കസ്റ്റമര് കെയറിലേക്ക് 24,000 കോള്, 71-കാരന് ഒടുവില് പോലീസ് പിടിയിലായി!
ജപ്പാനില് അകിതോഷി അകാമോട്ടോ എന്ന 71-കാരനെ പൊലീസ് കസ്റ്റഡിയിലെടുത്തു. ചെയ്ത കുറ്റം എന്താണെന്നോ? കഴിഞ്ഞ രണ്ടുവര്ഷത്തിനിടെ പരാതി പറയാനായി ഒരു ഫോണ് കമ്പനിയുടെ കസ്റ്റമര് കെയറിലേക്ക് വിളിച്ചത് 24,000 തവണ!
വിളിച്ചു കഴിഞ്ഞാല് പ്രസ്തുത കമ്പനിയുടെ ഏതെങ്കിലും സേവനം അയാള്ക്കാവശ്യമുണ്ടെന്ന് അറിയിക്കാന് ശ്രമിക്കില്ലെന്നതു കൂടാതെ, കസ്റ്റമര്കെയറില് ലഭിക്കുന്ന വിവിധ സേവനങ്ങളെക്കുറിച്ച് ആവര്ത്തിച്ച് സംശയം ചോദിച്ചു സമയം കളയുക, ജീവനക്കാരെ അപമാനിച്ച് സംസാരിക്കുക തുടങ്ങിയവ ചെയ്യലായിരുന്നു ഇയാളുടെ രീതി. ചിലപ്പോള് കസ്റ്റമര് കെയറില് കോള് സ്വീകരിക്കുമ്പോള് മിണ്ടാതിരിക്കുകയും ചെയ്യും.
അവസാന എട്ടു ദിവസങ്ങള്ക്കിടെ നൂറിലധികം തവണ ഇയാള് ഫോണ്ചെയ്തതോടെ സഹികെട്ട ജീവനക്കാര് മേലധികാരികളെ അറിയിച്ചു. അവര് പൊലീസിനെയും. ജോലി ചെയ്യാന് തടസം നില്ക്കുന്നു എന്ന് കാട്ടിയാണ് അകിതോഷിക്കെതിരെ കമ്പനി പരാതി നല്കിയത്.
സേവനം മോശമാണെന്നും കമ്പനി പ്രതിനിധി നേരില് കണ്ട് മാപ്പുപറയണം എന്നുമായിരുന്നു ഇയാള് ആവശ്യപ്പെട്ടിരുന്നത്.
അതേസമയം, സംഭവത്തെക്കുറിച്ച് അന്വേഷിക്കുകയാണെന്നും ഇയാള്ക്ക് മാനസിക പ്രശ്നമുണ്ടോ എന്ന സംശയമുണ്ടെന്നുമാണ് പൊലീസ് പറയുന്നത്.
https://www.facebook.com/Malayalivartha