ചരിത്രത്തിലെ ഏറ്റവും വലിയ വേലിയേറ്റം നേരിട്ടുകൊണ്ടിരിക്കുന്ന ഇറ്റലിയിലെ പൈതൃക നഗരമായ വെനീസ് 70 ശതമാനവും മുങ്ങി. നഗരത്തിലെ പലയിടങ്ങളിലും ജലനിരപ്പ് ആറടി വരെ ഉയര്‍ന്നു. ഇവിടത്തെ ചരിത്രപ്രാധാന്യമുള്ള ബസിലിക്കയ്ക്കും വെള്ളക്കെട്ട് കാരണം കാര്യമായ കേടുപാടുകള്‍ സംഭവിച്ചിട്ടുണ്ട്.

അര നൂറ്റാണ്ടിനിടെ ഉണ്ടായ ഏറ്റവും വലിയ പ്രളയത്തില്‍, 13-ാം നൂറ്റാണ്ടു മുതല്‍ 17-ാം നൂറ്റാണ്ടു വരെ കലാ സാംസ്‌കാരിക തലസ്ഥാനമായിരുന്ന വെനീസിന്റെ വിലമതിക്കാനാകാത്ത ചരിത്ര, കലാ സൃഷ്ടികള്‍ കൂടിയാണ് കടലെടുക്കുന്നത്. രാജ്യത്തിന്റെ ഹൃദയത്തിനേറ്റ കനത്ത ആഘാതമെന്നാണ് വെനീസിലെ പ്രളയത്തെ ഇറ്റാലിയന്‍ പ്രധാനമന്ത്രി യൂസപ്പെ കോണ്‍ടെ വിശേഷിപ്പിച്ചത്.

1966-ലെ വെള്ളപ്പൊക്കത്തിനു ശേഷം ആദ്യമായാണ് വെനീസ് വെള്ളത്തിനടിയിലാകുന്നത്. മധ്യ, നവോത്ഥാന കാലഘട്ടങ്ങളില്‍ ലോകത്തിലെ നിര്‍ണായക സാമ്പത്തിക ശക്തിയും മുഖ്യ വാണിജ്യകേന്ദ്രവുമായിരുന്നു വെനീസ്. 1866 മുതലാണ് ഇറ്റലിയുടെ ഭാഗമായി മാറിയത്.  തിരമാലകള്‍ക്കൊപ്പം ശക്തമായ കാറ്റും പേമാരിയും വന്നതോടെ നഗരത്തിലെ വിനോദ സഞ്ചാര കേന്ദ്രങ്ങള്‍ ഉള്‍പ്പെടെ പലയിടത്തും വെള്ളം കയറുകയായിരുന്നു. വെള്ളക്കെട്ടില്‍ നൂറ്റാണ്ടോളം പഴക്കമുള്ള ചരിത്ര നിര്‍മിതികള്‍ക്കു കാര്യമായ കേടുപാടുണ്ട്. കനത്ത മഴയും വെള്ളക്കെട്ടും തുടര്‍ന്നാല്‍ ചരിത്രനഗരം കാലക്രമേണേ നിലംപൊത്തുമെന്നാണ് പലരുടെയും ആശങ്ക. വിലമതിക്കാനാകാത്ത ചരിത്രശേഷിപ്പുകളാണ് വെള്ളപ്പൊക്കത്തില്‍ വെനീസില്‍ നിന്നു തുടച്ചുമാറ്റപ്പെടുന്നത്.

അഡിയാറ്റിക്കിന്റെ രാജ്ഞി, ജലത്തിന്റെ നഗരം, പ്രകാശത്തിന്റെ നഗരം എന്ന വിളിപ്പേരുകളില്‍ അറിയപ്പെടുന്ന വെനീസില്‍ ഉപ്പുവെള്ളം കയറിയതിനെ തുടര്‍ന്ന് ഇതുവരെ ഏകദേശം നൂറുകോടി യൂറോയുടെ നഷ്ടമാണ് കണക്കാക്കുന്നത്. യുനെസ്‌കോ ലോക പൈതൃക പട്ടികയില്‍ ഉള്‍പ്പെടുത്തിയ വെനീസില്‍ ഇറ്റാലിയന്‍ നവത്ഥോന കാലഘട്ടത്തിലെ മഹാരഥന്‍മാരുടെ വിലമതിക്കാനാകാത്ത സാഹിത്യ, കലാസൃഷ്ടികളുടെ എണ്ണമറ്റ ശേഖരമുണ്ട്.

സഞ്ചാരികളുടെ പ്രധാന ആകര്‍ഷണ കേന്ദ്രമായ സെന്റ് മാര്‍ക് സ്്്ക്വയര്‍ അടച്ചു. 1000 വര്‍ഷം പഴക്കമുളള സെന്റ് മാര്‍ക്‌സ് ബസിലിക്കയ്ക്കും പൗരാണിക സൗധങ്ങള്‍ക്കും വ്യാപാരസ്ഥാപനങ്ങള്‍ക്കും വീടുകള്‍ക്കും ഉപ്പുവെള്ളം കയറി നാശമുണ്ടായി. വ്യാപാര സ്ഥാപനങ്ങളും ചരിത്രസ്മാരകങ്ങളും ഉള്‍പ്പെടെ വെള്ളത്തിലായി. വിനോദ സഞ്ചാരികള്‍ പുനരധിവാസ കേന്ദ്രങ്ങളില്‍ അഭയം തേടി. അരലക്ഷത്തോളം ജനസംഖ്യയുള്ള വെനീസില്‍ പ്രതിവര്‍ഷം ശരാശരി മൂന്നരക്കോടിയോളം സന്ദര്‍ശകരാണ് എത്തുന്നത്.