അമേരിക്ക-മെക്സിക്കോ അതിർത്തിയിൽ മതിൽ കെട്ടുവാനുള്ള ഫണ്ട് രൂപീകരണത്തിന് പുതിയ വഴിയുമായി പ്രസിഡന്റ് ഡൊണാൾഡ്​ ട്രംപ് രംഗത്തെത്തിയിരിക്കുകയാണ്. യു.എസിലുള്ള അനധികൃത കുടിയേറ്റക്കാരെ മൂന്ന്​ വർഷത്തേക്ക്​ സംരക്ഷിക്കാമെന്നും പകരം മെക്​സികോ അതിർത്തിയിൽ മതിൽ പണിയാനുള്ള ഫണ്ടിലേക്ക്​ 5.7 ബില്യൺ ഡോളർ നൽകണമെന്നുമാണ് ട്രംപിന്റെ ഒത്തുതീർപ്പ് ഉടമ്പടി.

മതിലി​ന്​ ഫണ്ട്​ അനുവദിക്കുന്നതിന്റെ പേരിൽ ഒരു മാസത്തിലേറെയായി രാജ്യത്ത്​ നിലനിൽക്കുന്ന ഭാഗിക ഭരണസ്​തംഭനം ഒഴിവാക്കാൻ ഈ നിർദേശം സഹായിക്കുമെന്നാണ്​ ട്രംപി​ന്റെ വിലയിരുത്തൽ. യു.എസ്​ എന്നും കുടിയേറ്റക്കാരെ സ്വീകരിച്ച ചരിത്രമാണുള്ളതെന്നും എന്നാൽ ഇപ്പോൾ കുടിയേറ്റം​ അമേരിക്കയെ തന്നെ തകർക്കുന്ന നിലയിൽ അധ:പതിച്ചുവെന്നും ട്രംപ്​​ പറഞ്ഞു. അതിർത്തി മുഴുവനായും മതിൽ കെട്ടി അടക്കുകയല്ല, ശക്​തമായ സുരക്ഷ ആവശ്യമുള്ളിടത്തു മാത്രം സ്​റ്റീലുകൊണ്ടുള്ള മതിൽ പണിയുകയാണ്​ ചെയ്യുന്നതെന്നും ട്രംപ്​ വ്യക്​തമാക്കി. എന്നാൽ അതിന്​ 5.7 ബില്യൺ ഡോളർ ആവശ്യമാണ്​.

ഏഴ്​ ലക്ഷത്തോളം പേരാണ്​ യു.എസിലേക്ക്​ പങ്കാളികളുമായി അനധികൃതമായി കുടിയേറിയത്​. ഇവർക്ക്​ പൗരത്വമില്ലാതെ യു.എസിൽ ജോലി ചെയ്യാം എന്ന നിയമമനുസരിച്ച്​ നാടുകടത്തലിൽ നിന്ന്​ സംരക്ഷണമുണ്ട്​. ഈ സംരക്ഷണം അടുത്ത മൂന്ന്​ വർഷത്തേക്ക്​ കൂടി നീട്ടി ജോലി ചെയ്യാൻ അനുവാദം നൽകാം എന്നാണ്​ ട്രംപിന്റെ ഒത്തു തീർപ്പ്​ വ്യവസ്​ഥ. അതിനു പകരം മതിൽ കെട്ടുന്നതിലേക്കുള്ള 5.7 ബില്യൺ ഡോളർ നൽകണം.

യുദ്ധക്കെടുതികൾ അനുഭവിക്കുന്ന രാജ്യങ്ങളിൽ നിന്നുള്ള മൂന്ന്​ ലക്ഷത്തോളം വരുന്ന കുടിയേറ്റക്കാർക്കും വിസ മൂന്ന്​ വർഷത്തേക്ക്​ നീട്ടാമെന്നും ട്രംപ്​ വാഗ്​ദാനം ചെയ്​തു. വൈ​റ്റ്ഹൗ​സി​ൽ ന​ട​ത്തി​യ 13 മി​നി​റ്റ് മാ​ത്രം ദൈ​ർ​ഘ്യ​മു​ള്ള അ​ഭി​സം​ബോ​ധ​ന​യി​ലാ​ണ് ട്രം​പ് ഇ​ക്കാ​ര്യം വ്യ​ക്ത​മാ​ക്കി​യ​ത്. അ​തേ​സ​മ​യം പ്ര​സിഡന്റ്​ സം​സാ​രി​ക്കു​ന്ന​തി​ന് മു​മ്പ്​ ത​ന്നെ വാ​ഗ്ദാ​ന​ങ്ങ​ൾ ഒ​ന്നും സ്വീ​ക​രി​ക്കി​ല്ലെ​ന്ന് സ്പീ​ക്ക​ർ നാ​ൻ​സി പെ​ലോ​സി വ്യ​ക്ത​മാ​ക്കി​യി​രു​ന്നു.