പാംഗോങ് തടാകത്തിനു സമീപമുള്ള ഫിംഗറുകള് എന്ന എട്ടു മലനിരകളിലെ നാലാം വിരല് ചൈനയുടെ ലക്ഷ്യം
വിശാലമായ പാംഗോങ് തടാകത്തിനു സമീപമുള്ള എട്ടു മലനിരകള് ഫിംഗറുകള് എന്നാണ് വിളിക്കപ്പെടുന്നത്. എട്ടു വരെ ഇന്ത്യന് അതിര്ത്തിയാണെങ്കിലും നാലാം മലനിര വരെയാണ് ഇന്ത്യക്കു പട്രോളിങ് പോസ്റ്റുകളുള്ളത്. നാലിനും എട്ടിനുമിടയില് ഇരുഭാഗത്തെയും സൈനികര് പട്രോളിങ് നടത്തിയിരുന്നു.
കിഴക്കന് ലഡാക്കിലെ പാംഗോങ് തടാകക്കരയില് വന് യുദ്ധസന്നാഹമൊരുക്കിയ ചൈനയുടെ ലക്ഷ്യം നാലാം മലനിര വരെ പിടിച്ചടക്കല്. പ്രതിരോധത്തിനായി ഇന്ത്യ ഒരുക്കിയിരിക്കുന്നത് അതിശക്ത സേനാവ്യൂഹം. 70 ദിവസം നീണ്ടുനിന്ന ദോക്ലാം മുഖാമുഖത്തിലുമധികം സംഘര്ഷാന്തരീക്ഷം തുടരുമെന്നാണ് സൂചന.
കഴിഞ്ഞ മേയില് കടന്നുകയറിയ ചൈനീസ് പട്ടാളം ഇന്ത്യയുടെ പട്രോളിങ് പോസ്റ്റ് തകര്ത്തതാണ് ഇരുഭാഗത്തും ആള്നാശമുണ്ടാക്കിയ ഏറ്റുമുട്ടലുകള്ക്കു പ്രകോപനമായത്. ഇവിടെ രണ്ടു മാസത്തിനിടെ സംഘര്ഷമുണ്ടായത് എട്ടുതവണ. 200 മീറ്റര് അകലത്തിലാണു സൈനികര് മുഖാമുഖം നില്ക്കുന്നത്.
ഉപഗ്രഹചിത്രങ്ങളില് നിന്നും ഫിംഗര് എട്ടു വരെ ചൈനീസ് ഭാഗത്തു കൂടാരങ്ങളും ക്യാമ്പുകളും മാത്രമല്ല പില് ബോക്സുകള് എന്നറിയപ്പെടുന്ന ആയുധ ബങ്കറുകള്, പ്രതിരോധ ഭിത്തികള് (സാംഗാര്), പ്രതിരോധത്തിനുള്ള അതിര്വരമ്പുകള് (ബേം) എന്നിവ സജ്ജമാക്കിയെന്ന് വ്യക്തമാകുന്നു. എല്.എ.സിക്കു നാലു കി.മീ. അപ്പുറം ചൈന വലിയ സന്നാഹമൊരുക്കിയതോടെ ഇന്ത്യയും യുദ്ധസജ്ജമായി. കരസേനയുടെ മൂന്നു ഡിവിഷനുകളെ പുതുതായെത്തിച്ചു. കൂടുതല് ടാങ്കുകളും പീരങ്കികളുമെത്തിച്ചു. പര്വതയുദ്ധ പ്രവീണരായ ഐ.ടി.ബി.പി, ലഡാക് സ്കൗട്ട്സ് എന്നിവയുടെ കൂടുതല് ബറ്റാലിയനുകളെയും വിന്യസിച്ചു.
ലഡാക്കില് നേരിട്ടെത്തിയ കരസേനാ മേധാവി ജനറല് എം.എം. നരവനെ, എല്.എ.സിയിലെ 65 പട്രോളിങ് പോയിന്റിലും പഴുതുകളടയ്ക്കാന് നിര്ദേശം നല്കി. പാംഗോങ്, ഹോട്ട് സ്പ്രിങ്സ്, ഗല്വാന് മേഖലകള്ക്കപ്പുറം ഡെപ്സാങ്ങിലും ദൗലത് ബെഗ് ഓള്ഡിയിലും പോര്മുഖം തുറക്കാനാണു ചൈനയുടെ നീക്കം. ലഡാക്കില് വ്യോമസേന നിരന്തരം ആകാശനിരീക്ഷണം നടത്തുന്നു.
ഇന്ത്യ ദൗലത് ബെഗ് ഓള്ഡി എയര്സ്ട്രിപ്പ് പുനരുജ്ജീവിപ്പിച്ചതു ചൈനയെ അസ്വസ്ഥരാക്കിയിരുന്നു. കാരക്കോറം ചുരത്തില് ഇന്ത്യക്ക് ആധിപത്യം നല്കുന്ന മേഖലയാണു ദൗലത് ബെഗ് ഓള്ഡി. എ.എ.സിയില്നിന്നു കാരക്കോറം ചുരത്തിലേക്ക് ഏഴു കി.മീ. മാത്രമാണ് അകലം. എന്നാല് ദര്ബൂക് - ഷ്യോക് - ദൗലത് ബെഗ് ഓള്ഡി റോഡ് അതിവേഗം പൂര്ത്തിയാക്കി ടി-90 ടാങ്കുകളും റഷ്യന് നിര്മിത യുദ്ധവാഹനങ്ങളും യു.എസ്നിര്മിത ഹൊവിറ്റ്സര് പീരങ്കികളുമെത്തിച്ച ഇന്ത്യക്കാണ് ഇവിടെ നിര്ണായക മേല്ക്കൈ.
രണ്ടു ദിവസം ലഡാക്കിലുണ്ടായിരുന്ന കരസേനാ മേധാവി ജനറല് എം.എം. നരവനെ ഇന്നലെ ഡല്ഹിയില് പ്രതിരോധമന്ത്രി രാജ്നാഥ് സിങ്ങിനെ സന്ദര്ശിച്ച് സ്ഥിതിഗതി വിശദീകരിച്ചു.
സംഘര്ഷം കനക്കുന്നതിനൊപ്പം ലഡാക്കില് കര, വ്യോമ സേനകളുടെ സംയുക്ത അഭ്യാസത്തിലൂടെ ഇന്ത്യയുടെ ശക്തിപ്രകടനം. ഇതിനു പുറമേ 35,000 സൈനികരെക്കൂടി എത്തിച്ചു. യുദ്ധടാങ്കുകളും പീരങ്കികളും എല്.എ.സിക്ക് ഒരു കി.മീ. അടുത്തേക്കു നീക്കി. സുഖോയ് എസ്യു-30 എം.കെ.ഐ. യുദ്ധവിമാനങ്ങള്, സി-130ജെ സൂപ്പര് ഹെര്ക്കുലീസ് സൈനിക ചരക്കുവിമാനങ്ങള്, ചിനൂക്, മില് എംഐ-17 ഹെലികോപ്ടറുകള് എന്നിവയും അണിനിരത്തിയായിരുന്നു അഭ്യാസപ്രകടനം.
https://www.facebook.com/Malayalivartha