിൽ തീർച്ചയായും വൈദ്യസഹായം തേടണം . ഒരുപക്ഷേ മറ്റേതെങ്കിലും ആരോഗ്യ പ്രശ്നങ്ങളുടെ സൂചന ആയിരിക്കാം. അത്തരമൊരു സാഹചര്യത്തിൽ ഒരു ഡോക്ടറെ കണ്ട് ആവശ്യമായ പരിശോധനകൾ നടത്തുകയും വേണ്ട നിർദ്ദേശങ്ങൾ സ്വീകരിക്കേണ്ടതും അത്യാവശ്യമാണ്.