യുഎസ് നയതന്ത്ര ഉദ്യോഗസ്ഥന്‍ ഗോര്‍ഡണ്‍ സണ്‍ലാന്റിന്റെ മൊഴി ഇംപീച്ച്‌മെന്റ് നടപടിയില്‍ ട്രംപിന് തിരിച്ചടി ആയേക്കും
ഇംപീച്ച്‌മെന്റ് നടപടി നേരിടുന്ന ട്രംപിന്റെ, രാഷ്ട്രീയ എതിരാളിയും മുന്‍ യുഎസ് വൈസ്പ്രസിഡന്റുമായ ജോ ബൈഡനെതിരെ വ്യാജ കേസുണ്ടാക്കാന്‍ യുക്രൈനുമേല്‍ സമ്മര്‍ദ്ദം ചെലുത്തിയതായി നയതന്ത്ര ഉദ്യോഗസ്ഥന്റെ സ്ഥിരീകരണം. യുറോപ്യന്‍ യൂണിയനിലെ യുഎസ് നയതന്ത്ര ഉദ്യോഗസ്ഥന്‍ ഗോര്‍ഡണ്‍ സണ്‍ലാന്റ് മൂന്നംഗ അന്വേഷണ സമിതിക്കു നല്‍കി മൊഴിയില്‍, ബൈഡനെതിരെ അന്വേഷണം പ്രഖ്യാപിക്കാന്‍ ട്രംപ് ഭരണകൂടം യുക്രൈനു മേല്‍ സമ്മര്‍ദം ചെലുത്തിയിരുന്നതായി ഉറപ്പിച്ചു പറഞ്ഞു.
ജോ ബൈഡനും മകനുമെതിരെ അന്വേഷണം പ്രഖ്യാപിക്കാതെ 400 ദശലക്ഷം ഡോളറിന്റെ സാമ്പത്തിക സഹായം അനുവദിക്കില്ലെന്ന് യുക്രൈനെ അറിയിച്ചിരുന്നതായി സണ്‍ലാന്റ് പറഞ്ഞു. ഇത്തരം നീക്കുപോക്കുകളെ കുറിച്ച് അറിയില്ലെന്ന ആദ്യമൊഴിയാണ് സണ്‍ലാന്റ് തിരുത്തിയത്.
അതേസമയം, യുഎസ് അംബാസിഡറുടെ മൊഴി വൈറ്റ്ഹൗസ് തള്ളി. ആധികാരികതയില്ലാത്ത മൊഴികളും ഏകപക്ഷീയ മാധ്യമവാര്‍ത്തകളും കൊണ്ട് സത്യം മറക്കാനാകില്ലെന്ന് വൈറ്റ്ഹൗസ് പ്രസ്താവനയില്‍ വ്യക്തമാക്കി. ട്രംപിനെതിരെയുള്ള ഇംപീച്ച്‌മെന്റ് നടപടിയില്‍ ഏറെ നിര്‍ണായകമാകും ഈ മൊഴി.
യുഎസ് ചരിത്രത്തില്‍ രണ്ടു പ്രസിഡന്റുമാരാണ് ഇതുവരെ ഇംപീച്ച്‌മെന്റിന് വിധേയരായിട്ടുള്ളത്. ഏബ്രഹാം ലിങ്കന്റെ മരണശേഷം അധികാരമേറ്റ ആന്‍ഡ്രു ജോണ്‍സനും ലൈംഗിക വിവാദത്തില്‍പെട്ട ബില്‍ ക്ലിന്റണും.
https://www.facebook.com/Malayalivartha
