പാക് അധീന കശ്മീരില്‍ കൂടുതല്‍ ശ്രദ്ധ പതിപ്പിച്ച് ഇന്ത്യ. ചൈനീസ് വ്യോമസേനയുടെ ടാങ്കര്‍ വിമാനം പാക് അധീന കശ്മീരില്‍ ഇറങ്ങിയതോടെയാണ് അപ്രതീക്ഷിത നീക്കം. ഇന്ത്യയുമായി ഒരു സംഘര്‍ഷമുണ്ടായാല്‍ പാക് അധീന കശ്മീരിലെ സ്‌കര്‍ദു വ്യോമതാവളം പാകിസ്ഥാന്‍ ചൈനയ്ക്ക് കൈമാറാനുള്ള സാധ്യത കണക്കിലെടുത്താണ് ഇന്ത്യയുടെ പുതിയ നീക്കം.

സ്‌കര്‍ദു വ്യോമതാവളത്തില്‍ ചൈനീസ് ടാങ്കര്‍ വിമാനമായ ഐഎല്‍ -78 ലാന്‍ഡ് ചെയ്തിരുന്നു.സ്‌കര്‍ദു വ്യോമതാവളം ലേയില്‍ നിന്ന് 100 കിലോമീറ്റര്‍ മാത്രം അകലെയാണ്. പാകിസ്ഥാന്‍ നേരത്തെയും വിദേശരാജ്യങ്ങള്‍ക്ക് സ്വന്തം വ്യോമതാവളം ഉപയോഗിക്കുന്നതിന് അനുവാദം നല്‍കിയിട്ടുണ്ട്.അമേരിക്ക പാക് സൈനിക കേന്ദ്രങ്ങള്‍ ഉപയോഗിച്ചാണ് അഫ്ഗാനിസ്ഥാനിലെ താലിബാനെതിരെ പോരാടിയത്. അതേസമയം പാകിസ്ഥാനും ചൈനയും തമ്മിലുള്ള അടുത്ത ബന്ധവും ഇന്ത്യയെ ആശങ്ക പെടുത്തുന്നു. ഇരു രാജ്യങ്ങളും തമ്മിലുള്ള ബന്ധം കണക്കിലെടുത്ത് പാകിസ്ഥാന്‍ സ്‌കര്‍ദു ചൈനയ്ക്ക് കൈമാറുന്നതിനുള്ള സാധ്യത ഇന്ത്യ തള്ളിക്കളയുന്നില്ല. അത് കൊണ്ട് തന്നെ പാക് അധീന കശ്മീരിലെ ഓരോ ചലനവും ഇന്ത്യ സൂക്ഷ്മമായി നിരീക്ഷിക്കുകയാണ്. സിന്‍ജിയാങ് പ്രവിശ്യയിലെ ഇന്ത്യയ്ക്ക് സമീപമുള്ള പ്രദേശത്തേക്ക് ചൈന എസ്.യു-27 യുദ്ധവിമാനങ്ങളും എത്തിച്ചിട്ടുണ്ട്.സിന്‍ജിയാങ്ങിന് പുറമേ ടിബറ്റിലെ വ്യോമതാവളവും ഉപയോഗിക്കാന്‍ കഴിയുന്നത് ചൈനയ്ക്ക് വലിയ ശക്തി നല്‍കുന്ന ഘടകമാണ്. ഈ സാഹചര്യത്തിലാണ് പാകിസ്ഥാന്റെ നീക്കങ്ങളെ ഇന്ത്യ ജാഗ്രതയോടെ വീക്ഷിക്കുന്നത്.നേരത്തെ തന്നെ പാക് അധീന കശ്മീരിലെ ഓരോ നീക്കവും ഇന്ത്യ ജാഗ്രതയോടെ നിരീക്ഷിക്കുകയായിരുന്നു.

