പുതിയ റീലുമായി ഇൻഫ്ലുവൻസറും നടനുമായ അഖിൽ എൻആർഡി രംഗത്ത്. ‘ചിരിച്ചേ ചിരിച്ചേ’ എന്ന അടിക്കുറിപ്പോടെയാണ് അഖിൽ തന്റെ പുതിയ വീഡിയോ സമൂഹമാധ്യമ അക്കൗണ്ടുകളിൽ പങ്കുവച്ചിരിക്കുന്നത്. പോസ്റ്റ് ചെയ്ത് നിമിഷങ്ങൾക്കകം തന്നെ റീൽ ഇൻസ്റ്റാഗ്രാമിൽ തരംഗമായി മാറി.ഒരു സുഹൃത്തിന്റെ ഗൃഹപ്രവേശനച്ചടങ്ങിലേക്ക് ഫോട്ടോഗ്രാഫറായ മറ്റൊരു സുഹൃത്തിനെ ക്ഷണിക്കാൻ എത്തുന്നതാണ് റീലിന്റെ പ്രമേയം. ചടങ്ങിലേക്ക് വരാമെന്ന് ഏൽക്കുമ്പോൾ, "വരുമ്പോൾ ക്യാമറ കൂടി കൊണ്ടുവരണം" എന്ന് സുഹൃത്ത് ആവശ്യപ്പെടുന്നു.

അതായത്, ചടങ്ങിൽ സുഹൃത്തിന്റെ സാന്നിധ്യത്തേക്കാൾ ഉപരി അദ്ദേഹത്തിന്റെ ക്യാമറ മാത്രമാണ് ആവശ്യപ്പെടുന്നത് എന്ന യാഥാർത്ഥ്യമാണ് വീഡിയോയിലൂടെ തമാശരൂപേണ അവതരിപ്പിക്കുന്നത്. ഒടുവിൽ 'ചിരിച്ചേ ചിരിച്ചേ' എന്ന് പറഞ്ഞ് ഒരു ചെറുചിരിയോടെയാണ് അഖിൽ വീഡിയോ അവസാനിപ്പിക്കുന്നത്.വ്യക്തിജീവിതത്തിൽ അപ്രതീക്ഷിതമായി ഉണ്ടായ തിരിച്ചടികൾക്കും തർക്കങ്ങൾക്കും ശേഷമാണ് അഖിൽ പുതിയ റീലുമായി പ്രേക്ഷകർക്ക് മുന്നിലെത്തുന്നത്. ദാമ്പത്യജീവിതത്തിലുണ്ടായ പ്രശ്നങ്ങളിൽ ഇതുവരെയും പരസ്യ പ്രതികരണത്തിന് അഖിൽ തയ്യാറായിരുന്നില്ല.

വിവാദങ്ങൾക്ക് ശേഷം ഇതാദ്യമായാണ് അദ്ദേഹംതന്റെ സോഷ്യൽ മീഡിയ പേജിൽ ഒരു റീൽ പങ്കുവയ്ക്കുന്നത് എന്നതും ശ്രദ്ധേയമാണ്.വീഡിയോയ്ക്ക് താഴെ വലിയ പിന്തുണയുമായി ആരാധകരും സെലിബ്രിറ്റികളും ഉൾപ്പെടെയുള്ളവർ കമന്റ് ബോക്സിൽ എത്തുന്നുണ്ട്. നടൻ കാളിദാസ് ജയറാം, ഗായിക ഹനാൻ ഷാ, ഇൻഫ്ലുവൻസർമാരായ ദിയ കൃഷ്ണ, അപർണ തോമസ് തുടങ്ങി നിരവധി പ്രമുഖരാണ് അഖിലിന് പിന്തുണയുമായി രംഗത്തെത്തിയത്. തങ്ങളുടെ സ്നേഹവും ഐക്യദാർഢ്യവും അറിയിച്ചുകൊണ്ട് കമന്റുകളുടെ പ്രവാഹമാണ് പോസ്റ്റിന് താഴെയുള്ളത്.

അഖിലിന് സമൂഹമാധ്യമങ്ങളിൽ ലഭിക്കുന്ന വൻ ജനപ്രീതി തെളിയിക്കുന്നതാണ് ഈ റീലിന്റെ വ്യൂസ്. പോസ്റ്റ് ചെയ്ത് വെറും ഒരു മണിക്കൂറിനകം തന്നെ 5 മില്യണിലധികം (50 ലക്ഷം) ആളുകളാണ് ഈ വീഡിയോ കണ്ടത്.ഇപ്പോൾ ഏകദേശം 21 മില്യൺ കാഴ്ചക്കാർ ആയിട്ടുണ്ട്. പ്രതിസന്ധികൾക്കിടയിലും തങ്ങളുടെ പ്രിയപ്പെട്ട ഇൻഫ്ലുവൻസറെ ചേർത്തുപിടിക്കുന്ന കാഴ്ചയ്ക്കാണ് സമൂഹമാധ്യമങ്ങൾ ഇപ്പോൾ സാക്ഷ്യം വഹിക്കുന്നത്.എന്തായാലും ഈ ഒരു പ്രതികരണം നമ്മുടെ പഴയ തലമുറയിൽ നിന്നും ലഭിക്കുകയില്ലായിരുന്നു.

അവനെ പരിഹാസിക്കാനുള്ള മറ്റൊരു അവസരമായി മാത്രമേ മുൻ തലമുറയിലെ ആളുകൾ ഇതിനെ കാണുകയുണ്ടായിരുന്നുള്ളു. എന്നാൽ ഇപ്പോഴത്തെ കുട്ടികൾ എത്ര പക്വമായിട്ടാണ് പ്രതികരിക്കുന്നത് എന്ന് നോക്കൂ. തിരിച്ചടികളിൽ തളരാതെ എല്ലാം ചിരിച്ചുകൊണ്ട് നേരിടുന്ന അഖിലിന്റെ ഈ ഗംഭീര തിരിച്ചുവരവിനെ പ്രമുഖ താരങ്ങളും ആരാധകരും ഒന്നടങ്കം നെഞ്ചിലേറ്റി കഴിഞ്ഞുഅഖിൽ ആരെയും കുറ്റപ്പെടുത്തില്ല, അതാണ് അവന്റെ ക്യാരക്ടർ. ഈ കേസിലും അഖിലിനു പറയാനുള്ളത്, “പോയത് പോയി, കഴിഞ്ഞത് കഴിഞ്ഞു” എന്നതാണ്.