ചൈനയിലെ ഭരണകൂട ഭീകരതയ്‌ക്കെതിരെ പ്രതിഷേധ സ്വരങ്ങള്‍ ഉയരാന്‍ തുടങ്ങിയിട്ട് നാളുകളേറെ ആയി. അവയെല്ലാം തന്നെ ആഗോള ശ്രദ്ധ നേടുകയും ചെയ്തു.എന്നാല്‍ ഇപ്പോള്‍ പ്രമുഖ ചിത്രകാരനായ ബ്രദര്‍ നട്ടിന്റെ പ്രതീഷേധം വ്യത്യസ്തമാകുകയാണ് . ബ്രദര്‍ നട്ടിന്റെ ഈ മൗനമായിരുന്നു കഴിഞ്ഞ 30 ദിവസം ചൈനയിലെ പ്രതിഷേധത്തിന്റെ ശബ്ദം. ഒരു മാസത്തേയ്ക്ക് വായ്ക്ക് മെറ്റല്‍ ക്ലിപ്പുകള്‍ ഉപയോഗിച്ച് 'പൂട്ട്' ഇട്ടിരിക്കുകയായിരുന്നു നട്ട്. ചൈനയില്‍ കോവിഡ് വ്യാപനത്തോട് അനുബന്ധിച്ച് പ്രതിഷേധങ്ങള്‍ക്ക് ഏര്‍പ്പെടുത്തിയ വിലക്കിനെതിരെയായിരുന്നു ബ്രദര്‍ നട്ട് എന്നറിയപ്പെടുന്ന ചൈനയിലെ പ്രമുഖ ചിത്രകാരന്റെ ഈ സമരം.
 #shutupfor30days ((30 ദിവസത്തേക്ക് അടച്ചിടുന്നു) എന്ന ഹാഷ്ടാഗും നട്ട് സമൂഹമാദ്ധ്യമങ്ങളില്‍ പങ്കുവച്ചിട്ടുണ്ട്. കൂടാതെ വെബ്‌സൈറ്റിലെ പേജ് കാണാതാകുമ്പോള്‍ വരുന്ന സന്ദേശമായ 404 എന്നെഴുതിയ പാക്കിംഗ് ടേപ്പും വായയ്ക്ക് ചുറ്റും ഒട്ടിച്ചുവച്ചു. നിരവധി വെബ്‌സൈറ്റുകള്‍ക്ക് ചൈനീസ് സര്‍ക്കാര്‍ നിരോധനം ഏര്‍പ്പെടുത്തിയതിലുള്ള പ്രതിഷേധമാണ് ഇതിലൂടെ പ്രകടിപ്പിച്ചത്. എന്നാല്‍ തന്റെ യഥാര്‍ത്ഥ പേര് പ്രസിദ്ധീകരിക്കപ്പെടാന്‍ ആഗ്രഹിക്കുന്നില്ലെന്നാണ് ബ്രദര്‍ നട്ട് പറയുന്നത്. .

അക്രമം, സെന്‍സര്‍ഷിപ് പോലുള്ളവയോട് ഒരു കലാകാരന്‍ എങ്ങനെ പ്രതികരിക്കുമെന്ന് നട്ടിനോട് ആരെങ്കിലും ചോദിച്ചാല്‍ പ്രതികരണം ഇങ്ങനെയായിരിക്കും: 'യുദ്ധം ചെയ്യുക, കലകൊണ്ട് തന്നെ.' അനീതിയും സെന്‍സര്‍ഷിപ്പും അക്രമവും കലാകാരന്‍മാര്‍ക്ക് അംഗീകരിക്കാനാവില്ലെന്ന് ഈ മൗനസമരത്തിലൂടെ 39കാരനായ ബ്രദര്‍ നട്ട് ഉറക്കെ വിളിച്ചുപറയുന്നു. ഭിന്നാഭിപ്രായം പ്രകടിപ്പിക്കാനുള്ള അവസരം രാജ്യത്ത് കുറഞ്ഞുവരുകയാണ്. രോഗവ്യാപനം കൂടിയതോടെ ചൈനയില്‍ അഭിപ്രായ സ്വാതന്ത്ര്യം കുറഞ്ഞു. എതിരഭിപ്രായം പറയുന്നവരെ നിശബ്ദരാക്കുന്ന നയമാണ് പ്രസിഡന്റ് ഷി ചിന്‍പിങ്ങിന്.

