സുഡാനില്‍ എല്‍.പി.ജി ടാങ്കര്‍ പൊട്ടിത്തെറിച്ച് 23 പേര്‍ മരിച്ചു. ഇവരില്‍ 18 പേര്‍ ഇന്ത്യക്കാരാണെന്ന് ഖര്‍ത്തൂമിലെ ഇന്ത്യന്‍ എംബസി അധികൃതര്‍ അറിയിച്ചു. പൊട്ടിത്തെറിയില്‍ 130ലേറെ പേര്‍ക്ക് പരിക്കുണ്ട്. പരിക്കേറ്റ ഏഴ് ഇന്ത്യക്കാരില്‍ നാലുപേരുടെ നില ഗുരുതരമാണ്. തലസ്ഥാനമായ ഖര്‍ത്തൂമിലെ വ്യവസായ മേഖലയിലെ സീല സിറാമിക് ഫാക്ടറിയില്‍ ചൊവ്വാഴ്ചയാണ് അപകടം നടന്നത്. മരിച്ചവരുടെ മൃതദേഹങ്ങള്‍ പലതും തിരിച്ചറിയാന്‍ കഴിയാനാകാത്ത വിധം കത്തിക്കരിഞ്ഞ നിലയിലാണ്. മരണസംഖ്യ ഇനിയും ഉയര്‍ന്നേക്കും. 34 ഇന്ത്യക്കാര്‍ അപകടത്തില്‍നിന്ന് രക്ഷപ്പെട്ടുവെന്നാണ് റിപ്പോര്‍ട്ട്. ഇവരെ സുരക്ഷിത സ്ഥാനത്തേക്ക് മാറ്റിയതായി എംബസി അറിയിച്ചു.

പരിക്കേറ്റവരെ പ്രവേശിപ്പിച്ച ആശുപത്രികളില്‍ രക്ത ദാനത്തിന് എത്താന്‍ സര്‍ക്കാര്‍ പ്രദേശവാസികളോട് ആവശ്യപ്പെട്ടിട്ടുണ്ട്. വന്‍ ശബ്ദത്തോടെയായിരുന്നു സ്‌ഫോടനമെന്ന് പ്രദേശവാസികള്‍ പറയുന്നു. ഫാക്ടറി പരിസരത്ത് നിര്‍ത്തിയിട്ട വാഹനങ്ങളടക്കം കത്തിനശിച്ചു. തീപിടിക്കാന്‍ സാധ്യതയുള്ള വസ്തുക്കള്‍ അലക്ഷ്യമായി കൂട്ടിയിട്ടതാണ് അപകടകാരണമെന്ന് സര്‍ക്കാര്‍ അറിയിച്ചു. സംഭവത്തില്‍ അന്വേഷണം ആരംഭിച്ചിട്ടുണ്ട്.