ന്യൂസിലന്‍ഡിലെ വൈറ്റ് ഐലന്‍ഡിലെ അഗ്‌നിപര്‍വത സ്‌ഫോടനത്തില്‍ മരിച്ച ആറു പേരുടെ മൃതദേഹം കൂടി കണ്ടെത്തി. ന്യൂസിലന്‍ഡ് പ്രതിരോധ സേന ഹെലികോപ്റ്റര്‍ ഉപയോഗിച്ച് നാലു മണിക്കൂര്‍ നേരം നടത്തിയ തെരച്ചിലിലാണ് മൃതദേഹങ്ങള്‍ കണ്ടെത്തിയത്. കാണാതായ മറ്റു രണ്ടു പേര്‍ക്ക് വേണ്ടിയുള്ള തെരച്ചില്‍ തുടരുകയാണ്. സ്‌ഫോടനമുണ്ടായ പ്രദേശത്തിന് ചുറ്റും മുങ്ങല്‍ വിദഗ്ദര്‍ തെരച്ചില്‍ തുടരുകയാണെന്ന് ന്യൂസിലന്‍ഡ് പോലീസ് അറിയിച്ചു. കഴിഞ്ഞ തിങ്കളാഴ്ച ഉച്ചകഴിഞ്ഞ് രണ്ടോടെയുണ്ടായ സ്‌ഫോടനത്തില്‍ ഇതുവരെ 14 പേരാണ് മരിച്ചത്.

അഗ്‌നിപര്‍വത സ്‌ഫോടനത്തെത്തുടര്‍ന്ന് പുകയും ചാരവും 12000 അടി ഉയരത്തിലേക്ക് തെറിച്ചിരുന്നു. ആ സമയത്ത് വിവിധ രാജ്യങ്ങളില്‍ നിന്നുള്ള 47 വിനോദസഞ്ചാരികള്‍ സ്ഥലത്തുണ്ടായിരുന്നു. ഇവരില്‍ 20 പേര്‍ ഗുരുതര പരിക്കുകളോടെ ആശുപത്രിയില്‍ ചികിത്സയിലാണ്.
വാക്കാരി എന്നുകൂടി അറിയപ്പെടുന്ന വൈറ്റ് ഐലന്‍ഡ് ബേ ഓഫ് പ്‌ളെന്റിയില്‍ നിന്ന് 50 കിലോമീറ്റര്‍ അകലെയാണ്.

ന്യൂസിലന്‍ഡിലെ ഏറ്റവും സജീവമായ അഗ്‌നിപര്‍വതങ്ങളിലൊന്നാണിത്. പ്രതിവര്‍ഷം പതിനായിരത്തോളം ടൂറിസ്റ്റുകളാണ് ഇവിടെ സന്ദര്‍ശനത്തിനെത്തുന്നത്.