ചൈനയില്‍ കൊറോണ വൈറസ് ബാധയെ കുറിച്ച് ആദ്യ മുന്നറിയിപ്പു നല്‍കിയ ഡോക്ടര്‍ ലീ വെന്‍ലിയാങ്ങിനെ ഭരണകൂടം ഭീഷണിപ്പെടുത്തി നിശബ്ദനാക്കുകയാണ് ചെയ്തത്. 2019 ഡിസംബറില്‍ വുഹാനില്‍ കൊറോണ വൈറസ് ബാധ പൊട്ടിപ്പുറപ്പെട്ടത് സംബന്ധിച്ച് ആദ്യ മുന്നറിയിപ്പു നല്‍കിയത് ലീ വെന്‍ലിയാങ് ആയിരുന്നു. എന്നാല്‍ അപവാദ പ്രചാരണം ആരോപിച്ച് പൊലീസ് അദ്ദേഹത്തെ ഭീഷണിപ്പെടുത്തുകയാണ് ചെയ്തത്. അവസാനം ഫെബ്രുവരിയില്‍ ലീ വെന്‍ലിയാങ്ങും കോവിഡിന് കീഴടങ്ങി.
ഇതിനു പിന്നാലെ സമൂഹമാധ്യമത്തില്‍ വന്‍പ്രതിഷേധമാണ് സമൂഹമാധ്യമങ്ങളില്‍ ഉയര്‍ന്നത്. ഇതോടെയാണ് പ്രതിഷേധങ്ങള്‍ക്ക് വിലക്കിടാന്‍ ചൈനീസ് സര്‍ക്കാര്‍ തീരുമാനിച്ചത്. ചില സമയങ്ങളില്‍ തന്റെ ജോലി ഒരു എന്‍ജിഒയുടെയോ ഒരു മാധ്യമപ്രവര്‍ത്തകന്റെയോ ജോലിയുമായി സാമ്യമുണ്ടെന്ന് തോന്നുന്നതായി ബ്രദര്‍ നട്ട് പറയുന്നു. അവരുടേത് പോലെ സാമൂഹിക പ്രശ്‌നങ്ങളെക്കുറിച്ച് അവബോധം സൃഷ്ടിക്കുകയും അവ നേരിടാനുള്ള നീക്കങ്ങള്‍ നടത്തുകയും ചെയ്യുന്നു.

കഴിഞ്ഞ മാസം നടന്ന 'മൗനസമരത്തില്‍' ഇടയ്ക്ക് സ്വയം സംസാരിച്ചിരുന്നതായി നട്ട് സമ്മതിക്കുന്നു. 'കലയുടെ ആവിഷ്‌കാരങ്ങള്‍ എപ്പോഴും ആവശ്യമാണ്. അവ വിള്ളലുകളില്‍ വളരുന്ന പുഷ്പങ്ങള്‍ പോലെയാണ്, മാത്രമല്ല ഏറ്റവും നിരാശാജനകമായ സമയത്തു പോലും നമ്മളെ നൃത്തം ചെയ്യാന്‍ പ്രേരിപ്പിക്കുന്നു.' നട്ട് പറയുന്നു.സാമൂഹിക വിഷയങ്ങളില്‍ മുമ്പും ശക്തമായി പ്രതികരിച്ചിട്ടുണ്ട് ബ്രദര്‍ നട്ട്. സാമൂഹിക അനീതികള്‍ക്കെതിരെ പ്രതികരിക്കുന്നതില്‍ മാദ്ധ്യമപ്രവര്‍ത്തകര്‍ക്കോ സന്നദ്ധ സംഘടനകള്‍ക്കോ ഉള്ള ഉത്തരവാദിത്തം തന്നെയാണ് തനിക്കുമുള്ളതെന്നാണ് അദ്ദേഹം പറയുന്നത്.
വായു മലിനീകരണത്തിനെതിരെ പ്രതിഷേധിക്കാന്‍ ബാറ്ററി ഉപയോഗിച്ച് പ്രവര്‍ത്തിക്കുന്ന വാക്വം ക്ലീനര്‍ തള്ളിക്കൊണ്ട് നട്ട് ബീജിംഗ് നഗരത്തിലൂടെ നടന്നിരുന്നു.ബീജിംഗ് ഒളിംപിക്‌സിനെ പരിഹസിച്ചുകൊണ്ട് നട്ട് ദീപശിഖാ റാലി നടത്തിയിരുന്നു. ഇതിനെ തുടര്‍ന്ന്, പോലീസ് അദ്ദേഹത്തെ 10 ദിവസം തടങ്കലിലാക്കി.