35 വര്‍ഷങ്ങള്‍ക്കു മുമ്പ് ആകാശത്തുവെച്ച് അപ്രത്യക്ഷമായ അതേ വിമാനം ലാന്‍ഡ് ചെയ്തു. വിമാനത്തിന്റെ അകത്തെ കാഴ്ച ഞെട്ടിക്കുന്നത്. 1954 സെപ്റ്റംബര്‍ 4ന്, ജര്‍മനിയിലെ ആഹനില്‍ നിന്നും ബ്രസീലിലെ പോര്‍ട്ടോ അലെഗ്രിയിലേക്കാണ് സാന്റിയാഗോ ഫ്ലൈറ്റ് 513 പറന്നത്. 18 മണിക്കൂര്‍ കൊണ്ട് അലെഗ്രിയിലേക്ക് എത്താമായിരുന്ന വിമാനം അറ്റ്‌ലാന്‍ഡിക് സമുദ്രത്തിന് മുകളില്‍ വച്ച് അപ്രത്യക്ഷമാകുകയായിരുന്നു. വിമാനം കടലില്‍ തകര്‍ന്നു വീണിരിക്കാമെന്നും യാത്രക്കാര്‍ എല്ലാവരും മരിച്ചിരിക്കാമെന്നുമായിരുന്നു അധികൃതരുടെ നിഗമനം.

എന്നാല്‍ ഏവരേയും ഞെട്ടിച്ചു കൊണ്ട് 35 വര്‍ഷങ്ങള്‍ക്ക് ശേഷം അപ്രത്യക്ഷമായ അതേ വിമാനം പോര്‍ട്ടോ അലെഗ്രിയില്‍ ലാന്‍ഡ് ചെയ്തു.1989 നവംബര്‍ 14ന് ദ വീക്ക്‌ലി വേള്‍ഡ് ന്യൂസ് എന്ന ടാബ്ലോയിഡ് ആണ് ഈ വാര്‍ത്ത ആദ്യം റിപ്പോര്‍ട്ട് ചെയ്തത്. 1989 ഒക്ടോബര്‍ 12-നായിരുന്നു സംഭവം. പോര്‍ട്ടോ അലെഗ്രി എയര്‍പോര്‍ട്ടിന് മുകളില്‍ ഒരു വിമാനം വട്ടമിട്ട് പറക്കുന്നതായി എയര്‍ ട്രാഫിക് കണ്‍ട്രോളര്‍മാര്‍ കണ്ടതോടെയാണ് ശ്രദ്ധിച്ചത്. വിമാനം വിജയകരമായി റണ്‍വേയില്‍ ലാന്‍ഡ് ചെയ്യുകയും ചെയ്തു. എന്നാല്‍ ഏതാണ് എയര്‍പോര്‍ട്ടില്‍ ലാന്‍ഡ് ചെയ്തിരിക്കുന്ന ഈ അജ്ഞാത വിമാനം എന്നറിയാന്‍ എയര്‍പോര്‍ട്ട് ജീവനക്കാര്‍ ഓടിയെത്തി. അവരുടെ കണ്ടെത്തല്‍ ഞെട്ടിപ്പിക്കുന്നതായിരുന്നു. 1956ല്‍ പ്രവര്‍ത്തനം നിലച്ച് അപ്രത്യക്ഷമായ സാന്റിയാഗോ എയര്‍ലൈന്‍സായിരുന്നു അത്.

വിമാനത്തിന്റെ വാതില്‍ തുറന്ന ജീവനക്കാര്‍ അകത്തെ കാഴ്ച കണ്ട് അതിലേറെ ഞെട്ടി. 88 യാത്രക്കാരുടെയും 4 ജീവനക്കാരുടെയും ഉള്‍പ്പെടെ 92 പേരുടെ അസ്ഥികൂടങ്ങള്‍ അതത് സീറ്റുകളില്‍ ഇരിക്കുന്നതാണ് ജീവനക്കാര്‍ കണ്ടത്. പൈലറ്റ് വിമാനത്തിന്റെ കണ്‍ട്രോളില്‍ കൈ വച്ച് സീറ്റ് ബെല്‍റ്റോടു കൂടി ഇരിപ്പിടത്തില്‍ തന്നെയുണ്ട്. എന്നാല്‍ അയാളും അസ്ഥികൂടമായിരുന്നു. ഈ വിചിത്ര സംഭവത്തെ കുറിച്ച് അന്വേഷിക്കാന്‍ ബ്രസീലിയന്‍ ഭരണകൂടം ഉത്തരവിട്ടെങ്കിലും അന്വേഷണത്തെ പറ്റിയുള്ള വിവരങ്ങളൊന്നും അധികൃതര്‍ പിന്നീട് വെളിപ്പെടുത്തിയില്ല.