അനധികൃത കയ്യേറ്റം ഒഴിഞ്ഞ് പോകണം എന്ന താക്കീത് നല്‍കിയ ഇന്ത്യ, പാക് അധീന കശ്മീരിലെ തീവ്രവാദ ക്യാമ്പുകളെയും നിരീക്ഷിക്കുകയാണ്. ഐഎസ്‌ഐ പിന്തുണയോടെ പാക് അധീന കശ്മീരില്‍(POK) നടക്കുന്ന തീവ്ര വാദ ക്യാമ്പുകളുടെ പൂര്‍ണ്ണ വിവരങ്ങള്‍ ഇതിനോടകം തന്നെ ഇന്ത്യ ശേഖരിച്ചിട്ടുണ്ട്.ഇന്ത്യന്‍ സൈന്യം പാക് അധീന കശ്മീരിലേക്ക് കടക്കുന്നതിനും സാധ്യതയുണ്ട്. ഇന്ത്യ നിയന്ത്രണ രേഖയില്‍ അതീവ ജാഗ്രതയാണ് പുലര്‍ത്തുന്നത്.നുഴഞ്ഞ് കയറ്റക്കാര്‍ക്കെതിരെയും തീവ്ര വാദ ക്യാമ്പുകള്‍ക്കെതിരെയും വന്‍ സൈനിക നീക്കം നടത്തുന്നതിനാണ് ഇന്ത്യ തയ്യാറെടുക്കുന്നത്
എന്നാണ് വിവരം.

ഇങ്ങനെയൊക്കെയാണെങ്കിലും ടിബറ്റില്‍ ചൈനയ്ക്ക് നിരവധി വ്യോമ താവളങ്ങള്‍ ഉണ്ടെങ്കിലും മിക്കവാറും എല്ലാം നാലായിരം അടി മുകളിലാണ്. ഇവിടെ നിന്ന് എല്ലാ ആയുധങ്ങളും ഘടിപ്പിച്ച് പറന്നുയരാന്‍ സാങ്കേതികമായ ബുദ്ധിമുട്ട് ചൈനയുടെ പോര്‍ വിമാനങ്ങള്‍ നേരിടുന്നുണ്ട്. എന്നാല്‍ ഇന്ത്യയെ സംബന്ധിച്ച് എല്ലാ വ്യോമ താവളങ്ങളും പഞ്ചാബിലെയും ഹരിയാനയിലേയും സമതല നിരപ്പിലുള്ള പ്രദേശങ്ങളിലാണ്. ഇത് ഇന്ത്യക്ക് വ്യോമമേഖലയില്‍ മേല്‍ക്കൈ നല്‍കുന്നുണ്ട്.

ഇത്തരമൊരു പ്രശ്‌നം നിലനില്‍ക്കുന്നതു കൊണ്ടാണ് പാക് അധീന കശ്മീരിലെ വ്യോമ താവളങ്ങള്‍ ഉപയോഗിക്കാന്‍ ചൈന ശ്രമിച്ചേക്കുമെന്ന് സംശയിക്കുന്നത്. ഈയടുത്ത് ചൈനീസ് ഇന്ധന ടാങ്കര്‍ വിമാനം സ്‌കര്‍ദു വിമാനത്താവളത്തില്‍ ഇറങ്ങിയത് സംശയം വര്‍ദ്ധിപ്പിക്കുന്നു. നേരത്തെ തന്നെ സ്വന്തം വ്യോമതാവളങ്ങള്‍ മറ്റ് രാജ്യങ്ങളുടെ സൈന്യത്തിന് ആക്രമണത്തിനായി ഉപയോഗിക്കാന്‍ നല്‍കിയ പാരമ്പര്യം പാകിസ്താനുണ്ട്. ഈ സാഹചര്യത്തില്‍ രണ്ട് മേഖലയിലുള്ള യുദ്ധം ചെയ്യാന്‍ ഇന്ത്യ നിര്‍ബന്ധിതമാകുമെന്നാണ് സൂചന. അതേസമയം ചൈനീസ് വിമാനങ്ങള്‍ക്ക് ഇറങ്ങാന്‍ പാകിസ്താന്‍ അനുമതി കൊടുക്കാന്‍ സാദ്ധ്യതയുണ്ടെങ്കില്‍ പാക് അധീന കശ്മീര്‍ പിടിച്ചെടുക്കുന്നതാണ് കൂടുതല്‍ സുരക്ഷിതമെന്ന് ഇന്ത്യ കരുതുന്നു. ഇന്ത്യയുടെ ഭാഗമായി കരുതുന്ന പ്രദേശത്ത് നിന്ന് ആക്രമണത്തിന് ചൈനയെ അനുവദിക്കാനാണ് ഉദ്ദേശ്യമെങ്കില്‍ പിഓകെ പിടിച്ചെടുക്കാനാകും ഇന്ത്യ ശ്രമിക്കുക.