ഒരു റെയില്‍വേ കമ്പനിയില്‍ മെക്കാനിക് ആയ സാക്രി ഹാസിന്റെയും കൊറിസ്സ ഹാസിന്റെയും മൂന്നു മക്കളില്‍ മൂത്തവനായ അഞ്ചു വയസ്സുകാരന്‍ വ്യാട്ട് ഹാസ് കിന്റര്‍ഗാര്‍ട്ടന്‍ വിദ്യാര്‍ത്ഥിയാണ്. മാരകമായ ബ്രെയിന്‍ ട്യൂമര്‍ ബാധിച്ച് ചികിത്സയ്ക്ക് പോകുകയാണ് വ്യാട്ടെന്ന്, വ്യാട്ടിനൊപ്പം പഠിക്കുന്ന തന്റെ മകനില്‍ നിന്നും അറിഞ്ഞ ജെന്നിഫര്‍ നീല്‍സണ്‍-ന് അത് വല്ലാത്ത വേദനയുണ്ടാക്കി. ഇത് തങ്ങളുടെ മകനാണ് സംഭവിച്ചതെങ്കില്‍ എന്ന തോന്നല്‍ ഞെട്ടലുണ്ടാക്കി. ഇതോടെ ശസ്ത്രക്രിയയ്ക്കു മുന്‍പ് ഒരു പാര്‍ട്ടി ഒരുക്കണമെന്ന് തോന്നി. മറ്റ് രക്ഷിതാക്കള്‍ക്കും സന്ദേശമയച്ചു. മണിക്കൂറുകള്‍ക്കുള്ളില്‍ രണ്ട് കേക്കുകളും ഫ്രൂട്ട് ജ്യൂസുകളും അടക്കം പാര്‍ട്ടിക്കുള്ള സാധനങ്ങള്‍ തയ്യാറായി.

തന്റെ ഫാമിലെ ഒരു കുതിരക്കുട്ടിയേയും നീല്‍സണ്‍ കൊണ്ടുവന്നിരുന്നു. ആ വെള്ളക്കുതിരയെ നിറങ്ങളില്‍ കുളിപ്പിച്ച് നെറ്റിയില്‍ ഒരു കൊമ്പ് വച്ചുപിടിപ്പിച്ച് വ്യാട്ടിന്റെ ഇഷ്ട കഥാപാത്രമായ യൂണികോണ്‍ (കുതിരയ്ക്ക് സമാനമായതും ഒറ്റകൊമ്പുള്ളതുമായ മൃഗം) പോലെയാക്കി ത്തീര്‍ത്തു. ഡിസംബര്‍ ഏഴിന് പ്രദേശത്തെ ഒരു പാര്‍ക്കില്‍ വച്ച് പാര്‍ട്ടി നടന്നു. വ്യാട്ടിന് സമ്മാനമായി യൂണികോണ്‍ രൂപത്തിലുള്ള കളിപ്പാട്ടങ്ങളുമായാണ് സഹപാഠികള്‍ എത്തിയത്.

മെഡുലോബ്ലാസ്റ്റോമ (മാരകമായ ബ്രെയിന്‍ ട്യൂമര്‍) ബാധിച്ച വ്യാട്ട് ടെന്നസിയിലെ മെംഫീസ് സെന്റ് ജൂഡ്സ് ചില്‍ഡ്രണ്‍സ് റിസേര്‍ച്ച് ഹോസ്പിറ്റലിലാണ് ശസ്ത്രക്രിയയ്ക്ക് വിധേയനാകുന്നത്. ഇതിനു വേണ്ടി കഴിഞ്ഞയാഴ്ചയോടെ പഠനം താത്ക്കാലികമായി അവസാനിപ്പിച്ച വ്യാട്ടിന് കിന്റര്‍ഗാര്‍ഡനിലെ സഹപാഠികളും അവരുടെ രക്ഷിതാക്കളും ചേര്‍ന്നാണ് അവിസ്മരണീയമായ യാത്രയയപ്പ് ഒരുക്കിയത്. കഴിഞ്ഞ മാസം നടത്തിയ പരിശോധനയിലാണ് വ്യാട്ടിന്റെ രോഗം സ്ഥിരീകരിച്ചത്.

ഒരു റെയില്‍വേ കമ്പനിയില്‍ മെക്കാനിക് ആയ സാക്രി ഹാസിന്റെയും കൊറിസ്സ ഹാസിന്റെയും മൂന്നു മക്കളില്‍ മൂത്തവനാണ് വ്യാട്ട്. പിതാവിന്റെ വരുമാനത്തില്‍ മാത്രം കഴിയുന്ന ഈ കുടുംബത്തിന് വ്യാട്ടിന്റെ ഭീമമായ ചികിത്സ ചെലവും താങ്ങാനാവുന്നില്ല. അതിനാല്‍ ഗോഫണ്ട്മീ അക്കൗണ്ടുവഴി 8000 ഡോളറിന്റെ ചികിത്സാ ചെലവ് കണ്ടെത്താന്‍ കഴിയുമെന്ന പ്രതീക്ഷയിലാണ് കുടുംബം. ഈ അപ്രതീക്ഷിത പാര്‍ട്ടിയും യൂണികോണുമെല്ലാം വ്യാട്ടിനെ ഭയങ്കരമായി സന്തോഷപ്പെടുത്തി എന്നാണ് അച്ഛന്‍ പറയുന്നത്.