ഇന്ത്യചൈന അതിര്‍ത്തിസംഘര്‍ഷം പരിഹരിക്കാന്‍ നയതന്ത്രതല ചര്‍ച്ചകള്‍ സജീവമാക്കുന്നു. പ്രശ്‌നം പരിഹരിക്കും വരെ ഇരു രാജ്യങ്ങളിലെയും വിദേശകാര്യ മന്ത്രാലയ പ്രതിനിധികള്‍ വിഡിയോ കോണ്‍ഫറന്‍സ് വഴി പ്രതിവാര ചര്‍ച്ച നടത്തും. ജോയിന്റ് സെക്രട്ടറി നവീന്‍ ശ്രീവാസ്തവയും ചൈനീസ് വിദേശകാര്യ ഡയറക്ടര്‍ ജനറല്‍ വൂ ജിയാന്‍ഗാവോയും തമ്മിലായിരിക്കും ചര്‍ച്ചയെന്നു കേന്ദ്ര സര്‍ക്കാര്‍ വൃത്തങ്ങള്‍ പറഞ്ഞു.
ഉന്നത സേനാതല ചര്‍ച്ചകളുംതുടരും. ഈ മാസം 6, 22 തീയതികളില്‍ നടന്ന ചര്‍ച്ചകളിലെ ധാരണപ്രകാരമുള്ള സേനാ പിന്മാറ്റത്തിനു ചൈന തയാറാവാത്ത സാഹചര്യത്തില്‍, ലഫ്. ജനറല്‍ തലത്തില്‍ വീണ്ടും ചര്‍ച്ച വേണ്ടിവരും. ലേ ആസ്ഥാനമായുള്ള 14 കോര്‍ കമാന്‍ഡര്‍ ലഫ്. ജനറല്‍ ഹരീന്ദര്‍ സിങ്, ദക്ഷിണ ഷിന്‍ജിയാങ് മേഖല കമാന്‍ഡര്‍ മേജര്‍ ജനറല്‍ ലിയു ലിന്‍ എന്നിവരാണു ചര്‍ച്ച നടത്തുക.
പാംഗോങ് തടാകത്തോടു ചേര്‍ന്നുള്ള ചൈനയുടെ പടയൊരുക്കം മുഖ്യ ചര്‍ച്ചാവിഷയമാകും. മുന്‍ ചര്‍ച്ചകളില്‍ ഗല്‍വാനടക്കം മറ്റിടങ്ങളിലെ തര്‍ക്കം പരിഹരിച്ച ശേഷം പാംഗോങ്ങിനെക്കുറിച്ചു സംസാരിക്കാമെന്നായിരുന്നു ചൈനയുടെ നിലപാട്.

കരയിലെ സംഘര്‍ഷത്തിനു പിന്നാലെ കടലിലും പടയൊരുക്കം. ഇന്തോ പസിഫിക് സമുദ്ര മേഖലയില്‍ ചൈന ഉയര്‍ത്തുന്ന ഭീഷണിയുടെ പശ്ചാത്തലത്തില്‍, ഇന്ത്യ ജപ്പാന്‍ നാവികസേനകള്‍ സംയുക്ത അഭ്യാസം നടത്തി.
യുദ്ധക്കപ്പലുകളായ റാണ, കുലിഷ് എന്നിവ പങ്കെടുത്തു. പ്രദേശത്തു കൂടുതല്‍ യുദ്ധക്കപ്പലുകളെ ഇന്ത്യ നിയോഗിച്ചു. ദക്ഷിണ ചൈന കടലിനോടു ചേര്‍ന്നുള്ള സീഷ ദ്വീപില്‍ ജൂലൈ 1 മുതല്‍ 5 വരെ സേനാഭ്യാസം നടത്തുമെന്നു പിന്നാലെ ചൈന പ്രഖ്യാപിച്ചു. ചൈനയെ ലക്ഷ്യമിട്ടു യുഎസിന്റെ 3 വിമാനവാഹിനികളും ഇന്തോ പസിഫിക്കില്‍ നിലയുറപ്പിച്ചിട്ടുണ്ട്.

അതേസമയം കിഴക്കന്‍ ലഡാക്കിലെ അതിര്‍ത്തി സംഘര്‍ഷം ലഘൂകരിക്കാന്‍ ഇന്ത്യ-ചൈന കൂടിയാലോചന സമിതി ചര്‍ച്ച നടത്തുന്നതിന് ഇരുപക്ഷവും തീരുമാനിച്ചതായി വെളിപ്പെടുത്തല്‍. സംഘര്‍ഷപ്രദേശത്തുനിന്ന് പിന്മാറാന്‍ പരസ്പര ധാരണ ഉണ്ടാക്കിയശേഷവും രണ്ടു രാജ്യങ്ങളും അതിര്‍ത്തിസന്നാഹം ശക്തിപ്പെടുത്തിയിരിക്കെയാണ്, വീണ്ടും സമാധാനശ്രമങ്ങളുടെ സൂചന.ഇന്ത്യക്കും ചൈനക്കുമിടയില്‍ കൂടിയാലോചനക്കും ഏകോപനത്തിനും പ്രത്യേക ദൗത്യസംവിധാനമുണ്ട്. ഈ സമിതിയുടെ യോഗം ആഴ്ചതോറും ചര്‍ച്ച നടത്തുമെന്നാണ് വിവരം. പ്രതിരോധ, ആഭ്യന്തര, വിദേശകാര്യ മന്ത്രാലയ പ്രതിനിധികള്‍ ഉള്‍പ്പെട്ടതാണ് സമിതി. ചര്‍ച്ചയിലൂടെ സംഘര്‍ഷം ലഘൂകരിക്കാനാണ് ശ്രമം.

ചൈന കൈമാറുന്ന 1959ലെ ഭൂപടത്തിന്റെ അടിസ്ഥാനത്തില്‍ തര്‍ക്കപ്രദേശം ആരുടേതെന്ന കാര്യത്തില്‍ തീരുമാനമെടുക്കണമെന്നാണ് അവരുടെ ആവശ്യം. എന്നാല്‍, നേരേത്ത നടന്ന ചര്‍ച്ചകളില്‍ ഈ നിര്‍ദേശം ഇന്ത്യ തള്ളിയിരുന്നു.