ഇറാനില്‍ വിഷാംശം കലര്‍ന്ന മദ്യം കുടിച്ചുണ്ടായ ദുരന്തത്തില്‍ മരിച്ചവരുടെ എണ്ണം 42 ആയി. വിഷമദ്യം കഴിച്ച 16 പേരുടെ കാഴ്ച നഷ്ടപ്പെട്ടു. ആശുപത്രിയില്‍ പ്രവേശിപ്പിച്ച 170ലേറെ പേര്‍ക്കും ഡയാലിസിസ് നടത്തിയതായാണ് റിപ്പോര്‍ട്ട്.
രാജ്യത്തെ അഞ്ചു പ്രവിശ്യകളിലായാണു വിഷമദ്യ ദുരന്തം റിപ്പോര്‍ട്ട് ചെയ്തത്. ടോക്‌സിക് മെഥനോള്‍ കലര്‍ന്ന മദ്യം ഉപയോഗിച്ചവര്‍ക്കാണ് അപകടം സംഭവിച്ചത്. ഇവരില്‍ ഏറെപ്പേര്‍ക്കും കിഡ്‌നി സംബന്ധമായ പ്രശ്‌നങ്ങളാണ് ഉണ്ടായതെന്നാണ് വിവരം.

മദ്യനിരോധനം പ്രാബല്യത്തിലുള്ള ഇറാനില്‍ നടക്കുന്ന ഏറ്റവും വലിയ മദ്യദുരന്തമാണിത്. 1979ലെ വിപ്ലവത്തിനുശേഷം ഇറാനില്‍ മദ്യം നിരോധിച്ചിരുന്നു. നിയമ ലംഘനം നടത്തുന്നവര്‍ക്ക് ചാട്ടയടിയും വന്‍തുക പിഴയുമാണ് ശിക്ഷയായി നല്‍കുക.