നാസയുടെ ബഹിരാകാശ പേടകമായ ജൂണോയെ വ്യാഴത്തിന്റെ നിഴലില്‍നിന്നും സംരക്ഷിക്കാനുളള ശ്രമത്തിനിടെ, വ്യാഴത്തിന്റെ ദക്ഷിണ ധ്രുവത്തിലെ ചുഴലിക്കാറ്റിന്റെ ദൃശ്യം പേടകം പകര്‍ത്തി. നവംബര്‍ മൂന്നിന് വ്യാഴത്തിന്റെ ഉപരിതലത്തില്‍ നിന്നും 3,500 കിലോമീറ്റര്‍ ദൂരത്തുകൂടിയുളള 22-മത് പറക്കല്‍, സൗരോര്‍ജത്തില്‍ പ്രവര്‍ത്തിക്കുന്ന പേടകം പൂര്‍ത്തിയാക്കി.

ജൂണോയ്ക്ക് മേല്‍ ഗ്രഹണം ബാധിക്കാവുന്ന ഒരു സാഹചര്യമുണ്ടായിരുന്നതിനാല്‍ വ്യാഴത്തിന്റെ നിഴലില്‍ നിന്നും ജൂണോയെ അതിവേഗം പുറത്തുചാടിക്കാനാണ് ഗവേഷകര്‍ പദ്ധതിയിട്ടത്. അത് അങ്ങനെ നടന്നില്ലെങ്കില്‍ അതിന്റെ പ്രവര്‍ത്തനത്തിന് ആവശ്യമായ ഊര്‍ജം ലഭിക്കാതെ വരുകയും ജൂണോ പ്രവര്‍ത്തനരഹിതമാവുകയും ചെയ്യുമായിരുന്നു. അതിനാല്‍ വ്യാഴത്തിന്റെ നിഴലില്‍ നിന്നും ജൂണോയെ അതിവേഗം പുറത്തുചാടിക്കാനുള്ള ശ്രമങ്ങള്‍ നടത്തവേയാണ് അവിടെ ചുഴലിക്കാറ്റ്  കണ്ടെത്തിയത്.

ജൂലൈയില്‍ ജൂണോ വ്യാഴത്തിലെത്തിയപ്പോള്‍ അതിന്റെ ഇരുധ്രുവങ്ങളിലും വലിയ ചുഴലിക്കാറ്റിനോട് സമാനമായതെന്തോ ചുറ്റുന്നതായി കണ്ടെത്തിയിരുന്നു. ഭൂമിയിലുളള ചുഴലിക്കാറ്റിനോട് സമാനമായവയാണോ ഇവയെന്ന് ഗവേഷകര്‍ക്ക് വ്യക്തമല്ല. മധ്യഭാഗത്തായി കറങ്ങുന്ന ഒരു ചുഴലിക്കാറ്റിന് ചുറ്റും ആറ് ചുഴിക്കാറ്റുകള്‍ ക്രമീകരിക്കപ്പെട്ട നിലയിലാണ് ഇവ. കാഴ്ചയില്‍ പഞ്ചഭുജാകൃതിയാണുള്ളത്. മധ്യഭാഗത്തുളള ചുഴലിക്കാറ്റിന് ടെക്സാസ് നഗരത്തിന്റെ അത്രയും വലിപ്പമുണ്ട്. ഈ ചുഴലിക്കാറ്റുകള്‍ പുതിയ പ്രതിഭാസമാണെന്ന് ഗവേഷകര്‍ പറയുന്നു. ഇത് സംബന്ധിച്ച് കൂടുതല്‍ പഠനങ്ങളിലാണ് ഇവര്‍.