യുഎസ് പിന്തുണയോടെ വെസ്റ്റ് ബാങ്കിന്റെ ഭാഗങ്ങള്‍ ഇസ്രയേലിനോടു കൂട്ടിച്ചേര്‍ക്കാനുള്ള പ്രധാനമന്ത്രി ബെന്യാമിന്‍ നെതന്യാഹുവിന്റെ തീരുമാനത്തിന് തിരിച്ചടി. ലോകരാജ്യങ്ങളുടെ എതിര്‍പ്പുകളെ അവഗണിച്ച്, ഇന്നു മുതല്‍ നടപടി ആരംഭിക്കാനാണ് ആലോചിച്ചിരുന്നതെങ്കിലും, യുഎസില്‍നിന്ന് ഇതിനുള്ള 'പച്ചക്കൊടി' കിട്ടിയില്ലെന്ന് ഇസ്രയേല്‍ മന്ത്രി സീവ് എല്‍കിന്‍ വ്യക്തമാക്കി. ഇസ്രയേല്‍ കാബിനറ്റ് ഇന്ന് കൂട്ടിച്ചേര്‍ക്കല്‍ നീക്കം സംബന്ധിച്ചു ചര്‍ച്ച തുടങ്ങാനിരിക്കുകയാണെന്നു റിപ്പോര്‍ട്ടുകളുണ്ടായിരുന്നുവെങ്കിലും ഇതും എല്‍കിന്‍ തള്ളി.

ഇപ്പോഴത്തെ മുന്‍ഗണന കോവിഡ് നിയന്ത്രണവും സാമ്പത്തികരംഗത്തെ തളര്‍ച്ച മറികടക്കലുമാണെന്നും സഖ്യകക്ഷി സര്‍ക്കാരിലെ പ്രതിരോധമന്ത്രി ബെന്നി ഗാന്റ്‌സ് പറഞ്ഞു. നവംബറിലെ യുഎസ് പ്രസിഡന്റ് തിരഞ്ഞെടുപ്പിനു മുന്‍പ് സംയോജനം യാഥാര്‍ഥ്യമാക്കണമെന്നാണ് നെതന്യാഹുവിന്റെ താല്‍പര്യം. മുന്‍ പട്ടാള മേധാവി കൂടിയായ ഗാന്റ്‌സ് ആകട്ടെ രാജ്യന്തര തലത്തില്‍ ആലോചനകള്‍ നടത്തിയ ശേഷമേ മുന്നോട്ടു പോകാവൂ എന്ന നിലപാടുകാരനാണ്.

എതിരാളികളായിരുന്ന നെതന്യാഹുവിന്റെ ലിക്കുഡ് പാര്‍ട്ടിയും ഗാന്റ്‌സിന്റെ ബ്ലൂ ആന്‍ഡ് വൈറ്റ് പാര്‍ട്ടിയും ചേര്‍ന്ന് സഖ്യസര്‍ക്കാരുണ്ടാക്കി അധികാരമേറ്റത് 3 തവണ തിരഞ്ഞെടുപ്പു നടന്നിട്ടും ആര്‍ക്കും ഭൂരിപക്ഷം കിട്ടാഞ്ഞതിനെത്തുടര്‍ന്നാണ്.

കഴിഞ്ഞമാസം ഉണ്ടാക്കിയ സഖ്യധാരണ പ്രകാരം സര്‍ക്കാര്‍ നടപടികള്‍ക്കു മേല്‍ നെതന്യാഹുവിനും 18 മാസത്തിനു ശേഷം ്രപധാനമന്ത്രി പദത്തിലെത്താനിരിക്കുന്ന ഗാന്റ്‌സിനും പരസ്പരം വീറ്റോ അധികാരമുണ്ട്. രണ്ടുപേരും യോജിപ്പിലെത്താതെ ഒന്നും നടക്കില്ലെന്നര്‍ഥം. എന്നാല്‍, വെസ്റ്റ് ബാങ്ക് കൂട്ടിച്ചേര്‍ക്കലിന്റെ കാര്യത്തില്‍, ഗാന്റ്‌സിന്റെ സമ്മതമില്ലാതെ കാബിനറ്റിനു മുന്നിലോ പാര്‍ലമെന്റിനു മുന്നിലോ നിര്‍ദേശം മുന്നോട്ടു വയ്ക്കാന്‍ നെതന്യാഹുവിന് അവകാശമുണ്ട്. സര്‍ക്കാരിന്റെ ഭാവി തന്നെ അപകടത്തിലാക്കി നെതന്യാഹു അതിനു തയാറാകുമോ എന്നാണ് അറിയേണ്ടത്.

കൂട്ടിച്ചേര്‍ക്കല്‍ നീക്കം മേഖലയില്‍ വിനാശകാരിയായ പ്രത്യാഘാതങ്ങളുണ്ടാക്കുമെന്ന് യുഎന്‍ മനുഷ്യാവകാശ ഹൈക്കമ്മിഷണര്‍ മിഷേല്‍ ബാഷ്‌ലെറ്റ് പറഞ്ഞു. ഇസ്രയേലിനെ പിന്തിരിപ്പിക്കാന്‍ ശ്രമിക്കുകയാണെന്ന് ബ്രിട്ടിഷ് വിദേശകാര്യ ഉപമന്ത്രി ജയിംസ് ക്ലെവര്‍ലി പറഞ്ഞു.യുഎന്‍ സെക്രട്ടറി ജനറല്‍, യൂറോപ്യന്‍ യൂണിയന്‍, പ്രധാന അറബ് രാജ്യങ്ങള്‍ എന്നിവരെല്ലാം നെതന്യാഹുവിന്റെ നീക്കത്തോട് കടുത്ത എതിര്‍പ്പു വ്യക്തമാക്കിയിട്ടുണ്ട്.

വെസ്റ്റ് ബാങ്കിന്റെ 30% ഇസ്രയേലിന്റെ ഭാഗമാക്കുകയും ബാക്കി ഭാഗം പലസ്തീന്റെ പരമാധികാരത്തില്‍ വിട്ടുനല്‍കുകയും ചെയ്യുക എന്നതാണ് ജനുവരിയില്‍ ട്രംപ് മുന്നോട്ടു വച്ച മധ്യപൂര്‍വദേശ രൂപരേഖ. ഇത് പലസ്തീന്‍ തള്ളിക്കളഞ്ഞതാണ്. വെസ്റ്റ് ബാങ്ക്, കിഴക്കന്‍ ജറുസലം, ഗാസാ സ്ട്രിപ് എന്നിവ പൂര്‍ണ സ്വതന്ത്ര രാഷ്ട്രത്തിന്റെ ഭാഗമാണെന്നാണ് പതിറ്റാണ്ടുകളായി പലസ്തീന്‍ വാദിക്കുന്നത്.