ഓസ്ട്രേലിയയില്‍ ഒരു കഫെയില്‍ തട്ടം ധരിച്ച മൂന്നു സ്ത്രീകള്‍ സംസാരിച്ചുകൊണ്ടിരിക്കവേ സ്ഥലത്തേക്കു വന്ന ഒരാള്‍ യാതൊരു പ്രകോപനവുമില്ലാതെ അവരോടൊപ്പമുണ്ടായിരുന്ന പൂര്‍ണ്ണ ഗര്‍ഭിണിയെ ആക്രമിച്ചു. ബുധനാഴ്ച സിഡ്നിയിലാണ് സംഭവം. വന്നയാള്‍ ഇവരുമായി തര്‍ക്കമുണ്ടാക്കുകയും 31-കാരിയെ ഇടിച്ചുവീഴ്ത്തുകയുമാണ് ചെയ്തത്. വീണ യുവതിയെ ഇയാള്‍ നിലത്തിട്ടു ചവിട്ടി.

മറ്റുള്ളവര്‍ പിടിച്ചുമാറ്റാന്‍ ശ്രമിച്ചുവെങ്കിലും കരുത്തനായ ഇയാള്‍ ആക്രമണം തുടര്‍ന്നു. പിന്നെ ഏറെ ശ്രമപ്പെട്ടാണ് കഫെയിലുണ്ടായിരുന്നവര്‍ ചേര്‍ന്ന് ഇയാളെ പിടിച്ചുമാറ്റിയത്. പോലീസിനു കൈമാറിയ ഇയാളെ റിമാന്‍ഡ് ചെയ്തു. ആശുപത്രിയില്‍ പ്രവേശിപ്പിക്കപ്പെട്ട യുവതിയെ വിദഗ്ധ പരിശോധനയ്ക്കു ശേഷം വിട്ടയച്ചു.

38 ആഴ്ച ഗര്‍ഭിണിയായ യുവതിയെ ആക്രമിച്ചത് സ്റ്റിപ് ലാസിന (43) എന്ന യുവാവ് ആണ്. ആക്രമണത്തിന്റെ കാരണം വിശദീകരിക്കാന്‍ പോലീസ് വിസമ്മതിച്ചു. അതേസമയം, ഇസ്ലാമിക വിരുദ്ധതയുടെ പേരിലാണ് ഇയാള്‍ മുസ്ലീം വനിതയെ ആക്രമിച്ചതെന്ന് ഓസ്ട്രേലിയയിലെ പ്രമുഖ ഇസ്ലാമിക സംഘടനയായ ഓസ്ട്രേലിയന്‍ ഫെഡറേഷന്‍ ഓഫ് ഇസ്ലാമിക് കൗണ്‍സില്‍ ആരോപിച്ചു.

യുവതിക്കും സുഹൃത്തുക്കള്‍ക്കും നേരെ ഇസ്ലാമിക വിരുദ്ധ പരാമര്‍ശം നടത്തിയ ശേഷമാണ് അയാള്‍ ആക്രമിച്ചത്. 'മുസ്ലീങ്ങള്‍ എന്റെ അമ്മയെ ബലാല്‍സംഗം ചെയ്തവരാണ്' എന്നാണത്രേ അയാള്‍ പറഞ്ഞത്. ഇത്തരം വംശീയ, ഇസ്ലാംവിരുദ്ധ ആക്രമണങ്ങള്‍ തങ്ങള്‍ നിരന്തരം നേരിടുകയാണെന്നും സംഘടന കുറ്റപ്പെടുത്തി.